VOV4.Jarai - Tơdơi kơ sui hrơi pơdơi bruă yua klin Covid-19 ngă, ră anai anom bơwih ƀong tuai čuă ngui Dak Lăk hơmâo pok glăi laih, amăng ƀrư̆ bơwih ƀong glăi. Hrŏm hăng anun, pơđĭ tui hơdôm mơta gơnam glăk hơmâo, hơmâo lu anom bruă ĕp jơlan pơđĭ kyar gơnam phrâo đah mơng ngă pơhưč tuai ƀơi tơring čar.

Tơdơi kơ 8 blan pơdơi bruă yua klin Covid-19 ngă, dong mơng hrơi tê̆t truh ră anai, anih čuă ngui amăng plơi pla Ko Tam ƀơi plơi prong Buôn Ma Thuột, tơring čar Dak Lăk hơmâo pok glăi laih bơwih brơi kơ ƀing tuai. Hlâo kơ anun, mah pơdơi čơkă tuai amăng 8 blan mơtăm, samơ̆ anom bơwih ƀong ăt tla prăk blan kơ 20 čô mơnuih pla, wai lăng bơnga, phun kyâo pơtâo, pơgang ba dram gơnam, pơkra glăi homestay. Mơng hrơi pok amăng čơkă tuai, hrŏm hăng bruă hơmâo hơđăp, anom bruă hơmâo pơphun pơkra hơdôm gơnam phrâo dong, pơphun ngă lu tơlơi čuă ngui hyu lăng anih anom, đih pơdơi, mă bruă tom mơnuih ƀon sang, bơwih brơi tui hluai kơ tơlơi rơkâo mơng ƀing tuai. Laih dong pơhlôm pơgang klin Covid-19 klă mơn. Yă Nguyễn Thị Ngọc Anh, khua wai lăng Kông ti pơčruh ngăn tuai čuă ngui Ko Tam brơi thâo:

“Ko Tam jing anih hơmâo tơlơi ngui ngor rông bui mơnŭ, pla kơphê, pla añăm pơtăm, rông akan, luai ia, hơmâo tơket tơkeng tơlơi či ngui laih. Hyu ngui sem lăng gru grua thun anai gơmơi ƀu brơi mơñum tơpai čeh dong tah, kơnong atông čêng, suang kiăo tui grup anet đôč, ƀu dưi pơƀut lu mơnuih ôh. Hơdôm tơlơi bơwih brơi bruă ngui ngor tui hluai tơlơi kiăng mơng ƀing tuai mơn, kiăng ngui ngor, pel ĕp, lăng ƀuh ƀơi mơta, hơdip hrŏm ƀong hrŏm hăng ană plơi lĕ gơmơi amra bơwih brơi mơn, samơ̆ khŏm hơmâo mông prăp lui, lăi pơthâo hlâo ƀơ̆i, gơmơi ƀu ba pơƀuh tơket tơkeng ôh.

Mông pơdơi bruă, hơdôm anom bruă bơwih brơi tuai ăt gir pơkra glăi gơnam tam mơn.

Ăt anăp nao hơdôm mơta tơlơi ngui ngor phrâo ngă pơhưč ƀing tuai, Kông ti TNHH Tuh pơ plai tuai hyu ngui hăng sĭ mơdrô Đam San ƀơi plơi prong Buôn Ma Thuột ruah bruă hyu ngui mơtah či pơđĭ kyar. Ơi Lê Hoàng Cơ, Khua kông ti brơi thâo, mơng hơdôm tơlơi hơmâo hơđăp, tơlơi phara gah anih dŏ, lŏn tơnah, anom bruă glăk akŏ pơjing hăng anăp nao tơlơi ngui ngor hyu čuă đang hmua, đih pơdơi ƀơi lŏn adai rơ-ơ̆, ƀ’hưč kơ angin, ƀrô sem lăng, pel lăng tơl tơngan, ƀrô ngă mơ-ak amăng drơi jăn dong. Laih dong, kông ti ngă hrŏm hăng hơdôm anom bruă mơng tơring čar Dak Nông, Khánh Hòa pơtruh nao rai hăng tour hyu ngui kah hăng hyu lăng hmua pơdai, mơnơi amăng lŏn pluk, đih pơdơi. Ơi Lê Hoàng Cơ pơsit:

“Anom bơwih ƀong glăk anăp nao hyu ngui pơđĭ kyar mơtah mơda, biă ñu lĕ pơđĭ kyar hyu ngui čuă lăng đang hmua, anăp nao brơi ƀing tuai nao pơ anai đih pơdơi. Ră anai, kông ngăn ayuh hyiăng lŏn adai djru ba lu biă, pơhmutu hơdôm đang prong ƀơi anai lu biă, laih anun amăng mông anai jing hrơi gêh gal amăng bơyan man pơdong, pơtrut pơsur gơnam pơkra mơng kơphê, ta ba ƀing tuai nao lăng tơdron ngă kơphê đah mơng hơduah ĕp dlăm hloh kơ kơphê ăt kah hăng anih mơ hơmâo adai rơ-ơ̆, mơ-ak, dưi pơdơi pơdă. Đam San glăk pơtruh nao rai mơng Dak Nông yua dah Đam San glăk pơđing nao ƀuôn Choá, tơring glông Krông Nô jing tơring hơmâo hmua pơdai ƀơi kual lŏn pơtâo apui bazan, anun ñu hơmâo anŏ phara hăng kual lŏn tơthă hăng lu kual lŏn pơkŏn.

Mă yua tơlơi gêh gal mơng ayuh hyiăng, gru grua či pơđĭ kyar tuai hyu ngui tui hluai kơ tuai rơkâo.

Tui hăng mrô jŭ yap mơng Gơnong bruă gru grua - Bơkơjăp drơi jăn hăng Tuai čuă ngui Dak Lăk, amăng bơyan tê̆t phrâo rơgao, hơmâo laih năng ai 144 rơbâo wơ̆t čô mơnuih rai ngui pơ Dak Lăk, ngui ngor, hyu čuă lăng ƀơi abih bang 21 anih hyu ngui, đĭ dua wơ̆t pơhmu hăng thun hlâo. Tui hăng yă Nguyễn Thuỵ Phương Hiếu, Kơ-iăng khua gơnong bruă Gru grua - Bơkơjăp drơi jăn - Tuai čuă ngui tơring čar Dak Lăk, anai lĕ tơlơi hok mơ-ak yua dah amăng rơbêh 2 thun rơgao, anom bruă tuai hyu ngui bơbeč djơ̆ lu tơlơi truh, prăk pơhrui glăi ƀu hơmâo, mă bruă hơm âo lu tơlơi tơnap biă.

Ăt tui hăng yă Hiếu mơn, ră anai bruă tuai hyu ngui glăk kiăng rŭ glăi, ƀrô pơtrut nao rai ngă hrŏm hăng hơdôm plơi pla pơđĭ kyar bruă hyu ngui rah, ngă phrâo pơkra gơnam bơwih brơi kơ ƀing tuai hyu ngui rah đah mơng pơhưč ƀing tuai. Hrŏm hăng bruă pel ĕp bruă pơhlôm pơgang klin ƀơi hơdôm anom bruă tuai hyu ngui, anom bruă tuai hyu ngui glăk gir pơtruh nao rai, pơƀuh sĭ gơnam tuai čuă ngui hơmâo mơng tơring čar mơtăm.

“Pơphun bruă sem lăng, pơkra gơnam tuai hyu ngui phrâo, jum dar 4 boh tơring glông nao hlâo pơ kual lŏn ia kơ hơdôm bơwih ƀong. Amăng mông anai amra hrŏm hăng plơi pla pơkra rai gơnam pioh kơ tuai čuă ngui. Phrâo anai gơmơi hơmâo lăng pơkra gơnam ƀơi plơi prong Buôn Ma Thuột bơdjơ̆ nao kơphê, ngă hmua hăng plơi pla. Tui hluai kơ tơlơi hơmâo mơng rim plơi pla mơn, giong anun amăng mông klin kheng, tui hluai kơ klin tơdu kơtang mơn amra brơi anom bơwih ƀong amra hơmâo hơdôm gơnam phrâo ăt kah hăng pơkra phrâo gơnam mơng hơdôm anom bơwih ƀong ƀơi anom bơwih ƀong.

Dak Lăk hơmâo lu anih anom hiam, prong či pơđĭ kyar tuai hyu ngui.

Tuai čuă lăng đang hmua jing jơlan đĭ kyar hơmâo anom bruă tuai čuă ngui Dak lăk ruah ngă pơhưč ƀing tuai.

Tơdơi kơ hrơi sem lăng hăng akŏ pơjing, sa, dua mơta gơnam kah hăng tour “Famtrip Caraval- Dap Kơdư hing ang”, Jơlan hơdră adoh ngă sen “Khát vọng Đam San”, hơdôm bruă gru grua - adoh suang - bơkơjăp drơi jăn prong hơmâo pơphun ƀơi Dak Lăk čang rơmang amra jing sa amăng hơdôm tơlơi phara, djru rŭ glăi hăng pơđĭ kyar bruă tuai hyu ngui ƀơi tơring čar. Biă ñu hăng bruă pok amăng čơkă tuai čar rơngiao glăk hơmâo ngă ră anai, Dak Lăk čang rơmang bruă tuai hyu ngui amra đĭ kyar glăi, dưi mă yua tơlơi gêh gal, tơlơi hơmâo, anăp nao čơkă rơbêh 900 rơbâo wơ̆t čô tuai nao ngui pơ Dak Lăk amăng thun anai.

H’Xíu H’mốc: Čih - Siu H’Mai: Pơblang