Giăm 20 thun mă yua prăk čan mơng sang bruă prăk djru mơnuih tơnap tap, yă Nguyễn Thị Tín, dŏ ƀơi thôn 3, să Hòa Lễ, tơring glông kual ataih Krông Bông, Dak Lăk thâo hluh rơđah anŏ yôm mơng mrô prăk anai, yua hơmâo prăk anai mơn sang anŏ ñu dưi tơklaih mơng ƀun rin, hơđong tơlơi hơdip. Yă Nguyễn Thị Tín ră ruai glăi: Thun 2005, yua hơmâo mơng Khul tơhan hơđăp să, ñu hơmâo čan prăk rông rơmô hăng ngă kơphê. Yua gir ngă bruă, thâo pơkom, sang anŏ ñu pok prong tui bruă rông rơmô, blơi hmua pơdai dong. Sui mơng anai 3 thun, sang anŏ ñu tơbiă anăn ƀun rin laih anun tla abih prăk ñu čan hlâo kơ anun. Yă Tín brơi thâo, sang anŏ ñu čan dong 40 klăk prăk pioh kơ sang anŏ phrâo tơbiă mơng rin či pơđĭ kyar bơwih ƀong hloh:

“Hăng mrô prăk anai jing klă biă kơ hơdôm boh sang čan mă, hơdôm boh sang tơnap tap. Mơng blung a kâo gơnang kơ prăk mơng sang bruă prăk djru mơnuih tơnap tap mơn sang anŏ mơng dưi pơđĭ kyar tơlơi bơwih ƀong, mơng anun dưi brơi ană bă hrăm truh anih. Kâo ăt kiăng čan thim dong kiăng rông lu hloh, kiăng sang anŏ bơwih ƀong đĭ hloh”.

Jing sa amăng hơdôm anom bruă mă prăk čan hăng Sang bruă prăk djru mơnuih tơnap tap tơring glông Krông Bông, Khul tơhan hơđăp să Hòa Lễ glăk hơmâo 5 grup pơkom prăk hăng čan prăk, prăk brơi čan giăm 14 klai. Ơi Thiều Đình Long, Khua khul tơhan hơđăp să Hòa Lễ brơi thâo, hơmâo lu jơlan hơdră brơi čan kah hăng brơi sang anŏ rin, sang anŏ giăm rin hăng sang anŏ phrâo tơbiă anăn ƀun rin čan mă, brơi čan djru ĕp brơi bruă mă, nao mă bruă pơ dêh čar tač rơngiao; brơi čan pơkra ia hơdjă hăng ngă hơdjă agaih plơi pla; brơi čan sĭ mơdrô ƀơi kual tơnap tap...djru mơnuih ƀon sang amuñ čan mă. Khul ngă hrŏm hăng sang bruă prăk hyu lăng na nao, pơtô brơi hơdôm boh sang anŏ čan prăk mă yua prăk djơ̆ glông.

“Pơ anai pô hyu čih anăn čan prăk lêng kơ khua grup soh. Lơ̆m jơnum bruă hơget thơ gơñu juăt lăi nao bruă čan prăk. Mơnuih ƀon sang pơ anai arăng thâo soh yơh bruă čan prăk mơng sang bruă prăk djru mơnuih tơnap, bruă ngă rim hrơi mơng ƀing gơñu, gơñu čan prăk, tla prăk kơmlai, pơgôp prăk pơkom gơñu ăt thâo mơn laih anun tla kơmlai rim blan klă soh. Čan prăk pơ anai pioh pơkra gơnam, rông rơmô, ƀudah ngă hmua, blơi kmơk pruai či pơđĭ kyar bơwih ƀong huă amăng sang anŏ”.

Tui hăng ơi Nguyễn Xuân Điền, Khua Anom bruă prăk djru mơnuih ƀon sang tơring glông Krông Bông, kiăng ană plơi dưi čan prăk kơmlai aset, rơngiao kơ pơplih phrâo hơdră čan prăk, rim blan anom bruă hơmâo pơphun 14 wơ̆t čan prăk ƀơi hơdôm boh să, tơring kual. Yua hnun mơn, amăng thun blan rơgao, rơbêh 58.700 wơ̆t boh sang anŏ ƀơi Krông Bông hơmâo čan tui 14 jơlan hơdră brơi čan prăk, hăng mrô prăk rơbêh 532 klai. Ơi Nguyễn Xuân Điền ăt lăi mơn, kiăng pơtrut tui anŏ klă mơng prăk čan, tơlơi gơgrong bruă mơng anom bruă hơmâo jao, grup pơkom prăk - grup čan prăk jing yôm biă mă. Anai jing “tơngan tô glông” mơng sang bruă prăk pơ hơdôm kual ataih, kual tơnap tap, djru gah lui “čan prăk kơmlai lu”.

“Rim thun anom bruă brơi čan prăk lêng kơ pơtŏp brơi hơdôm anom bruă hơmâo jao kah hăng khul grup să, khua wai lăng ƀing čan prăk, pơkom prăk, Anom bruă wai lăng mă pô amăng plơi pla. Mơng anai ăt pôr pơthâo kiăng mơnuih ƀon sang thâp hơdră brơi čan, thâo ngă tui. Hră pơ-ar čan prăk hơmâo brơi đôč, anun jing neh met wa ăt amuñ thâo mơn, anun jing bruă čan prăk ƀong kơmlai lu ƀơi tơring glông ƀu hơmâo dong tah”.

Amăng tơring čar Dak Lăk, thun 2022, sang bruă prăk djru mơnuih ƀon sang hơmâo brơi 51.800 wơ̆t boh sang anŏ čan mă, prăk brơi čan giăm 2.000 klai. Arăng djru brơi hlâo kơ sang anŏ rin, giăm rin, sang anŏ hyu mă bruă ataih glăi pơ plơi pla čan prăk pơđĭ kyar bơwih ƀong, hơđong tơlơi hơdip. Mrô prăk anai djơ̆ hăng tơlơi kiăng mơng hơdôm boh sang anŏ, pơƀut pơ hơdôm kual ataih, kual asuek, djru hrŏ trun mrô sang anŏ rin hăng pơđĭ kyar tơlơi bơwih ƀong huă - mơnuih mơnam mơng tơring čar./.