Ƀu kiăng iâo telephone kơ rim čô mơnuih, ƀudah nao tơl sang mơnuih ping gah pioh lăi pơthâo hrơi mông jơnum ping gah ăt kah hăng hơdôm bruă kiăng pok pơhia, ră anai, kơnong kơ grŭp Zalo, ơi Lò Văn Oai, khua git gai Ping gah ngă rah khua plơi Mạt, să Mường Lèo, tơring glông Sốp Cộp, Sơn La amuñ amĕ iâo tum pơƀut mơnuih ping gah.

 “Akă dưi pơtô pơhrăm bruă mă yua măi mok, samơ̆ ƀing gơmơi ăt gir run blơi mơn 1 bôh măi kompiutơr, 1 bôh măi in tơglit pioh pơhrăm tui ƀơƀrư̆. Grŭp ping gah ƀing gơmơi hmâo pơdŏng hăng tum pơƀut hmâo 31 čô mơnuih amăng grŭp ƀơi grŭp Zalo, rơngiao kơ mơnuih ping gah thun tha amra lăi pơthâo tui hơdră pơkon. Hmâo grŭp Zalo mơ̆ng grŭp ping gah ră anai, lăi pơthâo hrơi jơnum kơ mơnuih ping gah hăng sa dua bruă mă pơkon ăt gêh gal hloh mơn”.

Tơlơi jơnum mơ̆ng Grŭp ping gah plơi Mạt ăt ƀơƀrư̆ pơplih tui mơn mơ̆ng hrơi khua git gai ping gah thâo mă yua măi mok. Hơdôm bôh yôm git gai, črâo ba amăng pơdŏng plơi pla phrâo, pơplih hơdră phun pla, hlô rông hlâo adih bưp tơnap gah hơdră ngă lĕ, ră anai hăng bôh thâo hmâo, măi mok mă yua mơ̆ng internet.

Plơi Mạt, să Mường Lèo hlâo adih tơnap tap, ră anai neh wa thâo mă yua bôh thâo phrâo măi mok amăng bruă ngă đang hmua, ngă rơbêh kơ 50 ektar hmua pơdai, 25 ektar đang hơbơi plum, 25 ektar đang phun bôh; rông giăm truh 4.000 drơi hlô; pơdŏng hmâo 2 bôh Anom mă bruă hrŏm gah đang hmua... mrô sang anô̆ ƀun rin, ƀun rin ƀơƀiă mơ̆ng plơi kơnang kơ anun hrŏ trun lu, truh ră anai kơnong kơ dô̆ 6%. Amai Lường Thu Hương, mơnuih ping gah plơi Mạt lăi pơthâo:

 “Kâo mă yua bôh thâo phrâo măi mok, hrăm tui dong amăng plăng internet hơdră rông rơmô, kơbao, tơjŭ pla pioh hmâo lu gơnam pơhrui glăi, prăk pơhrui glăi. Hăng mơnuih ping gah kâo ăt ngă tui mơn bruă mă, pơtô glăi kơ neh wa hơdră rông hlô ba glăi bôh tơhnal prong”.

Hơdôm tơlơi ruai klă, hơdră ngă ba glăi bôh tơhnal pioh pơđĭ kyar bơwih ƀong, pơdŏng plơi pla phrâo mơ̆ng lu anih anom, lu djuai ania... dưi hmâo khua git gai ping gah, khul grŭp gưl ping gah hăng mơnuih ping gah mơ̆ng plơi lăi pơthâo klă amăng plăng lăi pơhing, hơdôm khul, grŭp. Ơi Giàng A Dệnh, Khua git gai Ping gah ngă rah Khua plơi Sam Quảng lăi:

 “Lăng amăng plăng face book ăt hmâo mơn lu tơlơi čih klă kơ mơnuih ping gah ngă gru hlâo, gru mơnuih klă mă bruă klă, kâo lăi pơthâo truh mơnuih ping gah amăng grŭp ping gah. Ƀơi jơlan pơdah rŭp hăng hơdôm gơnam pôr pơhing lĕ ăt hmâo hră tui, mă yua bôh thâo phrâo amăng bruă ngă đang hmua; gưl ping gah ăt hmâo kơsem min mơn, hơduah ĕp, hrăm tui pioh ba mut amăng pok pơhai kơ mơnuih ƀôn sang”.

Ơi Phan Thanh Lăng lĕ mơnuih apăn bruă tơring glông, dưi pơpha nao mă bruă ngă Khua git gai Ping gah să guai dêh čar tơnap tap Mường Lèo, tơring glông Sốp Cộp, tơring čar Sơn La brơi thâo: Ping gah să hmâo pơsur laih hơdôm grŭp ping gah blơi măi kopiutơr, pioh mă bruă, mă bruă hrŏm. Truh ră anai, 10/17 grŭp ping gah să hmâo măi kompiutơr; ƀing khua git gai ping gah leng kơ gơgrong hlâo hyu hơduah ĕp, hrăm tui pioh mă yua măi mok amăng črâo ba git gai. Hrŏm hăng anun, Ping gah să ăt lăi pơthâo truh mơn khul mơnuih apăn bruă, mơnuih mă bruă čar, mơnuih ping gah ngă tui hơdôm bruă klă mơ̆ng măi mok.

 “Kâo hmâo črâo ba mơnuih apăn bruă, mơnuih mă bruă čar lăi pơthâo tum djop hơdôm mrô mă yua amăng plăng face book, hơdôm grŭp Zalo pioh ngă hiưm hơpă hmâo bruă gơgrong amăng mă yua hăng gêh gal amăng wai lăng mơ̆ng gưl dlông. Lăi pơthâo klă tơlơi pơhing mơ̆ng hơdôm plăng sit nik mơ̆ng hră pơhing, gong phun pôr pơhing, plơi pla; lăi pơthâo ƀu dưi pôr hơdôm tơlơi pơhing akă dưi pơsit brơi, tơlơi pơhing ƀu klă, ƀu djơ̆... ngă ƀu mơ-ak mơnuih lăng, tơlơi pơmin ƀu klă, ngă tơdu pran đăo gơnang hăng mơnuih mơnam, hăng Ping gah, Kơnuk kơna. Hrŏm hăng anun, pơsur hơdôm grŭp ping gah čơphin rup, video kơ hơdôm bruă mă klă mơ̆ng plơi, grŭp ping gah, mơ̆ng hơdôm bruă mă anet hloh. Tui jơlan gah lĕ mă anô̆ hiam, pơgăn anô̆ sat”.

Kơnang kơ mă yua măi mok, ngă tui klă mơ̆ng plăng face book, ƀing mơnuih ping gah ƀơi să guai dêh čar Mường Lèo, tơring glông Sốp Cộp, Sơn La hơkrŭ glăi hơdôm mơta tơlơi tơnap ƀơi plơi pla lơm pơdŏng plơi pla phrâo kah hăng: anih anom ataih, anih mơnuih ƀôn sang dô̆ hui, bôh thâo mơnuih ƀôh sang hrăm hră ƀu dưm kơnar, tơlơi pơmin ƀu dlông, amuñ hmâo arăng la mă, blơi mă, hmư̆ tui tơlơi đăo hling hlang akă hmâo mơ̆ng hlâo ƀu hmâo kơnuk kơna brơi. Mơ̆ng anun brơi ƀuh bruă mă ba jơlan hlâo ngă gru mơ̆ng mơnuih ping gah dưi pơdah amăng djop bruă mă./.