Nai Kpă Pual brơi thâo, bưng bôt ba ñu jing pô đing nao lu bruă kơsem min bôh pơhiăp Jarai lĕ amăng thun 2008, Sang hră Đại học Tây Nguyên pok mrô Gơnong bruă pơtô pơhrăm gưl sa tơlơi Jarai. Anai lĕ bruă phrâo, hmâo tơhnal phara akă hmâo nai pơtô. Nai Kpă Pual dưi hmâo Gơnong bruă pơtô pơhrăm tơring čar Gia Lai lăi pơthâo ngă nai lăng tui kơ Sang hră Đại học Tây Nguyên; pơtô pơhrăm brơi rah kơ nai pơtô kơ sang hră, pơtô pơblang rah kơ čơđai gưl dlông. Tơdơi kơ anun, ñu dưi hmâo Ding jum pơtô pơhrăm dêh čar jak iâo gum hrŏm čih hơdrôm hră pơtô tơlơi Jarai mơ̆ng anih 1 truh anih 5. Hrŏm hăng anun, Anom kơsem min bruă pơtô pơhrăm (Ding jum pơtô pơhrăm dêh čar) jak iâo gum hrŏm kơsem min, čih Hơdrôm hră pơtô pơhrăm dua bôh pơhiăp hluai tui tơlơi amĭ ba ama pơjing (tơlơi Jarai), Hơdrôm hră pioh yua  kơ Jơlan hơdră pơhlôm kơjăp bruă pơtô pơhrăm ƀơi sang hră (SEQAP)...

 “Drơi pô kâo lĕ hrăm gah bruă pơtô jŭ yap, samơ̆ kâo ƀuh tơlơi Jarai pô ăt dô̆ ƀiă mơnuih kơsem min hơduah ep dơlăm, yua anun kâo ăt hyu hơduah ĕp lăng mơn, djă pioh kiăng djă lui hăng bôh than lĕ pioh pơtô glăi kơ rơnuk tơdơi anai dong. Kâo ƀuh bôh thâo djuai ania Jarai dô̆ lu anô̆ klă hiam mơ̆ ƀiă mơnuih kiăng hơduah ĕp ñu pioh djă lui. Kâo ăt čang rơmang mơn ƀu djơ̆ kơnong drơi jăn kâo pô đôč ôh mơ̆ hơdôm mơnuih thâo hluh kơ bôh pơhiăp Jarai tâ̆o hloh gum hrŏm kơsem min lăng tŭ ư hrŏm đah mơ̆ng huăi rơngiă tui bôh thâo phiăn juăt mơ̆ng djuai ania pô”.

 Tơkeng rai hăng prong đĭ mơ̆ng plơi pla, kơjăp bruă lơm pơhrăm, anun lơm pơtô pơblang, kơsem min, čih hơdrôm hră, nai Kpă Pual hmâo mă yua tơlơi hơdip djuai ania Jarai klă. Biă ñu, hơdôm tơlơi pơhiăp, hơdôm tơlơi pơtưh, tơlơi akhan mơ̆ng djuai ania Jarai dưi hmâo ñu ba mut amăng hơdrôm hră pơtô pơhrăm, kiăng djru djă pioh gru grua bôh thâo đưm djuai ania pô.

 “Hơdôm tơlơi čih, hơdôm glông pơhiăp, tơlơi pia ƀing gơmơi čih glăi lĕ pioh djă lui, leng kơ sit nik amăng tơlơi hơdip mơda mơ̆ng neh wa djuai ania Jarai. Anun lĕ hơdôm glông pơhiăp ruah mă mơ̆ng tơlơi hơdip ƀơi plơi pla, hơdôm tơlơi akhan mơ̆ng đưm đă tŭ yua pơtô pơhrăm prong. Amra mă yua hơdôm glông pơhiăp amăng tơlơi hơdip rim hrơi, lăi kơ hơdră djă pioh bruă mă đưm… abih bang hơdôm tơlơi anun ƀing gơmơi čih pioh kiăng pơtô glăi kơ rơnuk tơdơi anai”.

Kpă Pual lu thun mă bruă gah gơnong bruă pơtô pơhrăm hăng kual tơnap tap Krông Pa, Gia Lai. Blung a kơnong kơ gum hrŏm amăng tal hrăm phun sư phạm 1 thun đôč tơbiă pơtô čơđai, tơdơi kơ nao hrăm Trung cấp sư phạm ƀơi Kon Tum. Tơdơi kơ hrăm giong, pơwot glăi pơtô ƀơi plơi pla ñu dô̆ hmâo 3 thun, ñu rơkâo hrăm đĭ gưl dlông dong, hrăm rah mă bruă rah ƀơi Quy Nhơn. Lơm mă bruă, ñu hmâo rơbêh 10 thun ngă Khua sang hră, laih anun ngă Kơ-iăng Khua Anom bruă pơtô pơhrăm tơring glông Krông Pa, tơdơi anai dưi brơi nao mă bruă gah Gơnong bruă pơtô pơhrăm tơring čar Gia Lai, ngă Khua Grŭp pơtô pơhrăm djuai ania. Samơ̆ tơdơi kơ anun, nai Kpă Pual rơkâo glăi pơ̆ plơi pla pô, ngă nai pơtô čơđai truh kơ pơdơi lơtret.

  “Pơdơi lơtret samơ̆ ƀu pơdơi bruă ôh”, ră anai glăi pơ̆ plơi pla, samơ̆ nai Kpă Pual ăt kơsem min, gum hrŏm mơn khul pơsit hơdrôm hră hrăm tơlơi Jarai mơ̆ng Ding jum pơtô pơhrăm dêh čar, hrŏm hăng anun gum hrŏm pơtô pơblang hơdôm tal pơtô pơhrăm tơlơi Jarai kơ mơnuih mă bruă čar ƀơi plơi pla:

 “Bruă djă pioh bôh pơhiăp Jarai yôm phăn, amăng hơdôm tơlơi pia pioh pơhiăp lăi nao tơlơi phiăn ƀudah hơdôm tơlơi pia pơtă pơtăn kiăng pơtô lăi ană amôn lĕ khom mă yua hăng bôh pơhiăp Jarai ñu mơ̆ng dưi lăi dơlăm tơlơi lăi pơthâo. Lơm hơduah ĕp ƀing gơmơi ăt hmâo mă yua mơn dua tơlơi pơhiăp, djơ̆ anô̆ ñu tơlơi Yuan ăt ƀu pơblang tum djop mơn bôh pia mơ̆ng ñu, yua anun khom pioh hơnong tơlơi Jarai anun kah mơ̆ng dưi lăi pơthâo bôh pơhiăp kiăng lăi mơ̆ng mơnuih đưm kiăng lăi pơthâo”.

 Kiăo tui hăng bôh hră, nai Kpă Pual jing gru ba jơlan hlâo amăng pran jua hor, hur har pơtô glăi tơlơi Jarai kơ rơnuk tơdơi anai./.