Phrâo anai, Khua sem lăng, tŭ yap gơnam OCOP tơring čar Dak Lak hơmâo sem lăng 25 gơnam tam tui hơnong pơkă OCOP 3 asar pơtŭ, 4 asar pơtŭ gưl tơring čar amăng thun 2022 gah jơlan hơdră rĭm boh să sa gơnam rơwang thun 2021-2025, đĭ tui mrô gơnam tui OCOP amăng tơring čar đĭ 143 gơnam.

Amăng mrô 25 gơnam OCOP phrâo hơmâo tŭ yap tal anai hơmâo 7 gơnam tŭ yap tui OCOP 4 asar pơtŭ hăng 18 gơnam 3 asar pơtŭ. Hơdôm gơnam hơmâo tŭ yap tui OCOP amra hơmâo Jơnum min mơnuih ƀôn sang tơring čar Dak Lak jao hră pơsit, dưi mă yua anăn apăn pơsit gơnam tui OCOP Việt Nam hăng tui tơlơi pơsit in ƀơi adung gơnam tui tơlơi pơkă. Tơlơi pơsit tŭ yap gơnam tui hơnong pơkă dưi mă yua amăng 3 thun.

Kiăng hrưn đĭ rơnoh yôm mơng gơnam đang hmua amăng tơring čar, pơ anăp anai, tơring čar Dak Lak tŏ tui djru brơi hơdôm anih anom OCOP đĭ tui gơnam brơi hiam hơdjă, djru brơi anom bơwih ƀong sĭ mơdrô, anom bơwih ƀong hrŏm pơlir hơbit amăng sĭ mơdrô, ĕp anih ngă hrŏm bơwih ƀong, pok prong anih sĭ mơdrô. Ơi Huỳnh Ngọc Dương, kơ-iăng khua gơnong bruă sĭ mơdrô tơring čar Dak Lak brơi thâo:

“Hơdôm gơnam mut hrŏm lêng kơ tŭ mă tơlơi gal mơng hơdôm jơlan hơdră djru mơng tơring čar. Dua dong lĕ hơdôm gơnam tui OCOP 3 asar pơtŭ truh 4 asar pơtŭ ƀing gơmơi hơmâo hră pơ-ar pơlăi nao rai hăng hơdôm anih anom amăng gơnong bruă sĭ mơdrô hơdôm boh tơring čar đơ đam dêh čar hăng hơdôm anom bruă pơsur sĭ mơdrô mơng gơnong bruă sĭ mơdrô ngă gêh gal kiăng pơlir hơbit hăng hơdôm anih anom sĭ mơdrô hăng hơdôm anih sĭ amăng tơring čar kiăng pơtrut blơi pơhrui gơnam tam”.

Lơ 14/8 laih rơgao, Anom bruă črâo ba jơlan hơdră man pơdong plơi pla phrâo tơring čar Dak Lak hơmâo pơphun Jơnum pơtô pơblang, pok pơhai jơlan hơdră rĭm boh să sa gơnam thun 2023.

Jơnum lăng glăi hơdôm gơnam tui OCOP tañ pơsit tong sĭ mơdrô lu hloh, hơmâo lu anih anom čơkă mă, djru brơi mơnuih ngă hmua pok prong pla pơjing, đĭ tui rơnoh mơng gơnam tam, mơng anun pơgôp pơplih amăng bơwih ƀong huă, hrưn đĭ prăk pơhrui, tơlơi hơdip kơ mơnuih ƀon sang hăng ngă tui tŭ yua hơdôm grup hơnong pơkă “bơwih ƀong hăng grup pơkra pơjing” tui hơnong pơkă dêh čar kơ să plơi pla phrâo.

Hrŏm hăng boh than dưi ngă anun, jơlan hơdră OCOP ƀơi Dak Lak ăt dŏ sa, dua anŏ aka ƀu klă anun lĕ: hơdôm hơdră djru hăng hơdôm anih anom hơmâo gơnam OCOP dŏ aset, gơnam OCOP aka ƀu lu, bruă pơsur sĭ mơdrô dŏ raih daih, aka ƀu ha amăng plĕ, aka hơmâo tơlơi pơđŏm glăi yôm phara kiăng pơjing rup rap, rơnoh yôm amăng sĭ mơdrô.

Amăng jơnum ƀing khua mua hơmâo lăi pơthâo akŏ bruă “jơlan hơdră rĭm boh să sa gơnam, tơlơi găn rơgao amăng lŏn ia hăng jar kmar amăng pơđĭ kyar bơwih ƀong huă amăng kual plơi pla”, Hơdôm bruă pơhrăm glăi tơdơi kơ 5 thun pok pơhai jơlan hơdră OCOP ƀơi Dak Lak”, “Tơlơi sit nik mơng Jơlan hơdră OCOP”. Tơlơi gơgrong mơng anih anom kơđi čar amăng pok pơhai jơlan hơdră OCOP. Tơlơi pơhrăm glăi, hơdră bruă akŏ phun amăng rơwang thun 2023-2025”.

Đĭ pơhiăp amăng mông jơnum, ơi Nguyễn Thiên Văn, kơ-iăng khua Jơnum min mơnuih ƀôn sang tơring čar Dak Lak lăi pơtong, hăng jơlan gah “Gơnam hiam hơdjă amra ba glăi tơlơi yôm”, hrŏm hăng tơlơi gir run mơng rĭm anih anom, rơkâo hơdôm gơnong bruă, ƀon lan đing nao ƀiă dong hơdôm hơdră gum djru hăng hơmâo anih anom hơmâo gơnam OCOP, biă ñu hrưn đĭ amăng wai lăng, pơkra pơjing hăng sĭ mơdrô gơnam tam.

“Bruă mut hrŏm mơng gưl Ping gah, gong gai ƀon lan amăng bruă gum djru brơi hơdôm anih anom kah hăng pơđĭ kyar gơnam tal ba glăi tơlơi dưi amăng ƀon lan ƀing gơñu, hơmâo hơdôm hơdră pơđĭ kyar gơnam hăng anih anom sĭ mơdrô kiăng gơnam tam amuñ sĭ, ngă gêh gal kiăng pơđĭ kyar bơwih ƀong huă mơnuih mơnam brơi mơnuih ƀon sang amăng pơsir hĭ bruă mă, prăk pơhrui”.

Kơ-iăng khua Jơnum min mơnuih ƀôn sang tơring čar Dak Lak ăt rơkâo anom bruă bơdjơ̆ nao kiăng đing nao črâo ba, djru hơdôm gơnam dưi čih ană mut hrŏm jơlan hơdră OCOP mơng hơdôm boh tơring glông, plơi prong amăng thun 2023 tui tơlơi pơkă phrâo tui hơnong pơkă OCOP dêh čar; ječ ameč pơphun anih pơtop hrăm brơi ƀing apăn bruă wai lăng jơlan hơdră OCOP djop gưl hăng hơdôm anih anom mut hrŏm jơlan hơdră amăng pơkra, pơjing akŏ bruă bơwih ƀong sĭ mơdrô, pơjing anăn apăn sĭ mơdrô, marketing hăng lăi pơthâo, pơđĭ kyar gơnam brơi hơdôm anih anom pơkra gơnam mut hrŏm jơlan hơdră OCOP thun 2023; kơtưn amăng bruă pôr pơhing, lăi pơthâo jơlan hơdră OCOP.