Yă Đinh Thị Ngoại - Khua khul đah kơmơi plơi Lơk, să Nghĩa An, tơring glông K’bang brơi thâo, ngă tui bruă gum tơngan hrŏm man pơdong plơi pla phrâo, 5 thun laih rơgao, neh met wa amăng plơi hơmâo pơgôp hơdôm rơtuh hrơi mă bruă hăng rơbêh 1 klai prăk, ruh hĭ pơgang kiăng pok prong jơlan amăng plơi pla, pok pơkra 4 ară jơlan nao pơ hmua. 5 boh sang anŏ rin rơpa hơmâo djru man pơkra sang phrâo. Thun 2022, pơhrui rĭm akŏ mơnuih lĕ 41 klăk prăk sa čô, mrô sang anŏ ƀun rin hrŏ trun kơtang, amăng plơi ƀu hơmâo sang tơ̆i rơ̆i dong tah. Yă Đinh Thị Ngoại brơi thâo:

“Amăng bruă man pơdong plơi pla phrâo, neh met wa amăng plơi Lơk hơmâo gir kơtir mut hrŏm, ngă tui tơlơi jak iâu, thâo gum pơgôp djru tơdruă, man pơkra jơlan ƀêtông, jơlan amăng plơi pla. Tơdơi kơ mă yua boh thâo phrâo amăng bơwih ƀong huă, prăk pơhrui đĭ tui yơh, plơi pla agaih rơnăk ƀiă, bơwih ƀong huă pơđĭ kyar ƀiă pơhmu hăng hlâo adih”.

Plơi Lơk lĕ sa amăng mrô 206 boh plơi pla mơnuih djuai ania ƀiă amăng tơring čar Gia Lai hơmâo pơplih ƀô̆ mơta lơ̆m pok pơhai ngă tui tơlơi črâo trun mrô 12 mơng Khul apăn bruă Ping gah tơring čar amăng kơtưn git gai mơng djop gưl Ping gah amăng man pơdong plơi pla phrâo ƀơi kual mơnuih djuai ania ƀiă. Tui anun, hăng ngăn drăp kơnuk kơna laih dong mơnuih gum pơgôp giăm 1.500 klai prăk. Tơdơi kơ 5 thun, ră anai đơ đam tơring čar hơmâo laih 110 boh plơi pla mơnuih djuai ania ƀiă dưi ngă pơgiong hơnong pơkă plơi pla phrâo, tơlơi hơdip kơ neh met wa jai hrơi hrưn đĭ. Kiăng tŏ ngă tui tŭ yap hơdôm bruă djru mơnuih ƀon sang pơhrŏ trun ƀun rin hơđong kjăp, amăng jơnum klah čun 5 thun ngă tui tơlơi črâo trun mrô 12, ơi Hồ Văn Niên-Khua git gai Ping gah tơring čar Gia Lai rơkâo:

“Anih anom kơđi čar kiăng gum hrŏm khut khăt, ha amăng plĕ, tŭ yua, na nao hăng sit nik; jak iâu gum pơgôp hăng mă yua klă hloh, pơmut hrŏm rơnoh prăk mơng hơdôm jơlan hơdră, akŏ bruă; djru brơi mơnuih ƀon sang dưi čan prăk. Djop gơnong bruă, anom bruă amăng tơring čar hmao tlôn thâo tơlơi tơnap tap, gun găn kiăng črâo ba ƀudah hmao tlôn rơkâo đĭ anom bruă bơdjơ̆ nao sem lăng, pơsir hĭ. Gir run, ngă tui khut khăt ƀiă dong, kiăng ba glăi tŭ yua mơng tơlơi črâo trun mrô 12 tơl mơnuih ƀon sang”./.