Tơdơi kơ 3 thun pơphun bruă mă hăng anăn “Êđê Café”, Y Pôt hơmâo ba gơnam sĭ mơdrô mơ̆ng ñu truh pơ anih anom sĭ mơdrô amăng dêh čar hăng ba sĭ mơdrô truh pơ lu dêh čar tač rơngiao amăng rŏng lŏn tơnah.

Mă bruă amăng gơnong bruă ia jrao mơ̆ng thun 2014, mah dŏ pơ ƀôn prong Hồ Chí Minh ƀudah glăi pơ Dak Lak hai, tơdăm djuai ania Êđê Y Pôt Niê ăt dŏ pơmin na nao kơ mơnâo tơpung kơphê hna mă pô pơ sang anŏ. Blan 8 thun 2019, Y Pôt pơsit pran jua lui bruă gah ia jrao, glăi ĕp bruă mă hăng sĭ mơdrô kơphê. Ñu akŏ pơjing sang bruă anăn Kông ty TNHH Êđê Café hăng dưi hơmâo anom bruă pơgang tơlơi pơčeh phrâo dêh čar čih anăn pơsit tơlơi dưi ngă pô kơ ñu.

Tơdơi kơ 3 thun akŏ pơjing sang bruă, anăn kơphê Êđê Café ñu ba sĭ mơdrô amăng dêh čar hăng dêh čar tač rơngiao arăng blơi tŭ; dưi hơmâo gong gai kơnuk kơna tơring čar tŭ yap jing gơnam sĭ mơdrô OCOP 4 asar pơtŭ. Pơblang glăi anăn kông ty ñu lĕ Êđê Café, Y Pôt Niê brơi thâo tui anai:

“Lăi glăi kơ djuai ania Êđê ta pô ƀiă đôč mơnuih ngă bruă sĭ mơdrô, kâo kiăng jing mơnuih kơsung nao hlâo sĭ mơdrô, dua dơ̆ng lĕ kiăng ba kơnuih mơ̆gn djuai ania Êđê, kiăng pơdah ta pô djuai ania Êđê dưi mơ̆n ngă bruă djop mơta anŏ ta kiăng hăng biă mă ñu djuai ania Êđê mơtam ba gơnam sĭ mơdrô mơ̆ng đưm ta juăt thâo brơi kơ djop anih amăng rŏng lŏn tơnah thâo. Truh hrơi anai, kâo hơmâo pơsit brơi laih tơlơi anun hăng jai hrơi lu mơnuih thâo kơ anăn kơphê “Êđê Café”.

Kiăng dưi djop kơphê asar pioh hna pơkra ming tơpung kơphê ba sĭ mơdrô, Y Pôt Niê ngă hrom hyu blơi kơphê mơ̆ng mơnuih ƀôn sang ngă hmua pla kơphê amăng kual hăng rơnoh pơmă hloh gah rơngiao 10.000 prăk/kg kơphê asar krô. Hrom hăng anun, ñu djru pơjêh boh sầu riêng, boh ƀơr kơ mơnuih ƀôn sang pla plah wah amăng đang kơphê, jak iâu mơnuih ƀôn sang pơblih hơdră pla kơphê, pruai lu đơi hơbâo jrao hlâo adih, brơi pruai nao hơbâo, kmơ̆k pruai hơdjă rơgoh. Truh ră anai, kông ty ñu hơmâo kual pla kơphê amăng mơnuih ƀôn sang truh 50 ha.

Kông ty ăt pơsir brơi bruă mă hơđong kơ hơdôm hơpluh čô hơmâo bruă mă na nao, hơđong, jing ƀing Êđê soh, hăng rơnoh prăk blan mơ̆ng 12-20 klăk prăk/sa blan. Ơi Y Phen Niê, Khua khul mơnuih ngă hmua să Dray Sap, brơi thâo, mơ̆ng bruă mă phrâo Y Pôt ba jơlan, bruă ngă hmua pla pơjing mơ̆ng mơnuih ƀôn sang ăt pơblih tui mơ̆n, tơlơi hơdip mơda ƀrư̆ hrơi đĭ tui:

“Hơbô̆ bruă lir hơbit grup ngă bruă mơ̆ng kông ty Êđê Café hơmâo lu mơnuih ƀôn sang ngă hrom, nao ĕp lăng tơña hơduah hrăm tui. Yua mơ̆ng anun yơh, hơmâo ba glăi lu boh tơhnal bơwih ƀong huă hăng pơhrui glăi mơ̆ng pla kơphê laih anun pơlir hơbit tong ten ngă gêh găl kơ bruă pơđĭ kyar ƀơi plơi pla”.

Rơngiao kơ gơnam sĭ mơdrô lĕ tơpung kơphê, Y pôt ăt hơduah ĕp, kơsem min pơkra rai lu mơta gơnam sĭ mơdrô, kiăng pơjing rai anŏ phara hơjăn păn mơ̆ng pô. Ră anai, ñu hơmâo pơkra ming sa djuai gơnam sĭ mơdrô mơ̆ng kơphê ngă hrom boh čroh hăng hơbơi pơtơi laih anun hơmâo lu tuai hor blơi. Ñu hur har ngă hrom ba pơdah thâo, pơdă anih sĭ mơdrô hăng bruă ngă lăi pơthâo gơnam đang hmua boh čroh hơdjă rơgoh ƀu mă yua hơbâo pruai ia jrao, lăi pơthâo gơnam ñu sĭ mơdrô amăng plăng internet, facebook…ĕp anih anom sĭ mơdrô.

Lu sang bruă nao tơl sang bruă ñu, hơduah ĕp lăng tong ten laih anun ngă hră kĭ pơkôl blơi hăng sĭ mơdrô. Ayong Vũ Trường Sinh, Khua kông ty Logistic Tân Phát Địa, mơ̆ng Đồng Nai adih nao ngă hrom sĭ mơdrô hăng kông ty Êđê Café, ñu lăi:

“Rơgao dua hrơi ĕp lăng, ƀuh pơ anai hăng găn rơgao lăng sit nik amăng đang hmua truh pơ pơkra ming kâo ƀuh gơnam pơkra rai hiam biă mă. Anun yơh kiăng gah ta ngă hrom hăng Êđê Café pơ anăp anai, ta amra hơmâo hơdră či mă bruă ngă hrom ba gơnam sĭ mơdrô anai nao pơ dêh čar tač rơngiao”.

Dưi pơsăng ia phĭ mơ̆ng kơphê jing mơnâo ƀâo bơngưi hiam, jơman, Y Pôt tŭ mă ia mơmih biă mă. Thun 2020, kông ty Êđê Café dưi hơmâo Anom kơsem min anom bruă sĭ mơdrô man ƀrô hăng anet ngă brơi hră pơsit “Top 10-hơmâo anăn hmư̆ hing klâo kual, gơnam sĭ mơdrô tŭ yua hiam jơman hloh”. Thun 2021, kơphê Robusta mơ̆ng kông ty Êđê Café dưi tŭ yap anăn “Gơnam sĭ mơdrô mơ̆ng đang hmua ba gru hlâo gưl tơring čar”, gơnam OCOP 4 asar pơtŭ mơ̆ng tơring čar Dak Lak.

Phrâo anai dơ̆ng, Y Pôt lĕ sa amăng hơdôm čô “Mơnuih ngă hmua Việt Nam hur har hloh thun 2022” yua Anom bruă Khul mơnuih ngă hmua Việt Nam apah bơni. Lăi nao jơlan či mă bruă pơ anăp adih, Y Pôt kah pơpha tui anai:

“Blung a lĕ kual pla pơjing kơphê prong hăng abih amăng să Dray Sap hăng tơring glông Krông Ana amra či ngă hrom laih anun pô pơtruh brơi mơ̆ng Êđê Café. Tơlơi čang rơmang hloh lĕ mơ̆ng Êđê Café kiăng gơnam sĭ mơdrô ba rơnoh yôm hiam klă hloh, gơnam sĭ mơdrô tơpă, sit nik ba hyu ƀơi rŏng lŏn tơnah dưi thâo rai”.

Tơlơi kiăng anŏ amuaih biă mă hăng tơlơi gir run ƀu pơdơi ôh, Y Pôt Niê hơmâo djă ba mơnâo ƀâo bơngưi ia kơphê, tơpung kơphê hơdjă djă gru hiam mơ̆ng djuai ania pô nao truh pơ ataih adih.