Đok adôh mơng ƀing thâo adôh tơlơi adôh đưm quan họ ƀơi tơring čar Bắc Ninh ƀu kơnong kơ gru grua bôh thâo đưm mơ̆ UNESCO tŭ yap ôh mơ̆ hloh kơ anun dong, anun hmâo pơjing laih jơlan phun mơng lu bôh plơi pla đưm kual Kinh Bắc amăng hơdôm rơbâo thun rơgao. Mơnuih ƀôn sang mơng plơi pla Bắc Ninh hmâo djă pioh laih hăng pơtô glăi kơ ană tơčô đok adôh bôh pia anun kah hăng sa kông ngăn yôm pioh pơjing rai anô̆ yôm pha ra mơng plơi pla, kiăng ngă pơhưč tuai čuă ngui nao pơ̆ anun, pơđăm drơi amăng hơdôm er adôh đưm hăng lăng ƀuh tơlơi mơ-ak pran jua, klă hiam mơ̆ng plơi pla kual lŏn dăo Bắc Bộ. Hơdôm anô̆ yôm anun hmâo pơjing laih plơi pla lăp dô̆ hơdip mơda, lăp nao ĕp lăng lơm pơdŏng plơi pla phrâo ră anai.

Yua anun, Nai tha prin, nai prin tha Bùi Xuân Đính, mă bruă ƀơi Anom kơsem min djuai ania Việt Nam lăi lĕ, sa plơi pla phrâo kiăng hmâo bôh thâo  phiăn juăt, laih anun tŭ mă, pơđĭ kyar tui jơlan gah rơnuk anai lăp djơ̆ hrŏm:

 “Kâo pơmin sa bôh plơi pla phrâo khom hmâo sa tơlơi hơdip mơda gơnam tam jơnap hăng hơđong, sa tơlơi hơdip pran jua lu mơta hăng tâ̆o yâo, hmâo sa anih anom hơdip klă hiam, hluai tui gru pơgang hăng ngă tui hơdôm nua yôm bôh thâo phiăn juăt, pơkĕ hrŏm hăng hơdôm bôh than rơnuk anai...”.

Pran kơtang mơng plơi pla hrŏm hăng hơdôm nua yôm bôh thâo đưm pha ra amra pơjing rai hơdôm nua yôm kơjăp phik kơ hơdôm plơi pla phrâo. Hơdôm hrơi jê̆ hăng anai, bruă pơđĭ kyar tuai čuă ngui plơi pla nao hrŏm hăng pơdŏng plơi pla phrâo hmâo ba glăi laih hơdôm bôh tŭ yua nao hrŏm, mă yua abih anô̆ gal anih anom hiam, bôh thâo phiăn juăt, gơnam tam pha ra mơ̆ng kual, hơdôm anih anom tuai čuă ngui ƀơi plơi pla hmâo jing laih anih kiăng nao pơhưč pran jua mơ̆ng lu tuai hyu čuă ngui, hrŏm hăng anun ba glăi prăk pơhrui glăi lu hloh kơ mơnuih ngă đang hmua, plơi pla ăt rŭ đĭ mơn, pơplih phrâo mơn. Pơđĭ kyar lu mơta mơ̆ng hơdôm gơnam ngă rai mơ̆ng đang hmua, hơdôm nua yôm bôh thâo đưm ƀơi plơi pla amra ba glăi prăk kơ mơnuih ƀôn sang hăng ngăn rơnoh pioh pơdŏng plơi pla phrâo. Ơi Lê Minh Hoan, Khua ding jum đang hmua hăng pơđĭ kyar ƀôn lan dêh čar ta lăi lĕ:    

 “Ƀing ta khom pơsit lông lăng nua yôm hmâo truh nua yôm ƀu ƀuh anun lĕ bôh thâo đưm, anun lĕ mơnuih mơnam, anun lĕ plơi pla. Ƀing ta tum pơƀut lu mơta nua yôm kơ sa gơnam thơ, ƀing ra amra jing sa kông ngăn hăng yua tơlơi anun jing laih hơdôm gru grua mơng plơi pla”.

Hơdră “Plơi pla pơplih tañ, plơi pla pơčeh phrâo, gru grua nao hrŏm” dưi hmâo Khua dêh čar ta ba tơbiă amăng Tơlơi pơtrun pơsit mrô 26 lơ 27/7/2023 kơ Jơlan hơdră ngă bruă mơng Gong gai dêh čar ngă tui Tơlơi pơtrun pơsit mrô 19 mơng Grŭp mă bruă Ping gah dêh čar ta tal 13 kơ bruă đang hmua, mơnuih ngă đang hmua, plơi pla truh thun 2030, tơhnal lăng nao truh thun 2045. Tui ơi Trần Nhật Lam, Kơ-iăng Khua Anom bruă git gai bruă plơi pla phrâo dêh čar ta (Ding jum đang hmua hăng pơđĭ kyar ƀôn lan dêh čar ta), bruă ruah hơdră anai pok pơhai ngă tui amăng pơdŏng plơi pla phrâo ră anai kiăng ngă tui hơdôm nua yôm phun amăng plơi pla, amăng anun mơnuih ƀôn sang ngă tui bôh thâo, pran hmâo plơi pla. Bruă pơdŏng hơdră anai lĕ sa tơlơi kiăng ječ pioh pơdŏng plơi pla phrâo kơjăp phik, mut nao dơlăm hloh.

 “Anun lĕ jơlan gah lăng yôm phiăn juăt mơ̆ng djuai ania plơi pla hăng lăng yôm nua yôm anih anom hơkrŭ glăi hăng ngă tui nua yôm amăng plơi pla, pơtŏng sit gru grua bôh thâo plơi pla. Ƀing ta dưi ngă tui laih hơdôm nua yôm phun amăng plơi pla kiăng ngă hiưm hơpă jơlan hơdră plơi pla phrâo jai hrơi jai kơjăp phik hăng mut nao dơlăm hloh”.

Pơgang hăng pơđĭ kyar nua yôm gru grua nao hrŏm hăng pơdŏng plơi pla phrâo dưi pơsit jing tơhnal ba tơbiă rah hăng jing bruă mă tŭ yua rah yua kơ bôh thâo đưm jing phun akha pran jua mơng mơnuih mơnam, jing pran kơtang pơhlôm pơđĭ kyar abih bang. Truh ră anai, lơ̆m hơdôm kual plơi pla mơ̆ng hơdôm gru grua anun glăk pơdŏng plơi pla phrâo, hơdôm anih anom kiăng mă yua gru grua bôh thâo đưm anun, lăng ñu kah hăng sa kông ngăn yôm ngă pran pơtrut pơđĭ kyar plơi pla phrâo./.