VOV4.Jarai - Hơdôm hrơi rơgao yôm phăn, amăng tal pơdơi lơphet 30/4 hăng lơ 1/5 phrâo anai, hơdră tuai čuă lăng bôh thâo mơng djop djuai ania hơđăp hăng hơdôm bruă mă pha ra, phrâo hnuă hmâo ngă pơhư̆č laih tuai čuă lăng. Ƀơi Daklak, hơdră anai glăk pơdah jơlan nao ba glăi bôh tơhnal kơ djuai ania ƀiă mă bruă wai lăng tuai čuă ngui đam ƀơi plơi pla pô:

Hơdôm bruă mă hơduah ĕp găn rơgao lăng bôh thâo mơng djop djuai ania hơđăp ƀơi plơi prong Buôn Ma Thuột ƀrô djơ̆ tal pơdơi lơphet thun anai hmâo: pơdah tơlơi pĕ gông atông brô đưm, bruă mă tui juăt đưm; bơkơtuai nao rai tơlơi adôh suang djuai ania Dăp Kơdư, lăng bôh thâo mơñum tơpai čeh, ƀong gơnam ƀong huă đưm hăng hơdôm phiăn juăt gru grua mơng djuai ania Êđê. Ayong Lê Ngọc Tân, tuai hyu čuă ngui mơng ƀôn prong Hà Nội, gum hrom ngă yang rơkâo tơlơi suaih pral tui phiăn juăt djuai ania Êđê ƀơi ƀôn Tơng Jŭ, să Ea Kao, lăi pơthâo:

“Tal blung a kâo gum hrom ngă yang rơkâo tơlơi suaih pral mơ-ak biă hăng ăt mưn ƀuh mơn Tơlơi jơnum ngui mơng neh wa ƀơi anai pơpŭ biă. Hmâo lu tơlơi akă ƀuh mơng hlâo adih mơng băn ao mơng neh wa djuai ania ƀơi anai, mơng ƀing đah rơkơi ƀudah đah kơmơi ƀudah hmâo hơdôm bôh čing hơgor, jua gông brô̆ ƀudah hmâo hơdră pơdă prưng, ƀudah hmâo hơdôm tơlơi ngui ngor pha ra hăng mơnuih ƀơi plơi prong jưh jom Hà Nội ƀudah djuai ania Yuan anun. Hmâo lu tal blung a lăng ƀuh, samơ̆ ăt čang rơmang hmâo lu tal pơwot glăi pơ̆ anai kiăng lăng ƀuh tơlơi ngă yang jơnum ngui mơng neh wa tañ hloh hăng dưi lăng ƀuh abih bang hloh”.

Pơdah tơlơi adôh suang hăng pĕ gông atông brô̆ đưm

Yă H’ Yam Buôn Krông, Khua grŭp wai lăng tuai čuă ngui plơi pla Tơng Jŭ, să Ea Kao brơi thâo, hrom hăng pơdah glăi phiăn ngă yang rơkâo tơlơi suaih pral tui phiăn juăt, amăng tal ngă yang thun anai, ƀơi kual tuai čuă lăng plơi pla Tơng Jŭ dô̆ pơphun pơplông tơnă hơbai pioh kơ mơnuih amăng khul đah kơmơi să Ea Kao gum hrom. Ƀing adơi amai ƀơi rim bôh plơi pla pơdŏng sa grŭp pơplông, prăp lui jơngua asơi añăm hăng hơdôm gơnam ƀong tui phiăn juăt đưm mơng djuai ania pô. Hrom hăng pô pơ ala mơng khul đah kơmơi, ƀing tuai nao čuă lăng ƀơi kual tuai čuă lăng plơi pla ƀơi anai amra ƀong lông lăng hăng čom puang gơnam ƀong mơng hơdôm grŭp. Anai lĕ bruă mă kiăng pơlar bruă wai lăng tuai čuă lăng plơi pla ƀơi plơi prong.

“Ăt hmâo mơn lu grŭp tuai mơng hơdôm bôh tơring čar rai pơ̆ anai ƀong ngui hơdôm mơta añăm mơng neh wa laih anun atông čing hơgor, laih dong ngă lông lăng hơduah ĕp kơ bôh thâo mơng djuai ania ƀơi plơi pla. Ƀing gơmơi ăt pơha mơn rim mơnuih rim mơta bruă, bơhmutu ñu sang pla añăm, sang rông un, sang rông mơnŭ, laih anun sang đĭ kŏng tơpai čeh”.

Mơñum tơpai čeh

Ƀơi sa dua anih anom pơkon kah hăng ƀơi Sang djă pioh gru grua Daklak, ƀuôn Akŏ Dhông, tuai dưi hơduah ĕp lăng bruă mơñăm bung bai, pơkra gông brô̆ mơng kram djrao hăng hơdră mơñum tơpai čeh mơng djuai ania Êđê. Ayong Hàng A Chu, djuai ania Hmông, ƀơi tơring glông Dăk Glong, tơring čar Daknông, gum hrom kŏng lăng tơpai čeh đưm sa rơtuh thun brơi thâo:

“Phiăn juăt mơng mơnuih ƀôn sang ƀơi anai pha ra biă hăng djuai ania pô hăng pô jai thâo lu dong, lu mơta tơlơi. Rơđah biă ñu tơpai čeh, ñu pha ra hăng djuai ania pô, ƀudah kah hăng gơnam ƀong huă ăt pha ra mơn, ñu pha ra abih bang. Hmâo hơdôm tơlơi pô rai pơ̆ anai kah mơng dưi tơña, dưi thâo lu tơlơi”.

Pơdah bruă mơñam bung bai hăng pơkra gông brô̆

Tơdơi hơdôm hrơi bơbeč mơng klin Covid-19, hơdôm anih anom tuai čuă lăng plơi pla ƀơi plơi prong Buôn Ma Thuột hmâo pok glăi laih bah amăng hăng lu bruă mă lu mơta. Amăng anun, tuai čuă lăng bôh thâo djop djuai ania hơđăp ƀơi anai jing tơlơi pha ra mơng plơi prong, dưi ngă phrâo, ngă dơlăm dong tơdơi kơ rim thun, kiăng rim tal pơ̆ anăp anai, tuai glăi hmâo dong tơlơi lông lăng lu mơta. Hăng neh wa ư-ang ƀu tlaih ôh hăng hơdôm gru grua bôh thâo djuai ania pô lăi pơthâo hăng tuai čuă lăng anô̆ hiam plơi pla./.

H’Xíu: Čih – Siu H’ Prăk: Pơblang