Dap Kơdư lĕ kual čư̆ siăng prong prin, raih ataih rơbêh kơ 5 bôh tơring čar lĕ Kon Tum, Gia Lai, Dak Lak, Dak Nông, Lâm Đồng. Anai lĕ anih anom dô̆ hơdip mơda mơ̆ng plơi pla mơnuih ƀôn sang lĕ neh wa djuai ania ƀiă hmâo bôh thâo đưm lu mơta, pha ra. Dap Kơdư hmâo ayuh hyiăng rơ-ơ̆, glai klô lu mơta, bôh thâo đưm pha ra, lu gru grua, kông ngăn đưm dưi hmâo UNESCO čih djă pioh. Hơdôm tơlơi anai pơjing tơhnal gal prong prin, ha jăn pioh pơđĭ kyar djop djuai bôh than tuai čuă lăng bôh thâo, plơi pla, glai klô, čuă lăng kual pơlir hơbit pơhưč pran jua, pơjing nua yôm prong kơ bruă bơwih ƀong. Khă hnun hai, bôh nik, bruă mă yua anô̆ gal anai dô̆ lu tơlơi akă gal hăng glăk bŏng glăi hăng hơdôm tơlơi tơnap kah hăng tơhnal juăt bruă amăng pơphun bruă tuai čuă ngui akă prong, tơlơi pơlir hơbit kual akă ba glăi bôh tơhnal, anih anom mă yua kơ tuai čuă lăng akă lu.

Amăng mông bơkơtuai, ƀing juăt bruă, mơnuih kơsem min bôh thâo đing nao pơdah, bơkơtuai hơdôm tơlơi kah hăng tơlơi pơmin kơ pơđĭ kyar kơjăp tuai čuă lăng bôh thâo hăng glai klô; tơhnal gal hăng mă yua hơdôm ngăn rơnoh pơđĭ kyar anih anom tuai čuă lăng bôh thâo đưm hăng glăi klô plơi pla kual Dap Kơdư; Pơsit gơnam tam anih anom hăng pơlir hơbit pơtrut lăi pơhưč kiăng pơđĭ kyar kơjăp sui thun tuai čuă lăng bôh thâo đưm, hăng čuă lăng glai klô kual Dap Kơdư amăng rơnuk anai; Pơsit jơlan gah, jơlan pơsir pơđĭ kyar kơjăp sui thun tuai čuă lăng bôh thâo đưm, čuă lăng glai klô kual Dap Kơdư;... Pơ ala kơ Grŭp čih tơlơi gum lăi pơthâo mơ̆ng Đại học Tây Nguyên lăi pơdah tơlơi čih kơ Pơđĭ kyar bruă tuai čuă lăng hluai tui plơi pla kual Dap Kơdư tui jơlan kơjăp sui thun, Nai prin tha Nguyễn Thị Hải Yến brơi thâo:

 “Tơlơi ba tơbiă lĕ ngă hiưm hơpă pioh tuai rai pơ̆ Dap Kơdư lu hloh, hăng ngă hiưm hơpă pioh gơñu rai pơ̆ Dap Kơdư laih thơ, rai pơ̆ Dap Kơdư lu hloh dong. Grŭp ƀing gơmơi hmâo sa dua tơlơi pơtă jơlan pơsir pơ̆ anăp anai, kah hăng pơđĭ kyar bơwih ƀong kơ plơi pla hăng jơlan yua prăk pioh kơ kual tuai čuă lăng sit nik, ƀudah pơgang anih anom dô̆, wai lăng kơjăp sui thun kông ngăn glai klô, yua prăk pơđĭ kyar anom mă yua tuai čuă lăng, hmâo tơlơi gum hrŏm mơ̆ng mơnuih ƀôn sang ƀơi plơi pla”.

Hơdôm mơnuih čih tơlơi gum pơhiăp, mơnuih kơsem min, wai lăng ăt gum hơgôp lu tơlơi gum pơhiăp, rơkâo đĭ jơlan gah pơtrut kơtang lăi pơhing, pơđĭ tui tơlơi pơmin mơ̆ng plơi pla gah pơđĭ kyar kơjăp tuai čuă lăng bôh thâo đưm, čuă lăng glai klô; ngă giong hơdră pơtrun, hơdră bruă, pơjing pran gơgrong ngă tui bruă mă mơ̆ng plơi pla amăng pơđĭ kyar tuai čuă lăng kơjăp phik nao hrŏm hăng pơgang hăng ngă tui nua yôm bôh thâo đưm plơi pla, pơdŏng plơi pla phrâo; iâo pơhrui ngăn drăp mơnuih mơnam yua pơdŏng anom mă yua pioh kơ tuai hyu čuă lăng;.. Lăi pơthâo kơ tơlơi pơmin, pơsit jơlan gah pơđĭ kyar tuai čuă lăng sui thun mơ̆ng tơring čar Gia Lai pơ̆ anăp anai, ơi Trương Hải Long, Kơ-iăng Khua git gai Ping gah tơring čar, Khua Jơnum min mơnuih ƀôn sang tơring čar brơi thâo:

 “Tơring čar pơsit hơdôm jơlan gah pơđĭ kyar tuai čuă lăng truh thun 2030. Sa lĕ pơđĭ kyar hơdôm anom mă yua kơ tuai čuă lăng; pơdŏng anih dô̆ glăi kơ tuai; pơdŏng hơdôm rơwang bruă pơđĭ kyar tuai čuă lăng phrâo, hơdôm sang jưh tuai 4 asar bôh pơtŭ, 5 asar bôh pơtŭ hăng ngă giong ba mut mă yua hơdôm rơwang bruă hmâo pơsit giong; gum hrŏm bruă tuai čuă lăng, pok prong bơkơtuai, gum hrŏm, pơlir hơbit; đing nao pok pơhai hơdôm rơwang bruă tuai čuă ngui tui jơlan gah ruah mă djă pioh, pơjing anih anom tuai čuă lăng, pơjing yak nao phrâo kơ tuai čuă lăng”.

Ƀing khua pơ ala hmâo ba tơbiă laih, rơkâo đĭ lu jơlan gah rơđah pioh pơđĭ kyar kơjăp phik tuai čuă lăng bôh thâo hăng tuai čuă lăng glai klô kual Dap Kơdư, amăng anun hmâo: Ngă giong hơdôm hơdră pơtrun, hơdră bruă pơjing pran pơtrut kơ pơđĭ kyar tuai čuă lăng, kah hăng djru prăk kak, apah, lŏn drŏn, čan prăk, pơgang ba gah hră pơ-ar, yua prăk bruă hrŏm, anom mă bruă hrŏm, gum hrŏm bơwih ƀong, anom mă bruă hrŏm mơnuih mơnam. Iâo pơhrui, ngă pơhưč hơdôm ngăn rơnoh mơnuih mơnam yua prăk pơđĭ kyar anih anom mă bruă, măi mok pioh kơ tuai čuă lăng kah hăng anih dô̆ glăi, anih ngui ngor, pơdơi pơdă, jơlan nao rai, tơlơi pơhing lăi pơthâo, rơnuk rơnua, bruă ia jrao. Hrŏm hăng anun, kual kiăng pơtrut kơtang pơtô pơhrăm, pơtô brơi dong pơđĭ tui bôh thâo mơnuih mă bruă, biă ñu mơnuih hơđăp ƀơi anai, neh wa djuai aniă ƀiă, mơnuih mă bruă ƀơi anăp lĕ mơnuih ƀôn sang ƀơi kual gum hrŏm mă bruă ƀơi hơdôm bôh anih anom bơwih ƀong tuai čuă lăng, cuă ngui./.