VOV4.Jarai-Khua mua git gai phun ping gah tơring čar Dak Lak phrâo jơnum pơƀut 10 thun ngă tui Hră pơtrun mrô 3 hăng pok pơhai ngă tui Hră pơtrun mrô 8 mơ̆ng anom bruă Ping gah tơring čar kơ bruă man pơdong plơi pla phrâo.

Khua mua tơring čar Dak Lak nao čuă anih pơdă gơnam sĭ mơdrô hơmâo phara mơ̆ng tơring čar

Rơgao 10 thun hơmâo tơlơi ngă hrom abih bang glông bruă kơđi čar mơ̆ng tơring čar trun nao pơ plơi pla, biă mă mơnuih ƀôn sang dong yua amăng tơring čar, Dak Lak hơmâo pơhrui glăi lu boh tŭ yua yôm amăng bruă man pơdong plơi pla phrâo; hơmâo 4/15 boh anom bruă gưl tơring glông dưi ngă djơ̆ tơhnal pơkă plơi pla phrâo, amăng anun, mơ̆ng 1-2 boh anih gưl tơring glông ngă djơ̆ tơhnal pơtrun plơi pla phrâo; rơnoh prăk pơhrui glăi mơ̆ng mơnuih ƀôn sang đĭ tui 1,3 wơ̆t pơkă hăng thun 2020; hơmâo 200 gơnam OCOP dưi hơmâo hră pơsit mơ̆ng 3 asar pơtŭ pơngŏ.

Kiăng dưi ngă djơ̆ tơhnal pơkă anai, anom bruă Ping gah tơring čar Dak Lak rơkâo djop sang bruă ping gah sem glăi pơtrut ngă đang hmua, plơi pla, mơnuih ngă hmua jing bruă mă phun đing nao amăng bruă kơđi čar laih anun tơlơi glăm ba mơ̆ng abih bang mơnuih mơnam; pơđĭ tui lu hloh tơlơi thâo hluh, pơblih phrâo tơlơi pơmin ngă hmua, plơi pla, mơnuih ngă hmua amăng bruă man pơdong plơi pla phrâo.

Nay Jek: Pơblang