Mơng rơnuč thun hlâo truh ră anai, lơm yang hrơi lê̆, jơlan ƀêtông jum dar plơi Nú, să Ia Nan, tơring čar Gia Lai apui rơđah bơngač yua pil hrĭp pơ-iă yang hrơi. Ƀing čơđai hok mơ-ak đuăi hyu ngui, ƀing amĭ ama, ơi yă glăi mơng hmua ăt hơmâo apui pơčrang rơđah mơn, pơhlôm tơlơi hơdip hơđong. Amăng mơmŏt mlăm hơmâo apui pơčrang rơđah rôk jơlan glông, amon H’Oanh glăk hrŏm hăng gơyut gơyâo rơbat nao pơ sang drông, ñu hok mơ-ak brơi thâo:

“Hlâo adih lơm aka ƀu hơmâo apui kơđen pil hrĭp pơ-iă yang hrơi yua kông ti djru brơi, lơm tơbiă hyu gah rơngiao, ƀing gơmơi lĕ đah kơmơi ăt hŭi biă mă. Mơng hrơi hơmâo apui kơđen ƀing gơmơi hok mơ-ak biă mă”.

Hrŏm hăng Ia Nan, lu să rôk tui jơlan guai gah yŭ tơring čar Gia Lai ăt hơmâo hơdôm anom bruă mơng Binh đoàn 15 pok pơhai jơlan hơdră “Rơđah bơngač amăng plơi pla”. Thun 2024, Binh đoàn hơmâo tuh pơ alin dưm apui kơđen pơčrang rơđah jơlan glông 23 km, abih tih prăk tuh pơ alin rơbêh 1,5 klai prăk. Yak nao thun 2025, rơwang tal 2 mơng jơlan hơdră tŏ tui pok pơhai ƀơi lu plơi pla tơnap tap kual giăm guai, hăng abih tih glông rơbêh 10 km. Ƀơi să Ia Mơr, tha plơi Ksor H’Blâm ol kơdol brơi thâo.

“Kâo hok mơ-ak biă mă, ană plơi pla ăt tui anun mơn, jơlan glông rơđah bơngač. Hyu bơwih ƀong, nao kuah kơsu, ƀudah nao pơpă thơ jơlan rơđah bơngač, hok mơak biă mă”.

Đại tá Nguyễn Chí Kiên-Khua git gai Ping gah, kơ-iăng khua kông ti 72, Binh đoàn 15 brơi thâo, hơdôm ring bruă ngă rơđah bơngač yua pil hrĭp pơ-iă yang hrơi ƀu djơ̆ kơnong djru brơi plơi pla giăm guai hiam tui, djru brơi djop plơi pla hơmâo tơlơi hơdip klă tui hăng ngă tui hơnong pơkă plơi pla phrâo đôč ôh mơ̆ ăt pơgôp pơhlôm hơđong, huăi ƀuh klĕ dŏp hăng plai ƀiă ƀuh rơdêh pơjrom.

“Mơng hrơi hơmâo hơdôm jơlan hơdră rơđah bơngač amăng plơi pla ƀơi hơdôm anih anom mơng Binh đoàn 15 pơdong lêng pơgôp yôm amăng bruă wai pơgang rơnuk rơnua, pơhlôm hơđong amăng jơlan glông”.

Mơng hơdôm boh apui kơđen anun, jơlan hơdră “Rơđah bơngač amăng plơi pla” ƀu djơ̆ kơnong ngă rơđah amăng jơlan glông đôč ôh mơ̆ ăt ba glăi tơlơi đăo gơnang, tơlơi čang rơmang kơñ pơgi trơi pơđao; pơdah rơđah pran khăp kơplah wah tơhan-mơnuih ƀôn sang jai kjăp ƀơi kual giăm guai Gia Lai./.