VOV4.Jarai - Mơguah lơ 30/9, Jơnum min mơnuih ƀôn sang tơring čar Daknông pơphun ngă lơphet lăi pơthâo Tơlơi pơsit mơng Khua dêh čar, tŭ yap plơi prong Gia Nghĩa ngă giong bruă pơdŏng plơi pla phrâo hăng čơkă mă miđai mă bruă dăp tal 3 mơng Khua mir sir dêh čar ƀơk brơi. Rơgao 10 thun pơdŏng plơi pla phrâo, truh thun 2020, 2 bôh să mơng plơi prong dưi hmâo Khua Jơnum min mơnuih ƀôn sang tơring čar Daknông tŭ yap djơ̆ plơi pla phrâo.

Ngă Lơphet lăi pơthâo Tơlơi pơsit mơng Khua dêh čar, tŭ yap plơi prong Gia Nghĩa ngă giong bruă pơdŏng plơi pla phrâo hăng čơkă mă miđai mă bruă dăp tal 3 mơng Khua mir sir dêh čar

Ƀơi Tơlơi pơsit mrô 472 lơ 18/4/2022, Khua dêh čar hmâo tŭ yap plơi prong Gia Nghĩa ngă giong bruă pơdŏng plơi pla phrâo. Pơhiăp amăng mông ngă lơphet, ơi Đỗ Tấn Sương, Khua Jơnum min mơnuih ƀôn sang plơi prong Gia Nghĩa brơi thâo, tơdơi kơ ngă giong 19/19 tơhnal pơkă plơi pla phrâo, ƀô̆ mơta hơdôm bôh să gah plơi prong hmâo lu pơplih hloh rơnoh pơkă, tơlơi bơwih ƀong đĭ kyar klă, hơdră bơwih ƀong hmâo tơlơi pơplih klă. Prăk pơhrui glăi hơnong ñu lom sa čô mơnuih ƀơi hơdôm bôh să ră anai hmâo rơbêh kơ 53 klăk prăk sa čô mơnuih, sa thun, đĭ 2,6 wot bơhmu hăng thun 2011. Plơi prong ră anai kơnong kơ dô̆ 146 bôh sang anô̆ ƀun rin, hmâo 0,77%. Anai lĕ phun than pioh Gia Nghĩa ngă tui dong pơ̆ anăp anai./.

VOV.VN čih

Siu H’ Prăk pơblang