VOV4.Jarai - Ƀơi tơring čar Gialai, pơtô pơhrăm čơđai anet, biă ñu lĕ ƀơi kual djuai ania ƀiă hmâo lu tơlơi tơnap yua kơ amĭ ama čơđai akă thâo kơ tơhnal yôm phăn mơng bruă pơhrăm bôh thâo hơdip hăng dŏ dŏng ƀong huă yua tơlơi Yuan hlâo kơ ană nao hrăm gưl sa. Amăng lu thun hăng anai dưi pơpha bruă nao pơ̆ plơi Ia Tông, să Ia Dêr, gơnang kơ lăi pơhing thâo, ngă pơhư̆č pran jua, nai Ksor H’ Nhiêm (ƀơi sang hră pơtô čơđai anet lơ 30/4 – tơring glông Ia Grai) hmâo pơsur abih bang čơđai anet nao sang hră, hrom hăng anun pơphun anih hrăm dô̆ glăi tơhrơi ƀơi plơi ƀun rin.

Khă gun lu bruă đang hmua, samơ̆ rim mơmot, rơkơi bơnai amai Rčom H’Lai (tơkeng thun 1993, ƀơi plơi Ia Tông, să Ia Dêr, Ia Grai) pơplih nao rai hrom ană đah kơmơi Rčom H’ Nanh (anih mẫu giáo 4 thun ) hrăm hơdôm tơlơi hrăm yua kơ nai Ksor H’Nhiêm mơ-ĭt. Tơdơi kơ lăng hơdôm wot pơtô pơblang mơng nai H’ Nhiêm, amai H’ Lai dar glăi video tui tơlơi pơtô ba, mơ-ĭt glăi kơ nai pel ĕp glăi. Mơng blan 9/2021 pơ̆ anăp anai, yua kơ klin Covid-19, anun mô̆ H’Nanh hăng 37 čơđai anet pơkon ƀơi anih pơtô pơgep hrom, sang hră ƀơi plơi Ia Tông, să Ia Dêr, tơring glông Ia Grai ăt na nao mơn hmâo hrăm online rim rơwang hrơi tơjuh. Khă ƀu dưi bưp nai ƀơi anăp, samơ̆ rơgao kơ jơlan gah hrăm anai, H’Nanh hăng ƀing gơyut ăt dưi lai pơthâo nao rai na nao mơn hăng dưi hmâo nai H’Nhiêm pel ĕp glăi tơlơi hrăm, thâo tơlơi hrăm hră. Hăng sa čô amĭ čơđai sang hră, amai H’ Lai ƀuh hor biă yua kơ mơng akô̆ thun hrăm truh ră anai, ñu hmâo hrăm tơlơi adôh, tơlơi suang phrâo hăng čang biă hơdôm tơlơi pơtô pơblang mơng nai amăng rim mơmot:

“Kâo hơđong pran jua biă yua kơ hmâo nai pơtô lăi, lăng ba, kâo nao mă bruă ăt hơđong pran jua. Ană kâo lĕ thâo pơđok, thâo hluh lu biă”.

Nai Ksor H’ Nhiêm hrom hăng amĭ ama čơđai sang hră pơkra gơnam ngui kiăng pơtô čơđai

Amai Rčom H’Yŭi – khua grŭp ƀing amĭ ama čơđai sang hră pơtô čơđai anet plơi Ia Tông, să Ia Dêr, tơring glông Ia Grai brơi thâo, rơgao hăng anai 3 thun, sang hră pơtô čơđai anet kơnong kơ hmâo sa rơwang đô̆č prong năng ai ñu 50 met kơ rê răm tui laih. Bôh than lĕ lu amĭ ama čơđai amăng plơi pơmin lĕ, čơđai mơng 3 truh 5 thun akă kiăng hrăm bôh hră ôh, anun nao hrăm kơnong kơ nao ngui đô̆č. Mơng thun hrăm 2018-2019 truh ră anai, nai H’ Nhiêm nao wai lăng anih hrăm, hluai tui hơdôm mông jơnum amĭ ama čơđai, jơnum plơi, nai H’ Nhiêm hmâo pơblang hăng tơlơi Jarai djru amĭ ama čơđai thâo hluh čơđai anet nao sang hră ƀu djơ̆ kơnong kơ dưi ngui ngor ôh mơ̆, ñu dô̆ dưi pơhrăm lu bôh thâo bơwih brơi kơ pô, hrăm bơră ruai hăng tơlơi Yuan hăng ngă juăt hăng bôh hră hlâo kơ nao hrăm gưl sa. Tơlơi anai djru čơđai muai djuai ania Jarai phing kơ pran jua biă, thâo gơgrong kơ pô hloh. Lom thâo hluh, amĭ ama čơđai ƀu kơnong kơ brơi ană bă nao sang hră ôh mơ̆, drơi pô gơñu gơgrong pơtrut nao rai djru blơi geč ƀrik, tuh rơyuh pran jua pơkra bah amăng war, tuh ƀê tông, pơdŏng bơbung pơgang pơ-iă hang pioh pơkra lan sang hră agaih hơdjă kơ čơđai muai. Amai Rčom H’ Yŭi brơi thâo:

“Hlâo adih sang hră ƀu hiam kăh hăng ră anai ôh, ră anai ƀing nai pơhrôp klă hiam, hmâo djop gơnam mă yua hrăm hră, čơđai muai ăt hor mơn. Hlâo adih akă hmâo lan sang hră tui anai ôh, lan sang hră leng kơ lŏn sôh, čơđai tơbiă gah rơngiao hlŭ hlañ biă. Samơ̆ mơng hrơi hmâo nai Nhiêm rai pơ̆ plơi Tong lĕ anih hrăm, lan sang hră hiam, agaih, čơđai ngui ngor huăi hlŭ hlañ ôh. Ƀing gơmơi mơ-ak biă hăng bơni kơ nai Nhiêm yua kơ hmâo pơtô brơi kơ ană kâo ăt kah hăng abih bang ƀing čơđai sang hră ƀơi anai”.

Nai H’Nhiêm dar mă, pơjing mă video pioh kơ bruă pơtô pơhrăm online

Yă Đỗ Thị Nga – Khua Sang hră Mẫu giáo 30/4, să Ea Dêr, tơring glông Ia Grai brơi thâo, mơng thun 2018 hlâo adih, ƀơi sang hră plơi Ia Tông kơnong yŭ kơ 10 čô čơđai mơng 3 truh 5 thun nao sang hră. Samơ̆ mơng thun hrăm 2019-2020 truh ră anai, anih hrăm hmâo djop 38 čô čơđai amăng hnưr thun mẫu giáo nao hrăm. Pran jua anai lu ñu yua kơ nai Ksor H’ Nhiêm. Hrom hăng anun bruă pơsur, lăi pơhing, nai H’ Nhiêm dô̆ dưi pơsit nai rơgơi gưl tơring glông, gưl tơring čar amăng lu thun hrăm tô̆ tui tlôn. Tơlơi lăp yôm phăn lĕ, nai H’ Nhiêm đing nao biă bruă bơră ruai hăng tơlơi Yuan, samơ̆ amăng hơdôm tơlơi ngui ngor nai đing nao pơhrua hrom, lăi pơthâo kơ čơđai gru bôh thâo phiăn juăt mơng djuai ania Jarai, bơhmu tu ñu kah hăng čing hơgor, gơnam mă yua pĕ atông, băn ao djuai ania pô.

“Biă ñu, nai H’Nhiêm kiăng khăp čơđai sang hră biă, rơnang blang, biă, rim dah ƀuh ñu juăt pơhiăp tlao hăng ƀing čơđai. Amăng hơdôm thun hrăm rơgao, nai jing pô phun mơng sang hră, dưi hmâo mă anăn rơgơi gưl tơring čar, tơring glông, jing pô ngă gru ba jơlan hlâo hmâo pran jua klă hăng hrưn đĭ amăng tơlơi pơtô. Mơng thun nai H’ Nhiêm rai mă bruă ƀơi anai, ñu pơtô brơi lu tơlơi Yuan, čơđai đĭ anih sa klă dưi hmâo sang hră gưl sa tŭ yap”.

Nai Ksor H’ Nhiêm lăi pơthâo, drơi pô ñu hmâo sa tơlơi čang rơmang prong lĕ ƀing amĭ ama čơđai sang hră Jarai ƀơi anai jai hrơi jai đing nao hloh bruă hrăm hră mơng ană bă, djru adơi amai ƀơ ƀrư̆ hmâo tơlơi hơdip klă hloh mơng jơlan hrăm hră:

“Kâo ƀuh ƀơi anai tơnap tap biă, hmâo ƀiă čơđai sang hră nao hrăm. Ƀuh tui anun kâo rơngôt biă, kâo čang rơmang ană amôn djuai ania ƀiă nao hrăm hră, thâo bôh hră, thâo pơhiăp tơlơi Yuan. Hmâo ƀing amĭ ama čơđai sang hră ƀu brơi ană bă nao sang hră yua kơ sang anô̆ tơnap tap, anun kâo khom hyu pơsur, djru gum kiăng ƀing čơđai dưi nao sang hră, kiăng ƀing čơđai hrăm rơgơi, thâo hluh lu hloh dong”.

Hơdôm tơlơi gir run ƀu pơdơi mơng nai pơtô čơđai hlăk ai Ksor H’ Nhiêm ƀu djơ̆ kơnong kơ dưi hmâo amĭ ama čơđai hăng čơđai sang hră pơtô čơđai anet plơi Ia Tông, să Ia Dêr, tơring glông Ia Grai čih djă pioh ôh mơ̆, phrâo rơgao, Gơnong bruă pơtô pơhrăm tơring čar Gialai ăt rơkâo mơn Ding jum pơtô pơhrăm dêh čar ƀơk hră bơni anăn Nai ngă gru pơplih phrâo thun hrăm 2020-2021./.

Nguyễn Thảo: Čih – Siu H’ Prăk: Pơblang