Hlâo adih, ơi Briu Chéo, djuai ania Cơ Tu, ƀơi să čư̆ siăng Bến Giằng, ƀon prong Đà Nẵng (tơring glông Nam Giang, tơring čar Quảng Nam hơđăp) juăt ngă hmua, pla pơjing đôč, hyu mă bruă apah, samơ̆ ăt dŏ rin đôč. Ơi Briu Chéo čan prăk mơ̆ng sang bruă prăk rơbêh kơ 200 klăk, hơmâo gong gai djru anah djuai phun pla, hlô rông, ơi Briu Chéo pok prong anih rông rơmô, bui, pla boh troh. Ră anai đang hmua mơ̆ng ơi Briu Chéo hơmâo giăm 200 drơi rơmô, bơbui jŭ wơ̆t hăng đang boh troh..Đang hmua rông pla gơnam mơ̆ng ơi Briu Chéo hơmâo lu mơnuih nao lăng, hrăm tui. Sang anŏ pơkŏn amăng plơi pla tơnap tap, hơmâo ơi Briu Chéo djru ba mơn:“Sang anŏ gơmơi hơmâo prăk čan kơmlai aset đôč, anun yơh pioh bơwih ƀong, djru sang anŏ hơđong tơlơi hơdip, hơmâo hơmăi hloh, hơdip jơnap hloh mơn. Pơ anăp dong, čang rơmang gong gai djru ba brơi čan prăk, pơtô brơi rông hlô mơnong hiưm pă dong. Neh met wa amăng plơi anai, sang anŏ hlơi thơ kiăng pơtô brơi lĕ kâo pơtô brơi, djru brơi gơñu hơmâo bruă mă, hơmâo prăk kăk ƀiă dong”.

Amai Bhnướch Thị Blắc, djuai ania Cơ Tu, ƀơi să A Vương, ƀon prong Đà Nẵng (tơring glông Tây Giang, tơring čar Quảng Nam hơđăp) hơdip amăng sang anŏ tơnap biă mă. Hrơi ñu phrâo dŏ rơkơi, ñu pơčrông hăng rơkơi ñu pok sang mơdrô anet amăng plơi. Yua kơ pơkom prăk, wơ̆t hăng čan thim mơ̆ng sang bruă prăk dong, ñu rông bơbui mơnŭ hăng pla boh troh. Truh ră anai, amai Blắc hơmâo pla rơbêh 2 ha boh kruăi mơmih Cam Vinh, hăng 800 phun laih dong boh kruăi dung, pơhrui hơmâo hơdôm pluh klăk prăk sa bơyan. Yua hơmâo lŏn đang, kơnua čư̆, hơmâo rok tok ƀơi anih, amai Blắc pơkra drông rông bơbui, mơnŭ hăng pla kyâo glai dong.

Sang anŏ amai Blắc pơklaih laih mơ̆ng ƀun rin, hơmâo ƀong hơmâo huă, man sang prong, blơi rơdêh ô tô či nao rai bơwih ƀong. Amai Bhnướch Thị Blắc ăt djru brơi lu mơnuih amăng plơi hơmâo bruă mă, hơmâo prăk kăk. Tơdơi kơ kah hĭ prăk či ngă hmua, rim thun sang anŏ amai Blắc dŏ glăi giăm 200 klăk prăk:“Hlâo adih, sang anŏ gơmơi tơnap biă, mơ̆ng hơmâo Sang bruă prăk djru mơnuih mơnam tơnap brơi čan prăk či pla boh kruăi mơmih, pla phun keo hăng rông hlô, mơ̆ng anun tơlơi hơdip huăi tơnap đơi dong tah. Ră anai hơđong mơn, prăk hơmâo hơmăi mơn. Tơdơi anai dua rơkơi bơnai gơmơi či čan dong mơn, kiăng pok prong hloh anih rông, pla gơnam”.

Kiăng djru ba mơnuih ngă hmua đĭ kyar bơwih ƀong, hơmâo prăk lu ƀiă, gong gai să A Vương djru ba anah phun pla, djuai hlô rông, djru ană plơi bơwih ƀong. Ơi Lưu Văn Khương, Kơ-iăng khua jơnum min mơnuih ƀon sang să A Vương, ƀon prong Đà Nẵng brơi thâo, să pơsit bruă hrŏ trun ƀun rin jing bruă kơđi čar, pok pơhai klă djŏp tơlơi pơtrun, hơdră djru mơ̆ng Gơnong dlông, ƀon prong či iâu pơthưr, djru ba mơnuih ƀôn sang lŏm tơlơi rơmon akŏn rin.

“Lu sang anŏ khin čan prăk či pok prong bruă pơkra gơnam, hơmâo lu sang anŏ jing bơwih ƀong rơgơi. Kar hăng sang anŏ amai Blắc, ayong Khánh, giong anun hơdôm boh sang pơ plơi pơkŏn dong. Să djru brơi abih pran jua yơh, pơhiăp tom hăng sang bruă prăk djru mơnuih tơnap, sang bruă prăk ngă hmua pơđĭ tui prăk brơi čan, kiăng neh met wa hơmâo prăk či bơwih ƀong”.

Ƀon prong Đà Nẵng ră anai hơmâo rơbêh kơ 50.000 čô mơnuih bơwih ƀong rơgơi, amăng anun hơmâo lu mơnuih djuai ania Cơ Tu. Rim thun, Khul ngă hmua ƀon prong Đà Nẵng ngă hrŏm hăng hơdôm gong gai, Sang bruă prăk djru brơi neh met wa čan prăk kơmlai aset đôč, brơi anah, djuai hlô, djru ană plơi bơwih ƀong huă. Lu sang anŏ lĕ djuai ania Cơ Tu khin tuh pơ alin đĭ kyar bơwih ƀong amăng sang anŏ, djru akŏ pơjing plơi pla phrâo./.