Hơdôm anih atông čing ring hơgor, adoh suang mơak pơdah thâo gru grua hiam mơ̆ng djuai ania pô hrom hăng tơlơi ngui ngor akă čeh tơpai mơñum hok mơak kơ hrơi gum pơgôp anai.

Mơ̆ng mơguah mơtam, mơnuih ƀôn sang mơ̆ng 3 boh tơring čar ƀôn Pa, ƀôn Năng hăng ƀôn Hoang pơtum jơnum mơak hăng buh eng ao gru đưm djuai ania, ƀuuh ƀô̆ mơta ƀơi sang jơnum plơi, sang rung ƀôn Pa-anih pơphun hrơi mơak gum pơgôp djuai ania amăng plơi pla să Čư̆ Prao, tơring glông Mdrak, tơring čar Dak Lak. Dua bơnah jơlan lĕ akă hla kơ, bơnal hiam pơhrôp, đhơ đhet angin pưh, hmư̆ ik kơ jua čing, ing jua hơgor kơdok kơdor ană plơi pla pơtum  mơak, hok kơdok. Ƀuh ƀô̆ mơta mơ̆ng mơguah mơtam pơ sang rung ƀôn Pa, ơi Y Li Niê, Khua ƀôn Hoang lăi:

“Hrơi anai mơak biă mă, ană plơi pla pơtum pơ anai hok kơdok hmư̆ adoh suang, atông čing, mơñum tơpai čeh, laih anun adơi ayong pơbưp nao rai mơñum tơpai bơ ră ruai kơdok kơdor”.

Phrâo suang giong, amai H’Nhuyn Ksor dŏ po ƀôn Năng, să Čư̆ Prao brơi thâo, hrơi anai grup suang gơñu mơak biă mă yua dưi pơdah kơ ană plơi pla ĕp lăng. Ƀuh ană plơi pla nao pơtum jơngum djop, lăng adoh suang rĭm yak rơbat yŭ suang, tơlơi anun pơtrut pran jua ƀing suang jai mơak hloh:

“Hrơi anai ƀing gơmơi suang tơlơi suang bơnga ƀlang, bơnga blĭng, čang rơmang giong suang anai gơmơi kiăng hơdor glăi tơlơi phiăn gru ama grua amĭ djuai ania Êđê ta dŏ djă pioh na nao tơdơi anai”.

Tui hăng ơi Y Linh Niê, Kơ-iăng Khua grup wai lăng djop djuai ania mơnuih mơnam să Čư̆ Prao, ƀôn Pa, ƀôn Năng hăng ƀôn Hoang hơmâo abih 346 boh sang anŏ hăng 1.440 čô mơnuih. Klâo boh plơi hơmâo 5 djuai ania adơi ayong amăng djuai ania Việt Nam dŏ hrom, amăng anun djuai ania Êđê hơmâo 90%. Rĭm thun, amăng hrơi hơdor kơ bruă Gum pơgôp djuai ania, gong gai kơnuk kơna să pơphun ngui ngor mơak čơkă tơlơi anai ƀơi djop plơi pla, samơ̆ thun anai Jơnum min mơnuih ƀôn sang să pơsit pơphun ngă hrom lu boh plơi pla sa anih, kiăng pơtrut đĭ pran jua gum pơgôp djuai ania amăng să. Laih dơ̆ng ngă gêh găl kơ mơnuih ƀôn sang adoh suang ngui ngor hrom:

“Lơ 18/11 rĭm thun juăt pơphun ngă yang, laih anun hơmâo tơlơi ngui ngor amăng plơi pla. Rĭm thun tui hăng tơlơi phiăn juăt ngă atông čing giong laih anun mơñum tơpai čeh, suang rah. Kual plơi pla hok mơak biă mă čơkă hrơi anai”.

Nao jơnum hrom Hrơi gum pơgôp djuai ania ƀơi ƀut plơi să Čư̆ Prao, tơring glông Mdrak, hơmâo ơi  Y Ƀiêr Niê, Kơ-iăng Khua git gai ping gah tơring čar Dak Lak brơi thâo, ră anai, ƀơi lu plơi pla amăng tơring čar hlăk pơphun lu bruă mă mơak, čơkă hrơi anai, pơdah tơlơi adoh suang mơak 92 thun hrơi Gum pơgôp djuai ania lơ 18/11/1930-lơ 18/11/2022.

Bruă ngă anai jing hĭ hrơi mơak, hrơi gru grua hơdor pioh na nao kơ tơlơi gum pơgôp prong amăng plơi pla, pơphun hăng lu bruă mă djă jă gru grua hiam mơ̆ng djop djuai ania amăng khul gum pơgôp djuai ania Việt Nam, djru hrom pơtrut tơlơi gum pơgôp djuai ania kjăp hloh:

“Boh tơhnal kơ hrơi mơak anai, kiăng mơnuih ƀôn sang pơđĭ tui gru grua hiam djuai ania pô hăng hrăm nao rai tơdruă, hơdôm bruă ngă hiam, gru grua klă djă pioh pơtrut ngă tui. Tui hăng anun, ba yua hrom pơtô jơlan hơdră tơlơi phiăn kơnuk kơna kiăng kơ mơnuih ƀôn sang thâo hluh, mơ̆ng anun đah mơ̆ng lir hơbit tong ten ngă hrom amăng tơlơi hơdip mơda, ngă tui djơ̆ tơlơi phiăn kơnuk kơna pơtrun, man pơdong plơi pla dêh čar jai hrơi pơdrong asah hiam mơak”.

Amăng hơdôm hrơi rơgao, djop plơi pla ala ƀôn tơring čar Dak Lak ăt pơphun kơdok kơdor hrơi mơak gum pơgôp djuai ania, hơmâo khua mua ping gah, kơnuk kơna djop gưl nao jơnum hrom ƀuh ƀô̆ mơta. Rơđah biă ñu ƀơi plơi lir hơbit mrô 5, să Êa Ƀar, tơring glông Ƀuôn Đôn hok mơak, dưi čơkă ơi Phạm Minh Tấn, Kơ-iăng Khua git gai ping gah tơring čar Dak Lak, Y Giang Gry Niê Knơ̆ng, Khua jơnum min djop djuai ania mơnuih mơnam Việt Nam tơring čar, hăng lu khua mua gơnong bruă amăng tơring čar laih anun gong gai kơnuk kơna tơring glông.

Pơhiăp ƀơi mông jơnum anai, ơi Phạm Minh Tấn, Kơ-iăng Khua git gai ping gah tơring čar Dak Lak bơni hăng čih pioh hơdôm bruă ngă gum pơgôp, djru nao rai mơ̆ng ƀut plơi mrô 5 amăng bruă ngă khăp kơ lŏn ia, ăt kah hăng ngă tui tơlơi jak iâu mơ̆ng djop anom bruă ping gah, kơnuk kơna, khul wai lăng djop djuai ania mơnuih mơnam thun blan rơgao. Laih dơ̆ng čang rơmang djop anom bruă ping gah, gong gai kơnuk kơna, khul wai lăng djop djuai ania mơnuih mơnam, djop khul grup hăng mơnuih ƀôn sang 5 boh plơi ăt djă kjăp tơlơi gum pơgôp djuai ania, găn rơgao tơlơi tơnap tap hrưn đĭ mă bruă, găn rơgao tơlơi lông lăng hăng pơtrut pơđĭ kyar, man pơdong plơi pla hiam mơak, tơlơi hơdip mơda mơnuih ƀôn sang jai hrơi trơi pơđao yâo mơak hloh.