VOV4.Jarai-Pơtong rơđah bruă mă akŏ pơdong ping gah jing bruă mă phun kjăp, Khul bruă ping gah plơi Hreng, să Hòa Phú, tơring glông Čư̆ Pah ƀu pơdơi ôh pơblih phrâo amăng bruă mă, hơdră pơphun či mă bruă, hrom hăng pok pơhai hơdôm bruă mă sit nik ngă tui amăng kual plơi pla. Biă mă ñu, Khul ping gah plơi hơmâo ngă djơ̆ tơlơi gơgrong mơ̆ng mơnuih ping gah, pô git gai pơpha bruă, tơlơi gum hrom pơtrut man pơdong plơi pla phrâo. 3 thun hăng anai, Khul ping gah plơi Hreng ngă giong bruă jao hiam klă biă mă, sa amăng hơdôm khul ping gah plơi djuai ania Jrai ba gru hlâo amăng tơring glông Čư̆ Pah lu thun hăng anai. Nao hrom bruă anun, ƀô̆ mơta hơbô̆ plơi pla, plơi Hreng, să Hòa Phú ăt pơblih phrâo hiam laih, klă hloh kơ hlâo.

Bơyan bơnga thun phrâo anai, sang anŏ amai Rčom H’Thuyêt, ding kơna Khul ping gah plơi Hreng, să Hòa Phú, tơring glông Čư̆ Pah čơkă phung wang, adơi ayong nao pơpŭ thun phrâo kơ sang anŏ ñu, dŏ amăng sang phrâo, prong hloh, yua kơ thun anai, rơkơi bơnai ñu phrâo blơi dơ̆ng tivi, rơdêh thut, hip ngă rơ-ot hăng lu gơnam yua phrâo pơkŏn yua djơ̆ bơyan, kơphê hơmâo nua. Amai H’Thuyêt brơi thâo, ngă tui bruă pơtô lăi brơi pơblih tơlơi pơmin bruă mă, hơdră bơwih ƀong huă, sui mơ̆ng anai 5 thun, ñu pơblih rŭ hĭ 3 ha kơphê, tui hơdră rŭ tui ƀơ ƀrư̆ pla phrâo pơhrua mơtam, čan prăk blơi rơmô pioh rông rơbêh 20 drơi. Tơdơi kơ 5 thun, đang kơphê gơñu mơboh lu, rơmô ñu rông tuh ană hrôh tui mơ̆n, anun sang anŏ ñu tla glăi prăk čan, laih anun dŏ hơmâo prăk djă pioh, blơi gơnam tam yua.

Khul ping gah plơi Hreng jơnum pơčrông sai bruă mă rĭm blan

Ƀu kơnong tui anun đôč ôh, pơtong rơđah jing mơnuih ping gah, khom nao hlâo djop bruă mă, amai H’Thuyêt dŏ jing sa amăng hơdôm sang anŏ mơnuih ƀôn sang ba akŏ hlâo amăng plơi ngă tui hơdră pơkra wả rơmô ataih mơ̆ng sang dŏ, pơkra sang juă glai, sang mơnơi rơgoh gah klôn sang. Hơdôm bruă ñu ngă lêng kơ hơmâo adơi amai amăng plơi tŭ ư ngă hrom, hla tui, yua ƀuh hơmâo boh tơhnal tŭ yua, anun yơh ƀing gơñu ngă tañ giong tơhnal pơtrun kơ bruă pơgang ayuh hyiăng plơi pla phrâo:

“ Kâo lĕ mơnuih ping gah (đảng viên), laih anun khua khul đah kơmơi. Adơi amai đah kơmơi hơmâo 200 čô mơnuih ngă ding kơna. Tơdơi kơ khul ping gah pok pơhai brơi ngă war rơmô, sang juă glai, sang mơnơi, ta jing mơnuih ping gah khom ba jơlan hlâo. Blung hlâo jak iâu adơi amai tŭ ư soh. Giong anun, ƀuh bruă kâo ngă, sang anŏ ta hơdjă rơgoh, rơhaih rơhong, abih bang adơi amai ding kơna khul hla tui pioh man pơdong plơi pla phrâo”.

Thun 2021 rơgao, mơnuih ƀôn sang plơi Hreng ăt ngă giong 2 arăt jơlan plơi pla tuh hăng ƀêtông, jơlan rơhaih 8 met, tơpă brăng treng jơlan phun 19. Kiăng dưi pơkra jơlan anai, ơi Rčom Khoan, Khua git gai ping gah plơi Hreng, jing mơnuih ba jơlan hlâo, čom pơčah ruh hĭ pơnăng war pơgang ƀrik ñu glông 50 met treng jơlan, kiăng pok prong dơ̆ng 1 met jơlan nao rai. Khua git gai ping gah plơi, ngă hlâo, mơnuih ƀôn sang hla tui yơh, ruh pơđuăi hĭ anŏ gun, dram gơnam lŏn đang sang anŏ pioh pok jơlan rơhaih kơ plơi pla nao rai. Pla phun kyâo tơ-ui rah hăng pla bơnga gah yŭ tơ-ui kyâo brơi hiam jơlan plơi.

Ơi Rčom Khoan, Khua git gai ping gah plơi Hreng, să Hòa Phú, tơring glông Čư̆ Pah brơi thâo, hrom hăng jơlan pơkra hiam laih, ră anai tơlơi hơdip mơda mơnuih ƀôn sang ăt pơđĭ tui laih mơ̆n. Amăng mrô 267 boh sang anŏ plơi Hreng, abih bang lêng kơ Jrai ta soh, truh ră anai dŏ glăi 8 boh sang đôč ƀun rin hăng 56 boh sang anŏ giăm ƀun rin, 91% mrô sang anŏ rơguăt. Plơi Hreng 6 thun na nao mơtam jing plơi gru grua ƀudah rơguăt gưl tơring glông, tơring čar pơpŭ, hnong pơhrui glăi mơ̆ng rĭm čô mơnuih mă bruă sa thun lĕ 42 klăk.

Sang pô mơnuih ping gah thun hlăk ai plơi Hreng man pơdong giong rơnuč thun 2021

Thun 2021, abih bang mơnuih ping gah ngă giong bruă jao soh, ƀu hơmâo ôh mơnuih ping gah ngă ƀu giong bruă jao. Khul ping gah plơi Hreng 3 thun na nao ngă giong bruă jao hiam klă, jing sa amăng hơdôm hla kơ ba akŏ ping gah plơi pla mơnuih djuai ƀiă tơring glông Čư̆ Pah:

“ Tơlơi tơnap tap hloh ră anai lĕ lu mơnuih djuai aset, anun yơh aka ƀu thâo hluh lu ôh, lơ̆m plơi pla ngă tui tơhnal pơtrun plơi pla phrâo lĕ tơnap tap tơlơi juăt mă bruă đưm, mơnuih ƀôn sang aka ƀu thâo pơblih tui ôh, tơnap tap tal dua dơ̆ng lĕ kơƀah prăk čan blơi gơnam yua mă bruă. Amăng plơi ră anai, hơmâo 278 boh sang anŏ, lơ̆m ngă tui bruă man pơdong plơi pla phrâo lĕ tơlơi dŏ dong [ong huă, tơlơi pơmin hơmâo pơblih tui laih, pơđĭ kyar lu, yua hơmâo Ping gah hăng Kơnuk kơna gleng nao, mơnuih ƀôn sang hok mơak, mă bruă bơwih ƀong đĭ tui”.

Rĭm blan, khul ping gah plơi Hreng, să Hòa Phú pơphun na nao jơnum ding kơna khul, tơña anŏ kiăng pơgôp hiăp kơ bruă mă phun, yôm. Biă mă ñu, jơnum pơčrông sai bruă mă lăi nao hrăm hăng hla tui tơlơi pơmin, pran jua, tơlơi dŏ dong ƀong huă hiam mơ̆ng Hồ Chí Minh laih anun hơdôm tơlơi mơnuih ƀôn sang râ̆o pơhmư̆, mơ̆ng anun khom pơčrông sai, ĕp hơdră pơsir hlâo, pok pơhai brơi mơnuih ƀôn sang ngă hrom. Hră pơtrun tơdơi kơ jơnum tŭ ư laih, hơdôm jơlan hơdră mơ̆ng Ping gah pơdlông pơtrun, ĕp lăng tong ten thâo hluh ngă tui, hlâo kơ ngă tui tơña mơnuih ƀôn sang ƀơ̆i. Yua kơ anun, hră pơtrun ngă tui hmao kru, hơdôm tơlơi jak iâu pơkơtưn mă bruă an pơdong kual plơi pla ngă tui djơ̆ soh.

Djop bruă tơlơi juăt hơđăp ƀu klă hiam, tơlơi pơdŏ rơkơi bơnai sui hrơi, djai brŭ sui mông pơtô lăi brơi lui hĭ, ngă tui hơdră dŏ dong ƀong huă phrâo rơguăt, hiam, djru nao rai bơwih ƀong huă, pơđĭ kyar tơlơi hơdip, pơgang ayuh hyiăng lŏn glai anih dŏ rơgoh hơdjă. Ơi Tôn Thất Lộc, Kơ-iăng Khua git gai ping gah să Hòa Phú, tơring glông Čư̆ Pah, Gia Lai brơi thâo:

“Khul ping gah plơi Hreng ngă klă hơdôm bruă pơtrun, tơhnal pơkă kơ ping gah hăng jơnum min mơnuih ƀôn sang să jao. Bruă mă man pơdong plơi pla phrâo ngă giong amăng thun 2020, dưi hơmâo Jơnum min mơnuih ƀôn sang tơring glông tŭ yap. Thun 2021, khul ping gah plơi Hreng ngă klă djop bruă jao, tơhnal pơtrun pơđĭ kyar bơwih ƀong huă mơnuih mơnam, pơgang rơnuk rơnua dêh čar, hơđong mơnuih mơnam, dưi hơmâo ping gah să pơsit ngă giong bruă jao hiam klă hloh”.

Hăng tơlơi hơdeč hmar git gai ngă bruă, ba jơlan hlâo amăng pok pơhai ngă tui bruă kơđi čar mơ̆ng dlông pơtrun, Khul ping gah plơi Hreng hơmâo pơtong rơđah tơlơi gơgrong glăm ba phun amăng bruă git gai Khul mơnuih wai lăng plơi pla hăng hơdôm khul grup mut phung, hrom hăng ană plơi pla man pơdong kual plơi pla ala ƀôn jai hrơi hiam klă pơblih phrâo.

Nguyễn Thảo pô čih-Nay Jek: Pơblang