VOV4.Jarai - Să Quảng Khê gah tơring glông Dak Glong, tơring čar Daknông, sa amăng hơdôm tơring glông ƀun rin hloh đơ đam dêh čar. Hăng lu mơnuih djuai ania ƀiă, tơlơi hơdip mơda dô̆ lu tơlơi tơnap, samơ̆ neh wa hmâo gum hrom pran jua hăng gong gai plơi pla ngă truh kih bruă pơdŏng plơi pla phrâo.

Sang anet hiam mơng sang anô̆ ơi KPrum, ƀơi ƀôn Phi Mur, să Quảng Khê, pơđao prơhao kơ tơlơi hiăp tlao. Hrơi anai hơdôm ană tơčô hăng neh wa iao gah gum hrom nao ngui ngor hơ-ư̆č hmưi bơyan bơnga. Ñu brơi thâo, bơyan phrâo rơgao pơhrui hmâo 3 tơn kơ phê, sĭ hmâo rơbêh kơ 120 klăk prăk. Ană bă prong hmâo sang anô̆ trun dô̆ sang pha, anun mrô prăk anai ăt djop kơ 2 rơkơi bơnai hơdip hăng tuh pơplai pơđĭ kyar mơn bruă đang hmua. Ơi K’Prum lăi lĕ, ƀu djơ̆ kơnong kơ sang anô̆ ñu đôč ôh mơ̆, abih bang neh wa amăng plơi leng kơ hmâo tơlơi hơdip klă hiam hloh gơnang kơ gum pran hrom pơdŏng plơi pla phrâo.

“Dong mơng hrơi jơlan phrâo pơkra giong, hmâo sang dô̆ hơđong kâo ƀuh neh wa amăng ƀôn bơwih ƀong huă ăt đĭ gŏ mŏ mơn, gêh gal hloh, ană bă hrăm hră ăt gêh gal hloh mơn, nao rai amăng ƀon nao čuă tơdruă ăt amuñ hloh mơn. Pơdŏng plơi pla phrâo, neh wa ƀing gơmơi tŭ ư hrom pĕ pha lŏn pơkra jơlan, pơkra ring bruă amăng ƀôn”.

Jơlan găn ƀôn Phi Mur

Ruai kơ tơlơi hơdip phrâo, ơi K’Krang, tha plơi ƀôn Phi Mur, mơ-ak: ră anai abih bang kah hăng sang anô̆ hlơi hlơi leng kơ hmâo sang dô̆ klă hiam. Anun lĕ gơnang kơ tơlơi gum hrom sa jua gum hrom hơbit djru nao rai, hrăm tui tơdruă pơđĭ kyar bơwih ƀong. Rơđah biă ñu amăng pơdŏng plơi pla phrâo, lom kơnuk kơna pơtrun pơdŏng anih anom mă yua, neh wa amra pĕ pha lŏn, djru pran hrom pơkra. Kah hăng sang anô̆ ñu hmâo pĕ pha 60 m lŏn giăm jơlan gah anăp sang, hăng rơbêh kơ 100m lŏn găn hmua, kiăng pok prong jơlan găn plơi pla hăng rơbiă hyu pơ̆ kual bơwih ƀong. Tha plơi K’Krang, brơi thâo:

“Neh wa ƀơi ƀôn Bi Mur djuai ania Yuan ăt kah hăng neh wa hơđăp ƀơi anai gum hrom hpbit, gum hrom pơkra jơlan, anun mơng hmâo jơlan agaih amăng plơi pla, jơlan nao pơ̆ hmua rơhaih kiăng pơgiăng gơnam tam, gơnam mă mơng đang hmua... Ƀing Yuan hăng neh wa ƀơi anai hơdip hrom mơ-ak klă biă, ƀu hmâo tơlơi hne adih ôh, ƀu hmâo bơrơdjơ̆ bơrơsao ôh, gum hrom pơdŏng plơi pla pơđĭ kyar”.

Kual krah să Quảng Khê

Ƀơi tơring glông Dak Glong, sa amăng hơdôm bôh tơring glông ƀun rin hloh đơ đam dêh čar ta dưi čơkă mă jơlan hơdră 30A, să Quảng Khê lu ñu mơnuih djuai ania ƀiă. Ơi Nguyễn Tiến Duẩn, Khua Jơnum min mơnuih ƀôn sang să Quảng Khê, brơi thâo, hơdôm thun rơgao, bruă tuh pơplai mơng kơnuk kơna hmâo čơkă mă tơlơi anăp nao, dŏng yua hur har mơng mơnuih ƀôn sang. Tơlơi pơmin Ping gah djơ̆ hăng pran jua mơnuih ƀôn sang hmâo djru laih Quảng Khê ngă giong 19 tơhnal pơkă pơdŏng plơi pla phrâo. Truh ră anai wot 9 bôh ƀôn hăng 3 bôh plơi mơng să leng kơ hmâo jơlan nao rai hluh gah, anih anom mă yua klă mơn. Mơng să tơnap tap hmâo rơgao ha mơkrah mrô mơnuih gah sang anô̆ ƀun, ră anai Quảng Khê kơnong kơ dô̆ akă truh 7% mrô sang anô̆ ƀun rin hăng 8% mrô sang anô̆ ƀun rin ƀơƀiă.

Kiăng plơi pla jai hrơi pơplih phrâo, grŭp hlăk ai plơi pla hmâo djă pioh hơdôm bruă mă hrơi 6 gum djru, hrơi 7 mơtah, hrom hăng mơnuih ƀôn sang rơmet agaih na nao anih anom dô̆, pla dong lu phun kyâu mơtah ƀơi hơdôm ară jơlan. Hrom hăng tơlơi tuh pơplai mơng kơnuk kơna, hơdôm grŭp ping gah, grŭp wai lăng mă pô plơi pla hăng hơdôm mơnuih hmâo arăng đăo gơnang amăng plơi pla ăt pơsur pơtrut mơn neh wa bơkơtưn bơwih ƀong huă, djă pioh pơdŏng plơi pla jai hrơi jai pơdrong asah klă hiam. Ơi Nguyễn Tiến Duẩn, brơi thâo:

“Gah Jơlan hơdră pơdŏng plơi pla phrâo lĕ, dưi hmâo neh wa dŏng yua abih pran jua, anun truh thun 2021 să Quảng Khê dưi ngă să plơi pla phrâo. Tơlơi pơtrun pơsit mơng Ping gah ăt kah hăng Tơlơi pơtrun pơsit mơng Khul pơ ala mơnuih ƀôn sang să lĕ amra tô̆ tui dong hơdôm bruă tuh pơplai pơdŏng anom mă yua ăt kah hăng pơsur pran jua, gơnam tam mơng mơnuih ƀôn sang gum pran hrom pioh pơdŏng plơi pla phrâo tui gru phrâo amăng hơdôm hrơi tô̆ tui”.

Sa bơyan bơnga phrâo glăk truh amra ba tôm lu tơlơi pơplih ƀơi kual lŏn asuek, ataih Quảng Khê, Dăk Glong, tơring čar Daknông./.

Minh Huệ: Čih – Siu H’ Prăk: Pơblang