VOV4.Jarai - Dak Lăk jing tơring čar glăm ba kơtang hloh tơlơi truh klin Covid-19 ngă ƀơi kual Dap Kơdư amăng thun 2021 hăng 3 blan akŏ thun 2022. Hrŏm hăng tơlơi gir run mơng abih bang anom bruă čar, mơnuih mơnam, Dak Lăk amăng ƀrư̆ dưi pơgang klin Covid-19, ba tơlơi hơdip pơwơ̆t glăi tui hơđăp. Tơring čar ăt pơƀut pok pơhai ngă tui khut khăt hơdôm hơdră rŭ glăi, pơđĭ kyar tơlơi bơwih ƀong huă; pơƀut djru, pơsir hĭ tơnap tap, tơlơi gun kơ anom bơwih ƀong, mơnuih ƀon sang, anun jing tơlơi bơwih ƀong mơnuih mơnam mơng tơring čar đĭ glăi laih.

Buôn Tơng Jŭ hlâo adih jing anih hơmâo klin prong hloh mơng să Ea Kao, plơi prong Buôn Ma Thuột hăng 230 čô mơnuih ƀă covid-19 amăng blan 10 thun 2021. Yua hơmâo abih bang anom bruă ia jrao hăng gong gai plơi pla hrŏm hăng abih bang mơnuih ƀon sang gum pơgang, truh ră anai klin Covid-19 ƀơi anai dưi pơgang laih, abih bang mơnuih mơng 18 thun hơmâo tlâ̆o djŏp 3 ară vaccine pơgang Covid-19.

Klin kheng huăi dŏ tlep hăng huăi bơbeč djơ̆ tơlơi hơdip mơnuih ƀon sang plơi Tơng Jŭ dong tah. Lăp đing nao, mơnuih ƀon sang pơ anai thâo mơneč mă anŏ hiam mơng glai klô, anih hơdip, gru grua tơlơi phiăn, pơtrut tui bruă mơñam mrai, tơkŏng tơpai, atông čêng...jing bruă bơwih brơi kơ tuai čuă ngui ngă pơhưč ƀing tuai nao lăng, pơƀuh rup plơi pla kiăng lu mơnuih thâo, laih anun pơđĭ tui prăk pơhrui kơ mơnuih ƀon sang.

Yă H’Yam Buôn Krông - khua plơi Tơng Jŭ brơi thâo ră anai amăng plơi hơmâo grup bơwih brơi tuai hyu ngui hơmâo anăn Kual tuai hyu ngui čuă lăng plơi pla Tơng Jŭ. Grup hơmâo 9 čô, anai lĕ hơdôm boh sang mơnuih djuai ania Êdê, gum pơgô̆p, bơwih brơi lơ̆m tuai nao ngui pơ plơi pla.

“Hơmâo lu tuai mơng hơdôm boh tơring čar ƀon prong kah hăng Hà Nội, ƀon prong Hồ Chí Minh, Huế hăng hơdôm boh tơring čar ieo gah, gơñu rai pơ anai ƀong huă asơi añăm mơnuih ƀon sang djuai ƀiă, hmư̆ arăng atông čêng, hyu hơduah ĕp boh thâo gru grua djuai ania ƀiă ƀơi anai. Ră anai 9 boh sang gơmơi hơmâo jao bruă kơ rim čô mơnuih, đa lĕ pla añăm, đa rông un, rông mơnŭ, đa tơkŏng tơpai čeh. Kâo kiăng tơdơi anai, lơ̆m bruă tuai hyu ngui pơđĭ kyar hloh lĕ amra hơmâo lu neh met wa gum ngă hrŏm hloh”.

Tuai nao lăng arăng mơñam mrai

Tuai mơñum lăng tơpai čeh

Tơdơi kơ klin Covid-19, rơkơi bơnai amai H’Mrơng Êban, ƀơi ƀuôn Mdhar, 1B, sa Ea Ñuôl, tơring glông Buôn Đôn rơngiă bruă mă. Hơmâo lŏn samơ̆ ƀu hơmâo prăk ngă hmua, anun jing tơlơi hơdip rơkơi bơnai ñu tơnap biă mă. Mơng tơlơi gum djru mơng grup pơkom prăk hăng čan prăk mơng ƀuôn Mdhar 1B, ñu hơmâo čan mă 50 klăk prăk mơng jơlan hơdră djru čan prăk djă bong hăng pok prong bruă mă tui Tơlơi pơtrun mrô 11 mơng Kơnuk kơna. Mơng mrô prăk čan anai, ñu hơmâo blơi kmơk pruai đang kơphê, pla thim hơdôm djuai phun pĕ pơhrui amăng ƀiă blan dong đah mơng hơmâo prăk. amai H’Mrơng Êban brơi thâo:“Yua klin Covid-19 phrâo anai, anun dua rơkơi bơnai gơmơi ƀu hơmâo bruă mă amăng lu blan mơtăm. Laih dong, yua gơmơi phrâo pơdô̆ mơn anun tơnap biă, ƀu hơmâo prăk kăk ôh. Ăt yua hơmâo hơdră djru mơng kơnuk kơna mơn, 2 rơkơi bơnai gơmơi mơng dưi găn rơgao hrơi blan tơnap anai, hơmâo prăk pla kơphê hăng pla djuai phun pơkŏn. Rơkâo bơni kơ jơlan hơdră anai hơmâo djru brơi sang anŏ gơmơi”.

Tui hăng mrô jŭ yap mơng sang bruă prăk djru mơnuih mơnam tơring čar Dak Lăk, yap truh lơ 30 blan 6, Sang bruă prăk hơmâo Kơnuk kơna brơi 400 klai 300 klăk prăk pioh ngă jơlan hơdră brơi čan prăk mă kơmlai ƀiă tui Tơlơi pơtrun mrô 11 hơmâo: brơi čan djru bruă mă, djă bong hăng pok prong bruă mă; brơi čan sang dŏ mơnuih mơnam; brơi čơđai sang hră tơnap tap čan mă blơi măi tiñ, gơnam yua hrăm hră mơng ataih; brơi čan pioh pơđĭ kyar bơwih ƀong huă mơnuih mơnam kual mơnuih ƀon sang djuai ƀiă hăng čư̆ siăng thun 2021-2030; brơi čan hăng sang hră gưl muai mầm non hăng sang hră kơnuk kơna pơdong bơbeč djơ̆ klin Covid-19. Truh ră anai, Sang bruă prăk djru mơnuih mơnam ƀơi Dak Lăk hơmâo brơi 2443 anung prăk čan hăng mrô 118 klai 140 klăk prăk.

Ơi Nguyễn Minh Hướng, Kơ-iăng khua sang bruă prăk djru mơnuih tơnap tơring čar Dak Lăk brơi thâo, hrơi blan pơ anăp, Sang bruă prăk djru mơnuih tơnap tap Dak Lăk amra ngă hrŏm hăng hơdôm anom bruă bơdjơ̆ nao hăng hơdôm khul grup lăng glăi djŏp pô dưi čan prăk đah mơng brơi prăk čan tañ, djơ̆ hăng tơlơi pơkă. Laih dong pơphun wai lăng klă mrô prăk brơi čan, pơhlôm rơnuk rơnua hăng pơtrut tui anŏ klă mơng prăk brơi čan.

“Tơdơi kơ hơmâo lăi pơthâo kơ mrô prăk brơi čan lĕ Sang bruă prăk hơmâo lăi pơthâo glăi kơ Jơnum min mơnuih ƀon sang tơring čar hơmâo hră pơ-ar git gai hơdôm anom bruă khul grup hrŏm hăng Sang bruă prăk lăng glăi abih mơnuih kiăng čan prăk. Tơdơi kơ hơmâo anăn rơđah rơđông, Sang bruă prăk djru mơnuih mơnam git gai sang bruă prăk tơring glông ngă hrŏm hăng hơdôm khul grup ƀơi tơring glông lăi pơthâo bruă brơi čan tañ hloh, djơ̆ pô kiăng čan, djơ̆ bruă kiăng ngă”.

Ngă hră kĭ pơkôl brơi čan prăk djru pơđĭ kyar bơwih ƀong

Kiăng rŭ glăi tơlơi bơwih ƀong huă - mơnuih mơnam tơdơi kơ Covid-19, phrâo rơgao, Jơnum min mơnuih ƀon sang tơring čar Dak Lăk hơmâo pơtrun Jơlan hơdră rŭ glăi hăng pơđĭ kyar bơwih ƀong huă mơnuih mơnam tơring čar thun 2022-2023, amăng anun gơñăm nao bruă rŭ glăi tañ bruă pơkra pơjing, sĭ mơdrô, pơtrut đĭ kyar; djru brơi amăng hơdôm bruă yôm phun ƀơ̆i hlâo, pơhlôm dưi ngă rơnoh đĭ kyar bơwih ƀong huă - mơnuih mơnam hơmâo ba tơbiă hlâo kơ anun. Ơi Nguyễn Đình Trung, Ding kơna apăn bruă Ping gah, Khua git gai Ping gah tơring čar Dak Lăk brơi thâo:“Tơring čar glăk pơphun dưm dăp, lăng glăi bruă mă yua lŏn tơnah, čuk pơkra man pơdong hơdôm kual pơđĭ kyar. Pơhlôm anŏ klă, djơ̆ hăng tơlơi kiăng sit nik, lơ̆m pô tuh pơ plai nao pơ tơring čar lĕ arăng hơmâo tơhnal či sem lăng, laih anun arăng pơtŏng lăng, pơsit tuh pơ plai. Bruă tal 2 dong lĕ pơtruh nao rai kơplah wah hơdôm boh sang anŏ amăng bruă pơkra gơnam, anai ăt jing tơlơi gơgrong bruă mơng tơring čar, tơring čar ăt khŏm gơgrong bruă pơtruh nao rai hơdôm boh sang amăng bruă pơkra gơnam. Tal 3 lĕ bruă ba sĭ gơnam ăt kah hăng nao hrŏm hăng măi mok pơkra gơnam, hơdôm bruă akŏ pơdong anih anom mơn. Amăng hơdôm bruă hơmâo gơgrong, tơring čar amra djru brơi klă hloh”.

6 blan akŏ thun, mah ăt bơbeč yua klin Covid-19 ngă mơn, samơ̆ hăng hơdôm tơlơi gir run mơng mơnuih ƀon sang, anom bơwih ƀong, hăng gong gai, tơlơi bơwih ƀong Dak Lăk hơmâo pơđĭ kyar glăi laih, lơ̆m mrô gơnam hơmâo đĭ 7,37%, pơhrui glăi prăk kơ kơnuk kơna hơmâo 4.860 klai, đĭ giăm 40% pơhmu hăng tơđar thun hlâo; prăk sĭ mơdrô hăng čar rơngiao hơmâo 845 klăk dolar Mi, đĭ rơbêh 61%. Hơdôm bruă tuai hyu ngui, sĭ mơdrô, pơkra gơnam hơmâo đĭ mơn. Hơdôm tơlơi anai glăk pok jơlan kơ bruă rŭ glăi, pơđĭ kyar bơwih ƀong mơng Dak Lăk.

Nam Trang: Čih - Siu H’Mai: Pơblang