Adai hơjan ƀudah pơđiă hai, ơi Čil Jŭ Ha Giảng, djuai ania K’Ho dŏ ƀơi plơi Liêng Bông, să Dă Nhim, tơring glông Lạc Dương, tơring čar Lâm Đồng ăt ngă djơ̆ na nao bruă hyu tir, ĕp lăng črăn glai klô kơnuk kơna jao wai pơgang. Ñu brơi thâo, hơdôm thun giăm anai, rơnoh prăk tŭ mă mơ̆ng bruă wai pơgang glai rưng ƀrư̆ hrơi lu tui ƀiă, hơmâo ba glăi rơnoh prăk pơhrui glăi hơđong kơ sang anŏ, anun lăng kơ bruă wai pơgang glai rưng jing bruă mă phun mơ̆ng mơnuih ƀôn sang amăng plơi pla.

“Mơnuih ƀôn sang thâo hluh laih kơ glai rưng, hơmâo tơlơi thâo hluh djơ̆ kơ bruă tŭ mă wai lăng hăng pơgang glai rưng, hyu tir, ĕp lăng amăng glai, ngă tui djơ̆ tơlơi pơtrun. Kơ tơlơi bơwih ƀong huă le rim hrơi, rim blan lĕ ta dưi hơdip mơda, tŭ mă prăk apah lĕ, khom ba yua amăng sang anŏ, ƀu kơƀah hơgĕt lơi, djop ƀong, djop huă, hơmâo tơlơi hơdip mơda hơđong. Rơnoh pơhrui glăi hơdôm anun mơnuih ƀôn sang ta ăt hok mơak mơ̆n ngă bruă wai pơgang glai rưng brơi klă”.

Ră anai, tơring čar Lâm Đồng, lơm sa hektar tŭ mă wai pơgang glai rưng Kơnuk kơna apah rơnoh ƀiă hloh lĕ 445.000 sa thun, lu hloh lĕ 2.723.000 prăk sa thun tui hluai anih, glai klô. Ơi Ƀôn Dảng Ha Ya Bình, dŏ ƀơi plơi Dă Chaih, să Dă Nhim, tơring glông Lạc Dương, tơring čar Lâm Đồng brơi thâo, pơkă dưm dưm rim boh sang anŏ mơnuih ƀôn sang dưi wai lăng 25 hektar, hăng rơnoh apah hơdôm anai, lu sang anŏ mơnuih ƀôn sang djuai ƀiă amăng tơring glông dưi pơklaih mơ̆ng ƀun rin, pơblih pơđĭ tui tơlơi hơdip mơda.

“Đang hmua lĕ ƀu hơmâo ôh, kâo ră anai hơdip mă bruă kơnang kơ bruă wai pơgang glai rưng. Hlâo adih prăk apah ƀiă đơi kơnong 60 rơbâo prăk đôč, ră anai mơ̆ng 40-50 klăk prăk sa thun mơak yơh hŏ. Yua kơ anun, kâo pô gir run lu hloh ngă hiư̆m pă ngă bruă wai pơgang glai rưng hăng tong ten amăng bruă anai, hăng adơi ayong amăng Khul wai lăng glai rưng ăt gir run hloh wai pơgang kyâo glai tong ten hloh, hơmâo prăk pơhrui glăi hơđong, kiăng ngă klă bruă kơnuk kơna jao kơ ta”.

Rơngiao kơ djop anom bruă bơwih ƀong huă sĭ mơdrô, bruă jao wai pơgang glai rưng, tơring čar Lâm Đồng ră anai hơmâo 28 boh sang bruă kơnuk kơna pô ngă wai pơgang glai rưng, 3 boh plơi pla tơring mơnuih ƀôn sang wai lăng, 4 khul anom bruă, giăm 1.500 boh sang anŏ dưi jao lŏn glai pioh wai lăng. Hrŏm hăng anun, hơmâo năng ai 13.000 boh sang anŏ tŭ mă wai pơgang glai rưng hăng tŭ mă prăk apah wai lăng glai rưng, lu kơ sang anŏ mơnuih ƀôn sang djuai ƀiă. Tui hăng ơi Đinh Hữu Đạo, Kơ-iăng Khua wai lăng glai klô akŏ hlâo ia Dă Nhim, bruă ngă tui jơlan hơdră apah wai pơgang glai rưng djru kơ mơnuih ƀôn sang hơmâo prăk pơhrui glăi hơđong laih anun pơđĭ tui tơlơi glăm ba, gơgrong prong amăng plơi pla djru hrŏm wai pơgang lŏn mơnai glai klô kiăng huăi apui ƀong amăng glai. Mrô tơlơi soh glăi hăng đơ đam lŏn glai arăng kơsing mă ăt hrŏ hĭ mơ̆n.

“Tui hăng jơlan hơdră jao wai pơgang tui hơdră apah prăk pơgang ayuh hyiăng hơdôm thun giăm anai hơmâo pơjing rai rơnoh pơhrui glăi djop ngă hơđong tơlơi hơdip mơda mơnuih ƀôn sang ƀong huă rim hrơi. Rơnoh prăk pơhrui glăi mơnuih ƀôn sang hơdai rum hrŏm djop khul grup, mơnuih djru  bruă hyu tir, ĕp lăng amăng mlam hăng tơhrơi. Sit ƀuh arăng jah drôm, phă glai, kơsing mă lŏn glai nao lăi pơhmư̆ hăng anom bruă kơnuk kơna hơmâo tơlơi dưi pơsir hmao kru. Amăng bơyan phang thun 2023-2024 ƀơi kual wai lăng glai rưng yua mơnuih ƀôn sang ngă pô huăi hơmâo tơlơi răm ƀăm pơpă ôh, anun lĕ yua hơmâo mơnuih ƀôn sang wai lăng tong ten, sit ƀuh apui jă nao hơprah thăm tañ laih anun bơjak iâu amăng khul nao djru hrŏm pơsir hmao kru”.

Lâm Đồng hơmâo đơ đam lŏn glai prong truh 538 rơbâo hektar, rơnoh kyâo tơ-ui hơmâo 54%. Amăng mrô anai, hơmâo giăm 400 rơbâo ha glai rưng dưi apah prăk bruă pơgang glai rưng, dưm dưm hăng 75% đơ đam lŏn glai amăng tơring čar. Kơ bruă tŭ mă lŏn glai pioh wai pơgang hăng dưi tŭ mă prăk djru mơ̆ng bruă pơgang glai rưng ƀu kơnong pơsir ngă hơđong tơlơi hơdip mơda mơnuih ƀôn sang đôč ôh, dŏ djru yom biă mă amăng bruă pơgang hăng pơđĭ kyar kông ngăn lŏn glai anăp nap ngă hơđong amăng bruă pơgang glai rưng ƀơi tơring čar.