Hơdôm bôh sang anô̆ tŭ ư hăng tơlơi rơngiă lŏn hăng kông ngăn pioh pơkra hơdôm ară jơlan amăng krah plơi pla, să, pơjing pran pơtrut kiăng pơđĭ kyar bơwih ƀong – mơnuih mơnam, pơdŏng plơi pla phrâo kơ plơi pla.

Hơdôm hrơi giăm Tết tui phiăn juăt 2023, rơkơi bơnai ayong Trần Ngọc Vũ ƀơi thôn 10, să Tâm Thắng, (Čư̆ Jut), yŭ ngŏ đuăi nao pơ̆ kual hmua prong 5 ektar mơng sang anô̆ kiăng rit pơga (war), koh lui lu phun kơ phê, tiu jao lŏn kơ anom pơkra jơlan. Ayong Trần Ngọc Vũ lăi pơthâo, dưi lăi pơhing pơsur, rơkơi bơnai ñu tŭ ư pĕ pha rơbêh kơ 11.000 m2 lŏn, koh lui 300 ƀĕ phun kơ phê, 250 ƀĕ tơmeh tiu glăk hmâo bôh pioh pơkra jơlan nao rai. Abih bang nua lŏn hăng kông ngăn đĭ giăm truh 2 klai prăk. Anai lĕ kông ngăn prong hloh. Khă hnang blung dua gơñu ƀuh hơ-ưi hai, samơ̆ pơmin ataih ƀiă, bruă pĕ pha lŏn pơkra jơlan lĕ hơdră pơtrun djơ̆ mơng Kơnuk kơna, hơdôm anô̆ gun hmâo ƀơƀrư̆ dưi pơtlaih tui laih. Ayong Trần Ngọc Vũ pơdah pran jua:

 “Sang anô̆ dưi hmâo Gong gai plơi pla ăt kah hăng pô pơ ala kơ Grŭp lăi pơhing pơsir lŏn mă yua pơkra jơlan nao tơl sang pơsur pĕ pha lŏn pơkra jơlan. Rơkơi bơnai ƀuh tŭ yua sui thun mơng bruă pĕ pha lŏn, yua kơ pĕ pha giong hmâo jơlan găn nao rai, neh wa nao rai gêh gal, pơgiăng gơnam tam amuñ amĕ hloh, ƀô̆ mơta plơi pla amra hmâo lu tơlơi pơplih phrâo. Ƀuh hơdôm bôh yua tui anun lĕ sang anô̆ tŭ ư”.

  Ăt anăp nap bruă pĕ pha lŏn pơkra jơlan mơng să Tâm Thắng mơn, ayong Lê Anh Tuấn ƀơi thôn 8 hmâo pĕ pha rơbêh kơ 2000 m2 lŏn hăng 50 ƀĕ phun kơ phê, 70 ƀĕ gong tiu. Abih bang nua ñu lŏn hăng kông ngăn hmâo jao truh 700 klăk prăk. Ayong Lê Anh Tuấn brơi thâo, pô pơ ala kơ Jơnum min mơnuih ƀôn sang să pơblang bruă Kơnuk kơna kơnong pơhlôm tuh pơplai pơpha djop prăk pơkra jơlan, bruă pơsir lŏn pioh pơkra jơlan ƀu dưi pơpha. Yua anun, tơdah mơnuih ƀôn sang ƀu gơgrong mă pĕ pha lŏn thơ jơlan nao rai tơnap mơng dưi pơkra jing. Mơng hơdôm tơlơi tơnap anai, sang anô̆ tŭ ư pĕ pha lŏn pioh pơkra jơlan.

 “Grŭp lăi pơhing truh bruă pơsur, pơtrut ba tơbiă bôh tŭ yua mơng bruă pĕ pha lŏn pơkra jơlan hăng pơđĭ tui kơ plơi pla, drơi pô sang anô̆ ăt ƀuh mơn tơlơi khom tŭ ư. Jơlan nao rai sang ta hlâo adih anet, glut hlŭ amăng bơyan hơjan, ră anai hmâo Kơnuk kơna tuh pơplai pơkra jơlan prong pioh mơnuih ƀôn sang nao rai lĕ mơ-ak biă. Hmâo Jơlan prong găn sang pô anô̆ rơngiă ƀơi anăp huăi hơget ôh, tơdơi anai amra dưi ĕp hmâo, drơi pô sang pô amra pĕ pha lŏn pơkra jơlan, bôh tŭ yua hrom hiưm lĕ”.

 Ngă tui hơdră pơtrun mơng Khul pơ ala mơnuih ƀôn sang tơring glông Čư̆ Jut, Jơnum min mơnuih ƀôn sang tơring glông hmâo pơpha prăk pơkra jơlan wer să ataih 7,5 km, tô hơdôm bôh să Tâm  Thắng, tơring kual Ea Tling hăng să Trúc Sơn. Jơlan dưi pơkra mơng blan 10/2022 hăng pơkă hlâo krah thun 2024 lĕ pơkra giong mă yua. Amăng Tơlơi pơtrun pơsit mơng Khul pơ ala mơnuih ƀôn sang tơring glông lăi rơđah, yua kơ tơnap gah ngăn rơnoh, Jơnum min mơnuih ƀôn sang tơring glông amra pơpha djop prăk pơkra, črăn mă yua lŏn pơkra jơlan jao kơ hơdôm bôh să, tơring kual gơgrong hlâo lăi pơhing pơsur mơnuih ƀôn sang pĕ pha lŏn ngă tui.

  Ơi Trần Thế Quang – Khua git gai Ping gah să Tâm Thắng brơi thâo, jơlan găn să ataih 3,2 km. Kiăng rơwang bruă pok pơhai tui kơčăo bruă, Ping gah să pơdŏng Grŭp djru bruă ngă tui lăi pơhing pơsur hơdôm dang anô̆ hmâo lŏn amăng kual rơwang bruă pĕ pha lŏn pioh pơkra jơlan. 65% kual lŏn dưi pơsir giong, dô̆ 35% dong amra dưi ngă tui pơ̆ anăp anai. Črăn jơlan găn să Tâm Thắng amra hluh gah jơlan hlâo kơ lơ 3/2. Abih bang mrô prăk pĕ pha lŏn mơng mơnuih ƀôn sang giăm truh 12 klai prăk. Bruă pĕ pha lŏn, phun kyâu, kông ngăn pơkra jơlan mơng mơnuih ƀôn sang hluai tui pran jua gơgrong mă pô. Ơi Trần Thế Quang lăi:

 “Ƀing gơmơi pơblang kơ mơnuih ƀôn sang ƀuh lom hmâo hơdôm jơlan nao rai pok tơbiă phrâo găn nao lĕ, tơdơi kơ hmâo jơlan phrâo pok nua lŏn amra dưi pơđĭ tui. Tơlơi pơtrun pơsit Jơnum min mơnuih ƀôn sang tơring glông ăt hmâo mơn hơdră djru amra ba ƀơƀrư̆ amăng kual pơkă mă yua lŏn dô̆ lom ƀuh djơ̆, hăng ƀu kiăng nô̆p djop mơta prăk apah hơpă lom pơplih Hră mă yua lŏn. Tơlơi anai kiăng bĕ tơlơi mơnuih ƀôn sang hmâo pĕ pha lŏn laih huăi kiăng nôp prăk apah pơ ala kơ ngă tui bruă nôp prăk kiăng ngă glăi hră tŭ yap mă yua lŏn”.

 Tui hăng ơi Nguyễn Anh Tú, Khua Jơnum min mơnuih ƀôn sang tơring glông Čư̆ Jut, bruă pĕ pha lŏn, phun kyâu, phun pla hăng kông ngăn pơkra jơlan hơdôm thun rơgao ƀu djơ̆ kơnong kơ pơphun ƀơi să Tâm Thắng ôh mơ̆, kah hăng ƀơi abih bang hơdôm bôh să, tơring kual amăng tơring glông. Bruă mơnuih ƀôn sang pĕ pha lŏn hơdôm rơbâo m2 lŏn hmâo nua hơdôm pluh klai prăk pơkra jơlan hmâo laih hăng glăk djru klă amăng tơhnal pơkă kơ tơhnal truh akô̆ tơring glông plơi pla phrâo mơng Čư̆ Jut amăng thun 2025./.