Amăng rơbêh 1 wơ̆t hrơi tơjuh nao wai bơnai ñu đih pơ Sang ia jrao prong tơring čar Gia Lai, lơ̆m krĕp 11 mông hrơi dong, ơi Nguyễn Thanh (75 thun, dŏ ƀơi thôn 2, să ia Hlốp, tơring glông Čư̆ Sê) rơbat nao pơ sang sĭ mơdrô Thị Huy či huă asơi. Ñu brơi thâo, asơi huă hơmâo añăm jơman, asơi pơ-iă, hơmâo đâụ phụ, hơmâo boh bip, añăm hla rok, hơmâo pơtơi (ƀudah thanh long, ia rơtă ñañ dong) samơ̆ ñu mă nua 2 rơbâo đôč. Djơ̆ anŏ ñu ƀu hơmâo djă ba prăk lĕ jing huă soh đôč.

Ơi Nguyễn Thanh lăi, ƀu kơnong hơjăn ñu ôh, rim hrơi ăt hơmâo hơdôm rơtuh čô mơnuih kiăo tui wai pô ruă, pô ruă đih pơ sang ia jrao nao huă asơi pơ anai: “Kâo lăng sang sĭ asơi tui anai djru ba mơnuih ruă, sang anŏ pô ruă jing yôm biă mă, plai ƀiă huač prăkm asơi huă hơdjă, jơman. Asơi rơmuăn, pơ-iă, tui hluai ta či ƀong yơh. Hơmâo ia mơñum, kơƀang grê agaih mơn”.

Hrŏm hăng sang sĭ asơi 2 rơbâo prăk, ƀơi plơi prong Pleiku dŏ hơmâo asơi huă yang hrơi dong djru kơ ƀing ruă sang anŏ rin, yua Grup djru khăp pap Anom bruă ia jrao GEM djru brơi. Amai Trần Thị Mỹ Hằng - khua grup brơi thâo: 2 thun rơgao, 200 čô ding kơna jing mơnuih mă bruă gah ia jrao rim blan lêng kơ djru prăk blan tui hluai kơ ƀing gơñu hơmâo. Mơ̆ng mrô prăk anai, grup hơmâo brơi 20 klăk prăk/blan či blơi asơi huă kơ ƀing tơnap tap: “Ƀing gơmơi hơmâo sa boh hip boh ƀañ mi, rim hrơi hơmâo soh. Amăng anun, hơmâo mơ̆ng 300 truh kơ 400 boh ƀañ mi. Hlơi rai khăm pơ anai lêng kơ dưi hơmâo soh. Bơ yang hrơi dong lĕ gơmơi pơhiăp tom hăng sang sĭ asơi. Djơ̆ anŏ ñu hơmâo mơ̆ng 30 truh kơ 40 jam asơi, hơmâo hrơi mơ̆ng 50 truh kơ 60 jam asơi či djru ba mơnuih mơ̆ng ataih, rai mơ̆ng plơi pla tơnap”.

Bruă djru mơnuih duam ruă sang anŏ rin glăk bang hyu kơtang biă ƀơi hơdôm boh sang ia jrao či plơi prong Pleiku, tơring čar Gia Lai, pơhưč lu mơnuih gum djru. Rơngiao kơ sang sĭ asơi 2 rơbâo prăk, hip pioh ƀañ mi, asơi huă brơi đôč, ăt dŏ hơmâo lu grup djru mơnuih tơnap brơi čăo kơ ƀing čơđai, mơnuih ruă boh ƀleh...Lu mơnuih gum djru hăng bruă brơi braih, ngôt hra kơ hơdôm anih tơnă hơbai, brơi kơ grup djru mơnuih tơnap. Amai Nguyễn Thị Dung, ƀơi phường Ia Kring, plơi prong Pleiku, brơi thâo: “Ta djru tui hluai kơ ta hơmâo. Kâo djru kơ anih tơnă hơbai 1 kơthung ia rơmă 5 lit, 2kg bột nêm hăng 2kg ƀô̆t ngôt. Rim čô mơnuih gum djru tui anun jing mơnuih duă plơi pla ataih, pô sang kiăo tui wai plai ƀiă mơn rơngiă prăk”.

Hrŏm hăng tơlơi gum djru mơ̆ng ană plơi, gong gai hơdôm boh să ƀơi plơi prong Pleiku, Gia Lai ăt gum djru brơi mơn kiăng bruă djru mơnuih tơnap tap dưi ngă gêh gal, klă hloh. Ơi Đỗ Trung Hùng - Khua Jơnum min mơnuih ƀôn sang phường Phù Đổng, plơi prong Pleiku, anih hơmâo lu sang ia jrao hăng lu bruă gum djru mơnuih tơnap brơi thâo: “Ƀing gơmơi hơmâo nao lăng, pơtô brơi anih tơnă asơi hơbai añăm kiăng agaih, hơdjă, pơtô brơi bruă blơi añăm pơtăm. Ƀing tơnă hơbai kiăng nao hrăm đah mơ̆ng hơmâo hră pơsit hơdjă gơnam ƀong huă. Hơmâo lu sang anŏ tơnap biă. Lu mơnuih čơmah djru brơi mơnuih duam ruă klă biă, kiăng pơpŭ biă mă kơ bruă anai”.