Dong amăng mrô sang anŏ ƀun rin, kơƀah lŏn ngă hmua, rơkơi ñu rơngiă giăm 3 thun laih yua ruă kă, amai H’Rung Mlô (amĭ Trâm) dŏ ƀơi plơi Ea Kjoh A, să Ea Drông, plơi prong Buôn Hồ hajăn ñu gơgrong rông 2 čô ană glăk truh thun hrăm hră. Ƀuh hơmâo tơlơi tơnap tap tui anun, ñu hơmâo arăng djru brơi sa drơi rơmô ania hăng dua drơi bê pioh rông tuh hrôh. Hrŏm hăng anun, hluai tui akŏ bruă “Hrưn đi” ñu hơmâo arăng črâo brơi boh thâo rông hlô mơnong kiăng pơhlôm tuh hrôh lu hloh.

“Kâo hơmâo arăng djru brơi rơmô hăng bê tui hơdră djru brơi sang anŏ ƀun rin, tơlơi hơdip tơnap tap hloh, aka ƀu thâo ngă hiưm pă kiăng pơđĭ kyar bơwih ƀong huă. Ăt čang rơmang hơmâo pran kiăng gir run bơwih ƀong, pơđĭ kyar rông hlô mơnong kiăng hơmâo dong prăk pơhrui brơi ană bă nao hrăm hră truh anih”.

“Hrưn đĭ” lĕ akŏ bruă yua grup djru ană mơnuih pơklaih mơng rin rơpa tar ƀar rŏng lŏn tơnah hăng djru brơi ječ ameč (CARE jar kmar) ƀơi Việt Nam gum hrŏm hăng anom bruă pơđĭ kyar mơnuih mơnam hăng hơdôm anom bruă gum djru glăk pok pơhai ƀơi Dak Lak. Tui anun, amăng 2 thun mơng thun 2023-2024, akŏ bruă anai anăp nao pơtrut pơđĭ kyar djru brơi tơlơi bơwih ƀong kơ hơdôm boh sang anŏ, sit biă ñu lĕ ƀing đah kơmơi djuai ania ƀiă ƀơi 2 boh să Ea Drông hăng Čư̆ Bao, plơi prong Buôn Hồ. Tui yă Vũ Lan Hương, Khua wai lăng akŏ bruă mơng Grup CARE jar kmar ƀơi Việt Nam, akŏ bruă amra gum djru brơi giăm 4.000 čô mơnuih tui jơlan hơdră “djă tơngan črâo bruă”, mơng bruă man pơkra drông war, pơluk gơnam ƀong, pơgang klin kman brơi hlô rông; truh pơ hơdôm boh thâo ngă bơkơnar tuh pơ alin hăng blơi gơnam kiăng thâo pơkrem. Črăn brơi bruă akŏ pơjing hăng tŏ tui hơdôm hơbô̆ bruă pơkrem, jak iâu gum pơgôp mơng mơnuih mơnam kiăng hơmâo prăk čan brơi neh met wa. Pơphun hơdôm tal pơbưp, nao bưp hơdôm anom bruă blơi pơhrui, pơkra pơjing kiăng hrưn đĭ nua gơnam tam. Sui pơ anăp dong lĕ anăp nao pơjing hơdôm gơnam tui OCOP. Yă Vũ Lan Hương brơi thâo, amăng 2 thun, akŏ bruă hơmâo ba tơbiă hơnong pơkă pơgôp pơplih tơlơi hơdip brơi giăm 15.000 čô hăng ngă lar hyu tơlơi yôm anai amăng mơnuih mơnam, hăng đing nao hloh brơi ƀing đah kơmơi djuai ania ƀiă.

“Amăng akŏ bruă anai, ƀing gơmơi amra hơmâo 3 mơta bruă phun, blung hlâo lĕ hơdôm bruă bơdjơ̆ nao hrưn đĭ klă dong amăng pơđĭ kyar tơlơi bơwih ƀong, hơmâo hơdôm bruă bơdjơ̆ nao boh thâo bơwih ƀong, pla pơjing, rông hlô. Gum djru kiăng neh met wa thâo dong hơdôm bruă bơdjơ̆ nao wai lăng prăk kak hăng dưi hyu čan prăk kiăng tuh pơ alin bơwih ƀong. Hăng tơlơi yôm hloh kiăng dưi pơđĭ kyar bơwih ƀong hơđong kjăp, anun lĕ ĕp anih sĭ mơdrô, kiăng gêh gal ba sĭ gơnam tam hăng pơhlôm na nao amăng 3 mơta anun, anai lĕ hơdôm bruă ngă pơmut hrŏm hăng mơnuih mơnam kiăng ngă hiưm pă kơtưn pơlir hơbit kơplah wah abih bang ding kơna amăng ƀon lan hăng pơtrut boh pơhiăp hăng tơlơi gơgrong mơng đah kơmơi brơi klă dong amăng hơdôm bruă bơwih ƀong truh pơ sĭ mơdrô”.

Čư̆ Bao hăng Ea Drông lĕ 2 boh să ngă hmua, hăng rơbêh 80% mrô mơnuih djuai ania ƀiă, tơlơi hơdip kơ neh met wa dŏ lu tơnap tap. Ơi Võ Văn Sự, Khua anom bruă bơwih ƀong plơi prong Buôn Hồ brơi thâo, mơng hơduah ĕp brơi ƀuh 2 boh să hơmâo lu tơlơi gêh gal kiăng rông rơmô hăng bê. Yua anun, bruă pok pơhai akŏ bruă čang rơmang pok rai tơlơi dưi kiăng mơnuih ƀon sang pơđĭ kyar bơwih ƀong huă tŭ yua ƀiă dong.

“Ayuh hyiăng lŏn mơnai ƀơi Buôn Hồ lăi hrŏm hăng 2 boh să anai hnun mơn gêh gal kiăng pơđĭ kyar bruă rông hlô mơnong, sit biă ñu lĕ bê ră anai nua sĭ đĭ pơmă, hăng dưi ba sĭ mơdrô hơđong. Yua anun lĕ pok pơhai akŏ bruă ania lĕ lăp djơ̆ hăng 2 boh să anai. Tơlơi čang rơmang blung a amra pơplih tơlơi pơmĭn amăng bruă rông hlô mơnong mơng mơnuih djuai ania ƀiă, pơgôp pơhrŏ trun ƀun rin, hrưn đĭ tơlơi hơdip kơ mơnuih ƀon sang. Hăng mơng akŏ bruă anai amra ngă lar hyu ƀơi djop anih dong.