Kơnong ha wŏt hrơi tơjuh tơdơi kơ hrơi jơnum, tơring čar Dak Lak hơmâo pơphun hrơi pơplih yua boh thâo phrâo thun 2025 hăng anăn “Yua boh thâo phrâo-Anăp nao kơñ pơgi”. Hăng hơnong pơkă jing ƀon lan ba jơlan hlâo amăng pơplih yua boh thâo phrâo kual Dap kơdư-ter hang ia rơsĭ Dơnung tong krah. Tơdơi kơ rơbêh 3 blan pơmut hrŏm, Dak Lak hơmâo pơgiong 100% hơnong pơkă pơplih yua boh thâo phrâo ƀơi 102 boh să, phường, hră pơ-ar ngă brơi mơng ataih dưm dưm 34,5%, gưl să rơbêh 37%. Anom bruă ngă hră pơ-ar dua gưl tŭ mă rơbêh 350 rơbâo hră pơ-ar, hăng 76% hră pơ-ar ngă brơi mơng ataih. Đơ đam tơring čar hơmâo rơbêh 83% mrô mơnuih ƀôn sang hơmâo ngă brơi hră pơsit anăn mrô 2, giăm 79% dưi mă yua laih.

Hơdôm boh than anai brơi ƀuh tơlơi yak nao kơtang mơng gong gai ƀon lan dua gưl ƀơi Dak Lak amăng bruă pơplih yua boh thâo phrâo, anăp nao anih mă bruă giăm mơnuih ƀôn sang, tong ten hăng pơplih phrâo. Ơi Bùi Thanh Toàn, Khua gơnong bruă boh thâo ia rơgơi tơring čar Dak Lak brơi thâo:

“Ngă hiưm pă kiăng gong gai giăm mơnuih ƀôn sang ƀiă lơm kual lŏn mơnai prong tui, mơ̆ ƀu hơmâo gưl tơring glông, bruă yua boh thâo phrâo, pơplih pơčeh phrâo hăng pơplih mrô lĕ bruă kiăng ngă tui. Tơring čar amra tŏ tui tuh pơ alin pơkra anih anom, hăng pơpha mơnuih apăn bruă mơng tơring čar trun djru bruă ƀơi hơdôm boh să, phường. Laih dong ăt pơhưč lu mơnuih mă bruă mơng pơkŏn hăng tŏ tui tơlơi gum hrŏm, djru ba mơng anom bơwih ƀong sĭ mơdrô amăng tơring čar.”

Amăng rơwang phrâo, Dak Lak ba tơbiă hơnong pơkă pơđĭ kyar 10,5% hluai tui bruă pơđĭ kyar mơnuih mă bruă rơgơi, pơtrut yua boh thâo phrâo, pơplih pơčeh phrâo hăng pơplih mrô, tuh pơ alin ha pơkra ming gơnam măi mok kiăng pok prong pơlir kual.

Hrŏm hăng gong gai, mơnuih ƀôn sang hăng anom bơwih ƀong sĭ mơdrô amăng tơring čar lêng kơ hloh rơđah, rơwang thun 2025-2030 Dak Lak ƀu djơ̆ kơnong mă yua kual lŏn mơnai kiăng pơđĭ kyar đôč ôh mơ̆ tơlơi yôm hloh lĕ pok tơlơi pơmĭn phrâo. Yă Ngô Tường Vy, khua grup sĭ mơdrô hăng blơi mut boh troh Chánh Thu brơi thâo, tơlơi dưi prong mơng gơnam đang hmua mơng Dak Lak amăng rơwang anai, amra hơmâo wŏt tơlơi gal mơng ayuh hyiăng lŏn mơnai hăng hơdôm tơlơi yak nao phrâo, hơdră bruă phrâo.

“Tơlơi yôm lĕ kiăng lăng bruă ngă hmua kar hăng sa gơnong bruă bơwih ƀong thâo rơgơi-hluai tui bruă yua boh thâo phrâo, rơnoh yôm hăng tơlơi glăm ba kiăng gơnam mơng Dak Lak dưi ba hyu ataih, jing tơlơi pơ-ư ang mơng bruă ngă hmua ƀơi Việt Nam.”

Hăng hơnong pơkă pơtrut pơđĭ kyar, Dak Lak amra pơtrut yua boh thâo phrâo, yua boh thâo măi mok hăng pơplih mrô, kiăng kơtưn tuh pơ alin man pơka jơlan glông. Ơi Tạ Anh Tuấn, khua Jơnum min mơnuih ƀôn sang tơring čar Dak Lak brơi thâo, lơm pơplih yua boh thâo phrâo-gơnam măi mok lĕ gơnam pơtrut amăng lăm hăng jơlan glông amra jing glông pơtrut phun amăng tơlơi bơwih ƀong huă, mơnuih mơnam:

“Tơring čar amra đing nao ngăn rơnoh kiăng tuh pơ alin man pơkra hơdôm ară jơlan phun, sit biă ñu lĕ jơlan rơdêh đuăi hmar tơkuh nao rai Ngŏ Yŭ amăng tơring čar, tơkuh nao rai tơdrun kompăn hăng tơdron rơdêhpor kah hăng tơkuh nao rai hăng hơdôm ară jơlan rơdêh đuăi hmar đơ đam dêh čar anun lĕ jơlan rơdêh đuăi hmar Kơdư-Dơnung, jơlan rơdêh đuăi hmar Buôn Ma Thuột-Vân Phong hăng pơkra anih anom hlâo amra pok rai glông jơlan pơđĭ kyar phrâo hăng pok phư brơi hơdôm ngăn rơboh pơkŏn dong”.

Hăng hơdôm anŏ pơtrut pơđĭ kyar glăk ječ ameč hơkrŭ kjăp, hơdôm tơlơi dưi prong brơi tuh pơ alin-bơwih ƀong sĭ mơdrô ƀơi Dak Lak glăk pok rai. Ơi Lê Đức Huy, Khua khul ding kơna kông ti TNHH sa ding kơna sĭ mơdrô hăng blơi mut 2/9 Dak Lak brơi thâo:

“Ƀing gơmơi đăo gơnang amra ba Dak Lak pơđĭ kyar kơtang hloh amăng rơwang pơ anăp, sit biă ñu lĕ hơdôm bruă truh kơtang. Tal sa lĕ kơ anih anom, jơlan glông amra pơđĭ kyar jơlan glông, tơkuh nao rai kual Ngŏ Yŭ kiăng pơđĭ kyar dơlăm, hơdôm kual tuh tia pơkra pơjing, hơdôm tơdrun gah kơdư hăng hơdôm tơdrun kompăn kiăng ba gơnam đang hmua hăng akan hơdang mơng kual Dăp kơdư dưi ba sĭ mơdrô tui glông jơlan ia rơsĭ ƀơi kual Ngŏ Dak Lak.”

Tơdơi kơ Jơnum Ping gah tơring čar, Dak Lak ƀu djơ̆ kơnong lăi nao “hơnong pơkă” đôč ôh mơ̆ ăt glăk pơsur hơdôm bruă mă tong ten, kiăng pơjing rai lu tơlơi pơtrut phrâo-anih bruă ngă hmua, tuh tia pơkra ming hăng kual ia rơsĭ dưi mut hrŏm pơđĭ kyar. Lơm tơlơi pơtrun hơmâo pơdah amăng bruă mă, lơm pran pơtrut hơmâo ngă lar hyu tơl rĭm čô mơnuih hăng anom bơwih ƀong sĭ mơdrô, Dak Lak ƀu djơ̆ kơnong lĕ anih pla kơphê phun đôč ôh mơ̆ ăt lĕ jing kual lŏn glăk hrưn đĭ kơtang mơng kual čư̆ siăng trun pơ ia rơsĭ./.