VOV4.Jarai-Dak Buk So lĕ să guai dêh čar gah tơring glông Tuy Đức, sa amăng 2 boh tơring glông ƀun hlon tơring čar Dak Nông dưi tŭ mă hơdră djru 30a mơ̆ng kơnuk kơna. Ră anai, mơnuih ƀôn sang djuai ƀiă kual giăm guai dêh čar anai hlăk gum hrom pran jua pơđĭ kyar bơwih ƀong huă mơnuih mơnam, gir run kiăng Dak Buk So tañ jing să blung a mơ̆ng tơring glông ngă giong plơi pla phrâo.

Amăng sang phrâo pơdong hiam, agaih gông, tha plơi ơi Điểu Gay, dŏ pơ ƀôn Bu Ndrung, să Dak Bu So, tơring glông Tuy Đức, hok mơak čơkă tuai nao ngui. Jing mơnuih ba jơlan hlâo mơtam amăng bruă bơwih ƀong huă ƀơi kual giăm guai dêh čar, ñu ră ruai, ră anai tha rơma, pơai buai ƀu anăm nao pơ hmua ia djuh dơ̆ng tah, anun ñu pơpha abih đơ đam hmua đang kơphê kơ ană bă, sa čô ngă 2 ha. Ră anai, ñu ăt ngă hrom hăng lu anom bruă khul mơnuih mơnam amăng să, tơring glông pơtô mơnuih ƀôn sang anăm hmư̆ ƀing soh sat plư, anăm hyu sĭ lŏn hmua, lŏn sang ôh khom hrăm tui hơdră pla kơphê, tiu brơi mơboh lu, gir run bơwih ƀong huă kiăng pơklaih mơ̆ng tơlơi tơnap tap.

"Ƀuh rơđah tơlơi hơdip mơda mơnuih ƀôn sang djuai ania Mnông pơ ƀôn Bu Ndrung anai dŏ lu tơlơi tơnap tap đôč, mơnuih ƀôn sang aka thâo hluh lu ôh, pơđĭ kyar bơwih ƀong huă anun yơh tơnap tap biă mă. Tui hăng kâo pơmin abih bang adơi ayong djuai ania Mnông pơ ƀôn Bu Ndrung, Bu Boong ƀing ta lêng kơ hơmâo sa tơlơi kiăng đôč, mơ̆ng mơnuih apăn bruă kơnuk kơna djop gưl khom jak iâu, pơtô lăi brơi ană plơi pla thâo kah dưi, kơnong hơjăn kâo tha plơi hyu jak iâu ƀu anăm ôh, khom pơtô pơblang, pơčrâo ba pơtrut ană plơi pla lĕ aka djop ôh. Jak iâu pơčrâo ba ngă hrom, gơñu ƀuh boh tŭ yua kah mơ̆ng hmư̆ hiăp ta laih anun hla tui”.

Ƀôn Bu Ndrung, să Dak Bu So

Tui hăng ayong Điểu Lim, Khua plơi Bu Boong, tơlơi tơnap mơ̆ng mơnuih ƀôn sang lĕ ngă hmua pla kơphê, pla tiu kơnang kơ rơnoh sĭ mơdrô mơ̆ng anih sĭ mơdrô blơi đôč. Khă tui anun, hăng tơlơi djru mơ̆ng kơnuk kơna laih anun djru hrom pran jua mơnuih ƀôn sang pô dơ̆ng, jơlan glông nao rai ƀơi kual guai dêh čar anai aka ngă giong ôh, anun tơlơi hơdip mơda mơnuih djuai ania Mnông ăt ƀrư̆ hrơi pơblih tui laih.

“Bruă pơkra jơlan nao rai amăng plơi pla, lui rơmŏn kŏn rin brơi kơ mơnuih ƀôn sang lĕ sa tơhnal pơkă man pơdong plơi pla phrâo, mơ̆ng anun pơđĭ tui tơlơi hơdip mơda kơ mơnuih ƀôn sang dưi pơđĭ kyar hloh. Kiăng dưi ngă djop tơhnal pơtrun anun, mơnuih ƀôn sang khom thâo gum pơgôp, djru nao rai amăng tơlơi hơdip mơda, mơ̆ng bruă pok jơlan amăng plơi, truh pơ bruă pơđĭ kyar ngă hmua, pla tiu, kơphê, djru hơdôm sang anŏ ƀun rin tơnap tap…”.

Sa tơlơi ƀuh pơblih biă mă ñu amăng bruă man pơdong plơi pla phrâo ƀơi Dak Bu So lĕ mơnuih ƀôn sang thâo pơblih tui tơlơi pơmin, hneč mă tơlơi gêh găl gru grua mơ̆ng djuai ania pok jơlan kơ tơlơi bơwih ƀong huă, bơwih brơi kơ tuai hyu ngui. Yă Phạm Thị Dung, Khua plơi Bu Ndrung, brơi thâo, plơi hơmâo akŏ pơjing grup ngă hrom bruă mă gru grua, ƀu kơnong pơsir bruă mă amăng mông wăn đôč ôh, dŏ hơmâo anŏ pơhrui glăi prăk kăk kơ mơnuih ƀôn sang dơ̆ng.

“Amăng hơdôm rơgao gơmơi ăt djă pioh grup atông čing, hăng akŏ pơjing grup ngă hrom tơnă asơi anih tơkong tơpai čeh, pơsir bruă mă ƀing adơi amai đah kơmơi amăng plơi, laih anun ƀing ơi tha, yă dôn lĕ thâo mơñam bai rơ-i čơkua, rêu ro, gơnam yua, mơñam mrai djă ngui ngă kơdung đơ đa. Ăt gir run pơgang pioh hăng pơđĭ tui rơnoh yôm gru grua hiam hăng bruă mă pơkra ming đưm gah djuai ania Mnông”.

Dak Bu So hlăk gir run ngă giong să plơi pla phrâo blung a mơ̆ng tơring glông Tuy Đức

Ơi Ngô Văn Thương, Khua jơnum min să Dak Bu So brơi thâo, truh ră anai, să hơmâo ngă giong 16/19 tơhnal pơkă plơi pla phrâo. Tơlơi hơdip mơda mơnuih ƀôn sang jai hrơi pơblih đĭ tui, pơhrui glăi pơkă dưm dưm thun 2021 truh 40 klăk prăk sa čô sa thun. Pơtrut bruă ngă tui hơdôm hơdră pơtrun mơ̆ng dêh čar, đing nao hlâo kơ plơi pla mơnuih djuai ƀiă, djru mơnuih ƀôn sang pơđĭ tui boh tơhnal ngă hmua pla pơjing anăp nao kiăng să Dak Bu So amra jing să blung a kual guai dêh čar tơring glông Tuy Đức ngă giong tơhnal pơtrun plơi pla phrâo amăng 3 thun pơ anăp.

“Să hơmâo 2 boh plơi hăng 1 boh ƀôn dŏ tơnap tap. Amăng bruă pơhrŏ ƀun rin hrom hăng bruă hyu pơtô pơblang jak iâu mơnuih ƀôn sang, anŏ djru mơ̆ng kơnuk kơna hăng lu hơdră ba glăi ăt gleng nao hlâo hloh kơ hơdôm boh plơi, ƀôn anai kiăng djru ană plơi pơtrut pơđĭ kyar bơwih ƀong huă. Mơta sa lĕ pơtô brơi hơdră ngă hmua pla pơjing, dua lĕ tuh pơ alin čuk pơkra jơlan nao rai, klâo lĕ tuh pơ alin hơdră bơwih ƀong huă tŭ yua pơlar kơ lu mơnuih ngă tui, pơđĭ tơlơi pơmin thâo bruă glăm ba hăng pơđĭ tui tơlơi hơdip brơi mơnuih ƀôn sang, biă mă ñu ƀơi hơdôm boh plơi kiăng pơhrŏ ƀun rin mơ̆ng tơring glông pơtrun”.

Đăo kơnang kơ anŏ tuh pơ alin phun mơ̆ng kơnuk kơna, tơlơi gir run mă pô mơ̆ng mơnuih ƀôn sang djop djuai ƀiă, să Dak Bu So amra tañ dưi ngă djop 19 tơhnal pơkă man pơdong plơi pla phrâo, jing să blung a amăng tơring glông Tuy Đức ngă djơ̆ tơhnal pơkă plơi pla phrâo.

Nay Jek: Pơblang