Rơbat ƀơi jơlan ƀê tông agaih hơdjă, hăng djop kơ bơnga kơtuai jơlan, tô plơi Ia Nueng nao pơ̆ anih anom hiam Biển Hồ, tha plơi Hmrick mơ-ak brơi thâo, anai lĕ sa amăng hơdôm ring bruă dưi pơkra mơ̆ng bruă pơdŏng plơi pla phrâo, dưi hmâo kơnuk kơna tuh pơplai, bơ̆ mơnuih ƀôn sang pơgôp pran mă bruă. Jơlan plơi pla klă hiam agaih ƀu kơnong kơ djru plơi Ia Nueng tâ̆o hiam ôh mơ̆, neh wa pơgiăng gơnam tam gêh gal hloh kơ hlâo mơn. Ră anai, amăng plơi, sang anô̆ hơpă leng kơ pơkra sang juă glai pơhlôm klă, ƀu dô̆ tơlơi kă hlô rông ƀơi rơgôp krum sang kah hăng lu thun hlâo adih. Tha plơi pơtă pơtăn na nao ană tơčô ngă tui klă hơdôm hơdră pơtrun, hơdră bruă mơ̆ng Ping gah hăng Kơnuk kơna:

 “Să Biển Hồ hrưn đĭ pơdŏng plơi pla phrâo pơđĭ dlông kah hăng hơdôm tơhnal ba tơbiă. Amăng thun 2024 ƀing gơmơi amra gir run pơsur neh wa pioh neh wa thâo hluh hăng gum tơngan hrŏm pơdŏng să plơi pla phrâo pơđĭ dlông. Neh wa amăng plơi ăt khom pơsit pran jua gum hrŏm hăng gong gai să, plơi pla, lăi pơhing kơ neh wa thâo hluh rơđah pioh neh wa ha pran jua, gum tơngan hrŏm gong gai ngă djơ̆ kah hăng hơdôm tơhnal ba tơbiă”.

Giăm plơi Ia Nueng, plơi Phung ăt hmâo mơn lu tơlơi pơplih phrâo. Ƀu kơnong kơ jơlan ƀê tông phrâo, sang jơnum plơi pla klă hiam ôh mơ̆, bôh thâo phiăn juăt mơ̆ng neh wa ăt jai hrơi jai dưi ngă tui. Ơi Đưk, Khua plơi Phung brơi thâo, đah kơmơi amăng plơi hmâo pơdŏng laih anom mă bruă hrŏm rơngaih mơñam băn ao, ƀơƀrư̆ ngă juăt hăng bruă bơwih ƀong huă sĭ mơdrô hơdôm mơta gơnam tui phiăn juăt đưm, pơhrua nao hăng pơlar bruă tuai čuă. Amăng plơi ăt hmâo mơn khul atông čing hơgor hmâo 43 čô mơnuih, jing anih jơnum bôh thâo mơ-ak klă, tâ̆o yâo mơ̆ng tơdăm dra. Ơi Đưk brơi thâo, thun 2024, Mơnuih ƀôn sang plơi Phung gir run ngă giong dong hơdôm tơhnal bruă pơkă dô̆ tơyơl akă giong:

 “Phrâo tom adih anai plơi Phung phrâo dưi yap plơi pla phrâo, tơlơi anai ngă neh wa amăng plơi mơ-ak biă yua kơ dưi hmâo Ping gah, kơnuk kơna lăng ba, ră anai neh wa amăng plơi pơsit pran gum hrŏm hră pơgang gah ia jrao. Mơ̆ng bruă pơsur lăi pơhing lĕ neh wa ăt thâo hluh mơn kơ bôh tŭ yua, yua kơ lơm hmâo tơlơi duam ruă bruă pơjrao tơlơi ruă amra djru plai ƀiă tơnap gah prăk kak. Dua dong lĕ hơdôm bôh sang anô̆ ăt ngă klă mơn amăng bruă pơjing anih anom hơdip pok prong jơlan nao rai, pơhlôm agaih mơtah jum dar plơi pla, gir run bơwih ƀong huă pơđĭ kyar bơwih ƀong sang anô̆, kiăo tui anun mă bruă pơsit anăn păn điện tử ƀing gơmơi amra gir run djru pioh pơhlôm 100% mrô mơnuih ƀôn sang ngă giong pơsit anăn păn điện tử”.

Tui hăng yă Đinh Thị Hoa – Kơ-iăng Khua Jơnum min mơnuih ƀôn sang să Biển Hồ truh ră anai să hmâo ngă giong laih 16/19 tơhnal pơkă mơ̆ng plơi pla phrâo pơđĭ dlông. Kiăo tui anun, abih bang jơlan nao rai amăng plơi pla hăng abih bang ataih 20km dưi pơkra hăng ƀê tông soh, rơbêh kơ 17km jơlan amăng đang hmua dưi pơkra kơjăp. Hơdôm hơdră pơkă bôh thâo kah hăng sang rông, sang jơnum plơi pla dưi pơdŏng klă hiam. Amăng rim plơi, mơnuih ƀôn sang hmâo ƀơƀrư̆ ngă juăt hăng bruă ngă đang hmua tui tơlơi pơkă, rơbêh kơ 90% kual lŏn ngă đang hmua dưi pơplih phrâo, pruih pơđoh ia mă ha jăn hăng pơkrem. Hơdôm tơlơi kiăng yua kơ tơlơi hơdip kah hăng ia yua, dưi bơwih brơi tơlơi suaih pral, hmâo anih anom ngui ngor, pơdơi pơdă mơ̆ng mơnuih ƀôn sang leng kơ dưi pơhlôm. Khă hnun hai, yua kơ phiăn juăt pha ra, anun sa dua tơhnal pơkă kah hăng 3% mrô mơnuih rơngiă hmâo arăng čuh, ƀudah tơhnal pơkă kơ pơsit anăn điện tử, khul ngă rai gơnam, ngă giong dong amăng hơdôm thun tô̆ tui.

 “Thun anai pơhrui glăi hơnong ñu sa akô̆ mơnuih lĕ 57,6 klăk prăk sa čô mơnuih sa thun lĕ lu hloh bơhmu hăng tơhnal ba tơbiă. Dua lĕ anih anom mă yua mơ̆ng să phun ñu pơhlôm, jơlan nao rai amăng plơi pla hmâo 97% hăng glăk pok pơhai ngă tui kiăng ngă giong bruă jao thun 2023. Tơlơi hơdip mơda mơnuih ƀôn sang dưi pơđĭ dlông rơđah rơđông, prăk pơhrui glăi lu. Bruă pơdŏng plơi pla phrâo pơđĭ dlông ba glăi lu bôh tơhnal hăng bôh tŭ yua djơ̆ hăng jơlan gah mơnuih ƀôn sang dưi thâo, dưi ngă hăng dưi čơkă mă".

Hăng tơlơi ha pran jua hơkrŭ pơsir tơlơi tơnap, gong gai hăng mơnuih ƀôn sang să Biển Hồ, plơi prong Plei Ku glăk pơsit pran jua pơdŏng dong plơi pla phrâo pơđĭ dlông jai hrơi jai pơplih phrâo ƀơi čư̆ siăng Gia Lai./.