VOV4.Jarai - Jơlan hơdră rim boh să sa mơta gơnam (arăng iâu lĕ jơlan hơdră OCOP) ƀơi tơring čar Dak Lăk glăk pơđĭ kyar kơtang biă. Jai hrơi hơmâo lu tui gơnam OCOP dưi mă 3 - 4 asar pơtŭ. Tơlơi anai jing pok tơlơi gêh gal pơđĭ kyar gơnam mơng hmua ƀơi tơring čar, pơđĭ kyar tơlơi bơwih ƀong amăng plơi pla tui jơlan pơđĭ nua gơnam mơng hmua.

Jing anom bruă hơmâo mắc ca dưi hơmâo anăn OCOP 4 asar pơtŭ gưl tơring čar, Kông ti pơčruh ngăn Damaca Nguyên Phương ƀơi să Phú Lộc, tơring glông Krông Năng glăk gir pơplih hơdră pơkra, măi mok kiăng pơkra rai gơnam klă hloh, gru, kơđuh gơnam ba pơsit anăn OCOP gưl dêh čar. Ơi Phạm Đình Nhân, Khua anom bruă Maketing Kông ti pơčruh ngăn Damaca Nguyên Phương brơi thâo: mơng hrơi gơnam hơmâo pơsit hăng mă yua anăn OCOP jing hơmâo mơnuih blơi yua đăo gơnang, gơnam dưi ba sĭ pơ sang siêu thị, anih sĭ mơdrô amuñ hơmâo arăng blơi hloh mơn. mrô gơnam ba sĭ jai hrơi lu. Kơnong amăng thun 2021, mah glăk hơmâo klin Covid-19 samơ̆ kông ti ăt dưi ba sĭ năng ai 70 tơn pơjeh mắc ca.

“Tơdơi kơ hơmâo anăn OCOP 4 asar pơtŭ, kông ti ƀu pơdơi pơdă pơkra hiam tui gơnam, gru, hruh pioh gơnam đah mơng djơ̆ hăng hơnong pơkă OCOP. Rơngiao kơ anun ƀing gơmơi hơmâo pơkra sang măi pioh pơkra gơnam klă đah mơng dưi hơmâo OCOP 5 asar pơtŭ gưl dêh čar, anăp nao mơnuih blơi amăng dêh čar hăng ba sĭ kơ čar rơngiao”.

Thâo rơđah anŏ klă mơng jơlan hơdră rim boh să sa mơta gơnam ƀu hơmâo pô pơkŏn dong tah anun lĕ mơnuih ngă hmua - pô ngă jơlan hơdră anai. Tơlơi pơsit rơđah hloh lĕ braih hơdjă HTB mơng anom ngă ƀong hrŏm bơwih brơi bruă ngă hmua Thăng Bình, să Čư̆ Kty, tơring glông Krông Bông. Mơng hrơi hơmâo mă anăn OCOP 3 asar pơtŭ, nua braih hơmâo đĭ 2 wơ̆t pơhmu hăng mơng hlâo, mrô mơnuih blơi ăt đĭ mơng 200 tơn truh 400 tơna/thun, ba glăi lu tơlơi klă hiam kơ anom ngă ƀong hrŏm ăt kah hăng ƀing gŏp gum ngă tom. Ơi Võ văn Sơn, Khua anom ngă ƀong hrŏm bơwih brơi ngă hmua Thăng Bình lăi: “Hlâo adih gơnam mơng ƀing gơmơi pơkra aka ƀu hơmâo arăng lăng yôm ôh, ră anai hơmâo anăn OCOP lĕ nua ñu đĭ tui mơn, gơnam arăng hmư̆ hing, mơnuih ngă hmua dưi sĭ lu gơnam hloh, hơđong hloh mơn. Anih sĭ mơdrô amăng tơring čar, gah rơngiao tơring čar wơ̆t hăng pơ čar rơngiao”.

Anih pơkra mắc ca mơng Kông ti pơčruh ngăn Damaca Nguyên Phương 

Ding kơna mơng Anom ngă ƀong hrŏm bơwih brơi bruă hmua Thăng Bình sem lăng đang hmua hlâo či truh bơyan yuă pơdai.

Tui hăng gơnong bruă hmua hăng pơđĭ kyar plơi pla tơring čar Dak Lăk, truh ră anai, tơring čar hơmâo 72 gơnam hơmâo anăn OCOP tơring čar. Amăng anun hơmâo 8 mơta gơnam mă 4 asar pơtŭ, lu biă lĕ kơphê, ka kao, mắc ca. Hơdôm mơta gơnam anai glăk hơmâo tuh pơ plai pơkra klă hloh đah mơng hơmâo 5 asar pơtŭ gưl dêh čar, pơđĭ tui tơlơi gêh gal dưi mut hrŏm hăng anih sĭ mơdrô jar kmar. Ơi Dương Tín Đức, Khua anom bruă git gai jơlan hơdră Plơi pla phrâo tơring čar Dak Lăk brơi thâo: “Ƀing gơmơi amra gir hăng tơlơi djru ba mơng dêh čar ta amra pơđĭ tui hơdôm mơta gơnam mơng 3 jing 4 asar pơtŭ, mơng 4 jing 5 asar pơtŭ đah mơng dưi ngă hơdôm hơnong pơkă lơ̆m anun amra dưi pơtruh hăng gơnam tam mơng djŏp kual, biă ñu lĕ bruă pơtrut pơsur sĭ mơdrô. Tơdah gơnam 3 asar pơtŭ lĕ sang siêu thị, hơdôm anih sĭ gơnam prong amra tŭ ư blơi sĭ, 4 asar pơtŭ dưi ba sĭ pơ djŏp anih hăng 5 asar pơtŭ ƀiă hloh lĕ dưi ba sĭ pơ 45 boh dêh čar gum ngă jơlan hơdră OCOP anai”.

Hăng hơdôm tơlơi gêh gal kơ hơdôm mơta gơnam mơng hmua, gơnam pơkra hăng tơngan, tơring čar Dak Lăk glăk gir pơphun ngă truh kih jơlan hơdră OCOP đah mơng pơđĭ kyar bơwih ƀong huă kual plơi pla, pơplih glăi bruă ngă hmua, ngă tŭ yua bruă man pơdong plơi pla phrâo, pơđĭ tui tơlơi hơdip mơnuih ƀon sang./.

Hương Lý: Čih - Siu H’Mai: Pơblang