Hăng đang kơphê prong 1 hektar ( ha) rŭ pla glăi truh thun tal 3 laih, bơyan pĕ boh thun anai, sang anŏ ơi Triệu Văn Phúc, dŏ ƀơi plơi, thôn 3, să Čư̆ Suê, tơring glông Čư̆ Mgar, tơring čar Dak Lak pĕ hơmâo 5 tơn asar kơphê krô. Ñu brơi thâo, rơnoh kơphê hơdôm anai, lu hloh giăm dua wơ̆t pơkă hăng thun hlâo. Aka yap ôh pơ anăp anai, rơnoh pơhrui glăi amra lu tui yua hơmâo lu phun pla pơkŏn hrŏm plah wah amăng đang kơphê. Hăng rơnoh sĭ mơdrô kah hăng ră anai, rim thun sang anŏ gơñu pơhrui glăi truh 800 klăk prăk. Tui hăng ơi Phúc, dưi hơmâo rơnoh pơhrui glăi kah hăng anun lĕ yua sang anŏ ñu pla hrŏm sa blah đang hmua hăng lu mơta phun boh troh hơmâo rơnoh yôm, hla tui hơdră pơtô ba mơ̆ng Sang bruă ngă ƀong hrŏm gah đang hmua hăng bơwih bơwăng Bình Minh.

“Sang bruă ngă ƀong hrŏm hơmâo pơtô brơi mơnuih ngă hmua, mơnuih ƀôn sang hla tui hơdră ngă hmua pla pơjing djơ̆ mơneč phrâo ia rơgơi dưm kmơ̆k pruai hơbâo, pruih ia jrao pơgang phun pla, pơdjai hlăt kman djơ̆ hơdră,...Ngă tui djơ̆ tơlơi pơtô mơ̆ng sang bruă ngă ƀong hrŏm gah đang hmua pơtô hơmâo lu boh tŭ yua, pơhrui glăi prăk kăk lu mơ̆n. Yua kơ hlâo adih, ta ngă tŭ kơ hơmâo tui hluai tơlơi thâo găn rơgao mă pô lĕ ƀu tŭ yua ôh”.

Ăt ngă hrŏm ding kơna ngă ƀong hrŏm mơ̆ng hơdôm thun phrâo akŏ pơdong, amai Triệu Thị Hạnh lăi, rim ding kơna lêng kơ nao hrăm, ĕp tui tơlơi pơtô ba yua boh thâo ia rơgơi, mơneč mă bruă. Ƀing ding kơna amăng sang bruă ngă ƀong hrŏm lĕ ƀing hlăk ai thâo hră laih anun glăi pơtô ba hăng dưm truă đing ia bruih thâo pơkrem samơ̆ djơ̆ lăp, jak iâu ding kơna amăng khul ngă tui pla pơjing hơdră yua kmơ̆k hơbâo pruai hăng ia jrao ƀiă đôč, ba yua kmơ̆k hơbâo pruai djah djâo, hlao kyâo brŭ lŭk hrŏm eh rơmô, hlô mơnong rông, akan brŭ pơjing kmơ̆k pruai, ñu ngă hiam brơi lŏn mơnai glai klô ayuh hyiăng. Laih dơ̆ng, ngă hrŏm djru pơtô ba mơ̆ng bruă phrâo pla, wai lăng răk rem truh kơ bruă pĕ boh pơhrui glăi gơnam đang hmua ba sĭ mơdrô.

“Dơ̆ng mơ̆ng hrơi phrâo mut ngă ding kơna sang bruă ngă ƀong hrŏm gah đang hmua Bình Minh lĕ, hơmâo nao hrăm lu anih arăng pơtô ba. Tơdơi kơ hrăm ta hơmâo tơlơi pơmin pơblih yơh amăng bruă mă, hlâo adih tŭ kơ ngă bruă, pĕ sĭ mơtah ƀudah krô hai ƀu hơmâo kơmlai lu ôh. Ƀuh Kơnuk kơna hơmâo lu jơlan hơdră djru brơi anom ngă ƀong hrŏm kiăng kơ ƀing ding kơna amăng sang bruă thâo hluh hơdră mă bruă phrâo, ngă hmua pla kơphê, tiu plah wah amăng đang anun ba glăi boh tŭ yua lu hloh”.

Akŏ pơdong mơ̆ng thun 2016, Sang bruă ngă ƀong hrŏm gah đang hmua hăng bơwih bơwăng Bình Minh hơmâo 27 čô ding kơna lêng kơ mơnuih ƀôn sang djuai ania Yao dŏ amăng plơi Bình Minh ƀudah anăn phrâo  ră anai thôn 3, să Čư̆ Suê, tơring glông Čư̆ Mgar. Amai Triệu Thị Châu, Khua sang bruă ngă hrŏm anai brơi thâo, yua hơmâo 17 čô ding kơna lĕ hrăm truh gưl prong, đại học, cao đẳng, anun yơh anom bruă pok pơhai bruă mă amuñ gêh găl hăng hmar hloh. Truh ră anai, sang bruă ngă hrŏm hơmâo laih sa boh kual ngă hmua pla kơphê truh 108 ha, pla plah wah hăng lu mơta phun pla pơkŏn kah hăng tiu, boh sầu riêng, boh ƀơr..., hăng hơdôm mơta gơnam anun pơjing rai gơnam sĭ mơdrô djơ̆ hnong hăng rơnoh pơmă hloh lu arăng rơkâo blơi:

“Trà boh khet mơda mơ̆ng sang bruă ngă hrŏm pô pơkra ming laih ba nao sĭ mơdrô, lu mơnuih blơi yua hor biă mă. Ră anai, hơmâo dơ̆ng boh sầu riêng ngă pơkrô, ƀhu, hna krô pioh lui sui hăng boh mit tơsă ăt ƀhu ngă pơkrô sĭ mơdrô arăng hor blơi soh. Mơ̆ng anun yơh, ta pơmin tơdah ƀu pơkra ming klă, pioh lui sui pơjing gơnam sĭ mơdrô hơdjă tơnap biă mă sĭ mơdrô hơmâo rơnoh laih anun khom gir run pơkra ming hiam klă, pơjing mơnong ƀong rơgoh kah tŭ yua, bruă anai ngă tui ƀơ ƀrư̆. Čang rơmang hơdôm mơta gơnam hơmâo pơkra ming mơ̆ng ding kơna sang bruă ngă hrŏm gơmơi amra ba hyu truh pơ tơring čar pơkŏn, dưi ba hyu djop djang anih amăng dêh čar Việt Nam ta”.

Yua thâo pơblih amăng tơlơi pơmin bruă ngă, lir hơbit ngă hmua pla pơjing hơđong kjăp, tơlơi hơdip mơda ƀing ding kơna amăng sang bruă ngă ƀong hrŏm ƀu pơdơi ôh pơđĭ tui na nao. Rơnoh pơhrui glăi pơkă dưm dưm rim sang anŏ ngă ding kơna pơhrui glăi mơ̆ng 300-500 klăk prăk sa thun. Nguyễn Công Văn, Kơ-iăng Khua jơnum min mơnuih ƀôn sang tơring glông Čư̆ Mgar lăi pơtong:

“Sang bruă ngă ƀong hrŏm gah đang hmua Bình Minh lĕ sa amăng hơdôm anom bruă ngă hrŏm mă bruă tŭ yua biă mă. Ƀu kơnong kơ anom bruă pơke kơphê đôč ôh, gơñu dŏ pơphun ngă hrŏm pơtruh nao rai hăng anih blơi yua gơnam sĭ mơdrô hơmâo pơkra ming mơ̆ng boh troh đang hmua, djop mơta boh troh pioh ƀong hăng gơñu ngă klă ĕp anih blơi, anun pơjing rai gơnam sĭ mơdrô hơmâo rơnoh yôm, djru bruă mă dưi hơđong. Sa mơta tơlơi dơ̆ng ƀing gơmơi đing nao hloh lĕ hăng hơđong pran jua, anun lĕ tơlơi gum pơgôp sa pran jua mă bruă thâo pơčeh phrâo amăng khul ngă khua git gai sang bruă, gơñu git gai wai lăng tŭ yua hăng thâo pơpŭ tơlơi dưi mơ̆ng mơnuih ƀôn sang amăng bruă mă ba sang bruă gơñu ngă hrŏm hruaih”.

Khin hơduah ĕp ba yua boh thâo ia rơgơi, mơneč mă bruă djơ̆, lir hơbit, pơkra ming pơjing rai gơnam ƀong huă sĭ mơrô..., hơdôm čô mơnuih ngă hmua mut ngă ding kơna sang bruă ngă ƀong hrŏm Bình Bình, plơi pla djuai ania Yao, ră anai iâu thôn 3, hơmâo djru hrŏm ngă pơblih tơlơi pơmin klă hiam, pơđĭ tui boh tŭ bơwih ƀong huă hăng pơđĭ rơnoh sĭ mơdrô djru mơnuih ngă hmua amăng kual plơi pla djuai ƀiă Yao ƀơi să Čư̆ Suê, tơring glông Čư̆ Mgar, Dak Lak pơđĭ kyar.