VOV4.Jarai - Mơnuih ƀon sang ƀơi tơring glông Čư̆ Mgar, tơring čar Dak Lak glăk bơngŏt biă mă lơ̆m jơlan tơring čar mrô 8, ară găn nao să Ea Kpam phrâo tuh pơ alin pơkra ming samơ̆ ră anai răm rai laih, ƀuh lu anih pơčah, luh dơlăm ngă hŭi rơhyưt lơ̆m rơdêh đuăi nao rai. Hrŏm hăng anun, bruă črâo ba hăng man pơkra hơmâo lu anŏ aka ƀu klă, ngă kơ ară jơlan anai jai hŭi rơhyưt brơi kơ mơnuih ƀon sang găn nao rai.

Jơlan tơring čar mrô 8 ară găn nao să Ea Kpam, tơring glông Čư̆ Mgar amăng sui thun laih răm rai, găn nao rai tơnap tap biă mă. Thun 2021, jơlan anai hơmâo gơnong bruă wai lăng jơlan glông tơring čar Dak Lak pơsit pơkra ming. Hăng truh rơnuč thun, ring bruă man pơkra giong. Tơdơi kơ hok mơ-ak aka ƀu sui, mơnuih ƀon sang ƀơi anai glăk bơngŏt yua jơlan anai răm rai laih, ƀuh lu anih pơčah, luh dơlăm. Sa čô mơnuih dŏ hơdip ƀơi ƀut plơi 1, să Ea Kpam brơi thâo, ară jơlan anai răm rai tơdơi kơ man pơkra giong tơlơi anai ngă hŭi rơhyưt brơi mơnuih đuăi rơdêh nao rai, biă mă ñu amăng mơmŏt mlăm.

“Lu anŏ aka ƀu klă, phrâo man pơkra giong, man nao pơ anăp samơ̆ răm tui tlôn laih, ră anai ƀuh luh pơčah lu anih, pơkra ming na nao samơ̆ ăt ƀu kjăp ôh. Amăng mơmŏt mlăm đuăi rơdêh amuñ rơbuh biă mă. Tơdah rơbuh rơdêh amra ngă djai mơnuih mơtăm yơh”.

Ră anai jơlan tuh kơsu ƀuh lu anih răm rai ngă hŭi rơhyưt brơi mơnuih găn nao rai, sit biă ñu amăng mơmŏt mlăm

Ơi Nguyễn Hữu Chung, Kơ-iăng khua Jơnum min mơnuih ƀon sang să Ea Kpam brơi thâo, jơlan tơring čar mrô 8 phrâo tuh pơ alin samơ̆ răm rai ngă kơ mơnuih ƀon sang amăng să bơngŏt biă mă. Ƀuh lu rơdêh rơbuh lơ̆m đuăi amăng mơmŏt mlăm lơ̆m mơnuih mơgăt rơdêh thut rok djơ̆ jơlan răm. Mơnuih ƀon sang ăt lu wŏt rơkâo đĭ djop gưl bơdjơ̆ nao, biă mă ñu amăng hơdôm mông pơbưp kơplah wah Khua pơ ala mơnuih ƀon sang hăng mơnuih ƀon lan laih dong Khul pơ ala mơnuih ƀon sang djop gưl. Samơ̆, truh ră anai ară jơlan anai ăt aka ƀu pơkra ming ngă kơ mơnuih ƀon sang hŭi rơhyưt biă mă:

“Jơlan răm rai ngă hŭi rơhyưt brơi mơnuih đuăi rơdêh nao rai. Năng ai ñu pioh jơlan răm kar hlâo adih, mơnuih ƀon sang thâo anih răm hăng amuñ wer hĭ. Ară jơlan anai hlơi juăt găn nao rai lêng kơ thâo, tơdah anih răm prong amuñ wer hĭ, samơ̆ luh pơčah anet, dơlăm raih daih, yua anun tơnap biă mă lơ̆m đuăi rơdêh”.

Mơnuih ƀon sang să Ea Kpam bơngŏt biă mă lơ̆m jơlan phrâo tuh pơ alin man pơkra samơ̆ ră anai răm laih

Akŏ bruă man pơkra ming jơlan tơring čar mrô 8, ară jơlan Km12+300 truh pơ Km14+950 hăng ară jơlan glông rơbêh 2,4 km hơmâo gơnong bruă wai lăng jơlan glông tơring čar Dak Lak tŭ yap amăng blan 4/2021hăng abih tih 9 klai prăk. Anom bruă črâo ba bruă man pơkra lĕ Kông ti TNHH tuh pơ alin APP Việt Nam, bơ anom bruă man pơkra lĕ Kông ti TNHH Nam Sơn.

Bơdjơ̆ nao bruă Jơlan tơring čar mrô 8 răm rai, amăng tong krah blan 7, Jơnum min mơnuih ƀon sang tơring glông Čư̆ Mgar ăt hơmâo hră pơ-ar mơ-it nao Gơnong bruă wai lăng jơlan glông tơring čar Dak Lak rơkâo pơsir sa, dua anŏ aka ƀu klă. Tui Jơnum min mơnuih ƀon sang tơring glông Čư̆ Mgar, ră anai jơlan tuh kơsu ƀuh sa, dua anih luh, jơlan răm rai kơtang. Laih dong, bruă tuh pơ alin man pơkra glông pơđoh đuăi ia aka ƀu pơphun ha wŏt ngă kơ ia pơkŏng glăi lu anih, blai đĭ amăng rŏng jơlan, blai rô nao amăng sang dua gah jơlan ngă hơƀak jrak, ngă hŭi rơhyưt lơ̆m rơdêh găn nao rai.

Siu Đoan: Pơblang