VOV4.Jarai - Hăng hơdôm ring bruă ngă rơđah bơngač jơlan plơi pla, khul hlăk ai ƀơi Dak Lak glăk pơgôp ngă mơnuih ƀon sang thâo rơđah dong amăng bruă gum tơngan hrŏm man pơkra hơdôm ară jơlan amăng plơi pla kiăng “bơngač- mơtah- gaih-hiam”. Anai lĕ ring bruă sit nik mơng hlăk ai gum hrŏm hăng ƀon lan man pơdong plơi pla phrâo.

Truh 6 mông tlam mơmŏt rĭm hrơi, hơdôm apui kơđen amra pĕ rơđah bơngač rok jơlan phun amăng ƀut plơi 1 să Ea Tiêu, tơring glông Čư̆ Kuin, tơring čar Dak Lak. Ơi Lê Đắc Cừ, mơnuih hơdip ƀơi ară jơlan anai brơi thâo, mơng hrơi jơlan arăng dưm truă apui kơđen, tơlơi hơdip amăng plơi pla ƀuh hơđong ƀiă yơh, mơnuih ƀon sang ăt hur har pran jua, mơguah hăng mơmŏt mlăm dưi rơbat hyu bơrơguăt drơi jăn. Tơlơi hơdip kơ ană plơi pla jai hrơi jê̆ giăm.

“Hlâo adih jơlan anai aka ƀu hơmâo apui kơđen juăt ƀuh arăng klĕ dŏp. Samơ̆ dong mơng hrơi dưm truă apui kơđen rơđah bang mơnuih ƀon sang ăt hơđong pran jua laih. Jơlan găn nao rai mơ-ak hăng pơhlôm hơđong mơn, ană plơi pla hok mơ-ak biă mă dong mơng hrơi hơmâo apui kơđen”.

Ring bruă ngă bơngač amăng plơi pla hơmâo hlăk ai tơring glông Čư̆ Kuin dưm truă apui kơđen ƀơi ƀut plơi 1, să Ea Tiêu, tơring glông Čư̆ Kuin

Rin bruă jơlan dưm truă apui kơđen glông rơbêh 1,2 km, nua ñu 25 klăk prăk yua Khul hlăk ai tơring glông Čư̆ Kuin djru brơi gơnam tam, khul hlăk ai să Ea Tiêu hăng mơnuih ƀon sang pơgôp hrơi mă bruă lơ̆m djru dưm truă, bruă anai pơphun mơng blan 3 thun anai. Ơi Mai Văn Hùng, Khua apăn bruă Ping gah ƀut plơi 1, să Ea Tiêu brơi thâo, mơng hrơi dưm truă apui kơđen, neh met wa amăng plơi pla hok mơ-ak mut hrŏm rơmet pơagaih rok jơlan amăng plơi pla, koh hĭ than kyâo dua gah jơlan kiăng kơ jơlan anai jai agaih hiam ƀiă dong. Hrŏm hăng anun, plơi pla ăt akŏ pơjing grup wai lăng kiăng kơ kiăo tui wai lăng apui kơđen kiăng mă yua klă hloh hăng sui thun.

“Lơ̆m jơlan dưm truă apui kơđen giong kâo ăt jơnum pơƀut hăng neh met wa ƀơi anai hăng khul wai lăng mă pô akŏ pơjing grup wai lăng jơlan apui kơđen, pơhrui prăk apui lơtrik dong kiăng kơ pơhlôm. Kơnong bruă pơgôp prăk duh apui lơtrik, abih bang mơnuih amăng plơi pla lêng kơ tŭ ư soh, dong mơng hrơi jơlan dưm truă apui kơđen hăng rơđah bơngač ƀu djơ̆ kơ amăng ană plơi pla đôč ôh mơ̆ ăt brơi kơ abih bang mơnuih găn nao rai ƀơi anai”.

Sa, dua anih truă apui kơđen phrâo, apui kơđen hrĭp pơ-iă yang hrơi

Tui hăng amai Đặng Thị Vân, Khua khul hlăk ai tơring glông Čư̆ Kuin, hơdôm ring bruă mơng hlăk ai “Ngă bơngač jơlan plơi pla” hơmâo khul grup hlăk ai pok pơhai mơng thun 2017 ƀơi lu ară jơlan amăng djop plơi pla ala ƀon amăng đơ đam tơring glông. Ƀu djơ̆ gơnang nao rơnoh prăk mơng khul hlăk ai, lu khul hlăk ai ƀơi ƀon lan ăt iâu pơthưr tơlơi pơgôp mơng mơnuih mơnam kiăng kơ pok pơhai. Yua anun, hơdôm thun laih rơgao, hơdôm pluh km jơlan amăng plơi pla hơmâo laih apui kơđen, ngă gêh gal brơi mơnuih ƀon sang găn nao rai amăng mơmŏt mlăm. Laih dong amra ngă plai ƀiă ƀuh rơdêh pơjrŏm, pơhlôm hơđong tơlơi hơdip kơ ană plơi pla.

“Dong mơng thun 2017 truh ră anai, ring bruă ngă rơđah bơngač amăng jơlan plơi pla hăng hơnong pơkă lĕ kiăng djru brơi neh met wa gêh gal găn nao rai amăng mơmŏt mlăm. Kah hăng anai lĕ ring bruă kiăng pơsit tong tơlơi yôm sit nik mơng khul hlăk ai, ƀing tơdăm dra amăng bruă gum tơngan hrŏm man pơdong plơi pla phrâo”.

Ring bruă ngă bơngač amăng plơi pla ngă pơplih ƀô̆ mơta rok tui jơlan plơi, mơnuih ƀon sang găn nao rai ăt gêh gal mơn

Mơng thun 2014, ring bruă ngă bơngač jơlan plơi pla hơmâo hlăk ai Dak Lak gum hrŏm hăng gơnong bruă apui lơtrik pơphun amăng djop plơi pla amăng tơring čar. Amăng anun anăp nao hơdôm plơi pla kual ataih, asuek, kual tơnap tap, kual giăm guai lŏn ia. Hơdôm thun giăm anai, hrŏm hăng bruă mă yua apui kơđen sô hơđăp tôl mă ƀơi gong apui lơtrik mơng mơnuih ƀon sang, sa, dua ring bruă, hlăi ai hơmâo mă yua apui kơđen phrâo, apui kơđen hrĭp mă pơ-iă yang hrơi, pơhlôm rơnuk rơnua, hăng pơkrem. Ring bruă hơmâo pơgôp ngă pơplih ƀô̆ mơta amăng djop ară jơlan, ngă gêh gal brơi mơnuih ƀon sang găn nao rai rĭm hrơi.

H’Xíu: Čih

Siu Đoan: Pơblang