Jing kual giăm 2 boh să Dak Nuê hăng Dak Liêng anun Jơlan prong 27, găn nao ƀuôn Tơ, să Dak Liêng, tơring glông Lăk, tơring čar Dak Lăk hlâo adih jing “anih jŭ” kơ asuk ruk hăng anih tuh asuk ča čot glông giăm 100m. Kiăng pơsir hĭ anih ngă sat anai, hlăk ai 2 boh să Dak Liêng hăng Dak Nuê juăt hyu duñ pơƀut asuk, laih dong dưm camera krăp lăng kiăng ƀuh pô tuh asuk hăng bơtơhmal. Tui hăng amai Sao Mai Len, Khua grup hlăk să Dak Liêng, tơlơi pơmin “dưm camera rơnuk rơnua lŏm hĭ anih tuh asuk” hơmâo pơphun mơ̆ng rơnuč blan 7/2023, jing tŭ yua hmao tlôn mơtăm yơh.

“Hlâo adih gơmơi hlă mơn gŏng čih pơthâo “kŏm tuh asuk” samơ̆ ƀu dưi lơi. Tơdơi kơ ƀing gơmơi dưm truă camera lĕ ăt hơmâo mơn 2 čô mơnuih nao tuh asuk, sa čô lĕ hơmâo pơtô lăi, rơmet hĭ asuk ñu phrâo tuh. Pô tal dua lĕ Jơnum min mơnuih ƀôn sang să bơtơhmal, phak ñu 1 klăk. Lơ̆m ƀing gơmơi dưm camera lĕ lu mơnuih thâo, anun ăt plai ƀiă mơn nao tuh asuk. Ană plơi thâo hluh tui mơn, aka ƀu hơmâo dong tah pô ngă soh”.

Amai Phan Thị Hoa, ƀơi ƀuôn Tơ, să Dak Liêng, hơdip giăm anun, ăt ƀuh mơn tơlơi pơplih klă hiam anai:

“Mơ̆ng hrơi hơmâo dưm truă camera lĕ lăng pơplih mơ̆ng 70-80%, ră anai abih bang ƀu nao tuh asuk pơ anun dong tah. Ngă hiư̆m pă kiăng anih hơdip, jơlan nao rai ta agaih hiam ta amra gum ngă yơh, yua dah anun lĕ bruă klă kơ abih bang”.

Kiăng sut lui hlao anih tuh asuk ƀơi giăm guai, ƀing hlăk ai ƀơi 2 boh să Dak Liêng hăng Dak Nuê ăt pla rok hơbơi ngu dong ƀơi jơlan nao rai. Truh ră anai, ƀơi anai bơnga glăk bluh hiam, hla mơtah mơda.

Tui hăng ayong Phạm Ngọc Thắng, Khua hlăk ai tơring glông Lăk, dưm camera hăng pla bơnga sut lui anih tuh asuk jing hơbô̆ bruă phrâo, lăp djơ̆ hăng plơi pla. Mơ̆ng anun djru pơđĭ tui tơlơi gơgrong bruă mơ̆ng hlăk ai amăng bruă pơgang ayuh hyiăng anih hơdip, rơngiao kơ bruă gum tơngan pơgang ayuh hyiăng, hrơi năm ƀudah hrơi tơjuh mơtah hơmâo pơphun mơ̆ng hlâo truh ră anai. Bruă dưm truă camera hăng bơtơhmal ƀu djơ̆ či ƀong prăk ôh phun ñu, samơ̆ mơ̆ng bruă bơtơhmal anai lĕ arăng ngă klă tui, thâo pơmin tui amăng bruă dun pơƀut asuk.

“Hơbô̆ bruă tui anun klă hăng lăp djơ̆, ƀing hlăk ai dưi djru amăng bruă pơgang ayuh hyiăng. Amăng hrơi blan pơ anăp, Khul apăn bruă hlăk ai tơring glông him lăng amra pơphun ngă ƀơi abih bang 11 boh să, tơring kual, rim boh să ngă ƀơi sa anih. Tơdơi kơ anun hơdôm boh să amra ngă hrŏm hăng Grup wai lăng hơdôm boh plơi pla pok prong tui hơbô̆ bruă anai. Dưm truă camera anai jing bruă blung a đah mơ̆ng pơđĭ tui tơlơi thâo pơmin mơ̆ng mơnuih ƀôn sang, laih dong amra bơtơhmal hai, mơ̆ng anun mơnuih ƀôn sang amra thâo hluh tui. Ăt čang rơmang pơtrut pơsur ƀing hlăk ai akŏ pơdong grup ngă hrŏm duñ pơƀut asuk, tơdah hơmâo mơnuih ƀôn sang gum pơgôp amra klă biă”.

Ăt tui hăng ayong Phạm Ngọc Thắng, tơlơi pơčeh phrâo dưm camera hăng pla bơnga pơgăn bruă arăng tuh asuk mah klă laih, samơ̆ aka ƀu dưi pơsir đut tơhnal lơi. Ƀu tuh asuk pơ anai, neh met wa nao tuh asuk pơ pơkŏn, yua dah ră anai lu plơi pla, să amăng tơring glông aka ƀu hơmâo anih tuh asuk ôh, laih anun aka ƀu hơmâo rơdêh nao pơƀut asuk ôh. Tơdah bruă dun pơƀut asuk hơmâo pơsir abih bang kah, hơdôm boh măi camera, đang bơnga mơ̆ng dưi pơtrut tui boh tŭ yua sui./.