Sa amăng hơdôm bruă ba gru mơng tơlơi pơphun “Hlăk ai gum tơngan hrŏm man pơdong plơi pla phrâo” mơng hlăk ai tơring čar Gia Lai pok pơhai amăng thun 2023, anun lĕ ring bruă jơlan hlăk ai “Bơngač-mơtah-agaih-hiam” ƀơi plơi Thơh Ga B, să Chư Don, tơring glông Chư Pưh. Jơlan anai glông giăm 1 km hơmâo truă 20 apui kơđen pil hrĭp pơ-iă yang hrơi hăng pla 200 phun kyâo hăng nua ñu rơbêh 60 klăk prăk. Jơlan hlăk ai “Bơngač-mơtah-agaih-hiam” hơmâo mă yua pơgôp ngă pơplih ƀô̆ mơta plơi pla hăng pơhlôm rơnuk rơnua amăng jơlan glông ƀơi plơi Thơh Ga B. Ayong Lê Quốc Việt - Khua khul hlăk ai să Chư Don, tơring glông Chư Pưh brơi thâo:

“Ngă tui tơlơi pơphun hlăk ai man pơdong plơi pla phrâo amăng plơi Thơh Ga B, khul hlăk ai să pơtrut pơsur hlăk ai mut hrŏm ngă tui hơdôm bruă anun lĕ pla kyâo mơtah rôk jơlan glông, truă apui kơđen pil hrĭp pơ-iă yang hrơi, pla kyâo pơtâo kơtuai rôk pơga phrâo kiăng jing pơga hăng phun kyâo mơtah. Pơsur neh met wa koh rơmet pơagaih phun kyâo ƀơi anăp sang kiăng pơhlôm lan sang agaih rơnăk. Pơ anăp anai khul hlăk ai să amra tŏ tui pơsur neh met wa hăng ƀing hlăk ai ƀuăn ngă tui hơdôm boh tơhnal kiăng pơhlôm brơi jơlan rơđah bơngač, mơtah, agaih, hiam”.

Thun 2023, hăng anăn pơphun “Thun pơplih yua boh thâo phrâo amăng hơdôm bruă mơng Khul hlăk ai”, hơdôm khul grup amăng ƀon lan amăng tơring čar Gia Lai hơmâo pơtrut pơtô pơblang, djru brơi mơnuih ƀôn sang mut hrŏm yua boh thâo phrâo hăng lu tơlơi sit nik anun lĕ: Pok hăng lăi pơthâo mrô QR kơ pơphun bơwih ƀong hăng ĕp bruă mă; pok pơhai hơdôm hơbô̆ bruă djă pioh hră pơ-ar điện tử hăng hơdôm hơbô̆ bruă plơi pla điện tử, sang čơ ƀu yua prăk duh ƀơi tơngan…Ră anai, đơ đam tơring čar hơmâo 1.233 grup pơplih yua boh thâo amăng mơnuih mơnam yua ƀing apăn bruă hlăk ai lĕ phun. Pơplih yua boh thaoa phrâo amăng hơdôm bruă mơng Khul hlăk ai hơmâo pơgôp tong ten amăng bruă ngă tui hơdôm bruă jao tui tơlơi pơtrun mrô 924 mơng Khua dêh čar kơ “Tŭ yap jơlan hơdră yua boh thâo phrâo amăng man pơdong plơi pla phrâo, anăp nao plơi pla phrâo rơgơi rơwang thun 2021-2025”. Amai Nguyễn Hoài Phương-Khua khul hăk ai tơring glông Chư Pah brơi thâo:

“Kiăng ngă tui tơlơi pơphun bruă mă thun 2023, bruă yua boh thâo phrâo amăng djă pioh hră pơ-ar kah hăng ba glăi hơdôm tơlơi gal brơi neh met wa amăng tơring glông. Ƀing hlăk ai čơđai lơm nao čuă hơdôm anih yôm amuñ pel ĕp hăng thâo rơđah hră pơ-ar, tơlơi pơhing ƀơi hơdôm anih anun kah hăng hơmâo tơlơi dong yua mơng neh met wa kah hăng ƀing hlăk ai amăng tơring glông”.

Ngă tui hơdôm bruă jao kiăng gum tơngan hrŏm, pơgôp man pơdong plơi pla phrâo, amăng thun 2023, Khul hlăk ai tơring čar Gia Lai hơmâo pok pơhai man pơkra 3 ring hlăk ai gưl tơring čar, 74 ring bruă gưl tơring glông, 615 ring bruă gưl ƀon lan hăng 653 bruă mă mơng hlăk ai mut hrŏm “Pơjing anih dŏ hơdip bơngač-mơtah-agaih-hiam, rơnuk rơnua”; laih dong man phrâo hăng pơkra ming 17 ară jơlan rơđah bơngač amăng plơi pla; pla phrâo rơbêh 996 rơbâo phun kyâo…Ayong Đỗ Đức Thanh-Kơ-iăng khua khul hlăk ai tơring čar Gia Lai lăng yôm, bruă gum tơngan hrŏm mơng hlăk ai Gia Lai hơmâo pơgôp hrŏm hăng ƀon lan ngă tui jơlan hơdră man pơdong plơi pla phrâo ba glăi boh than klă hloh.

“Rơwang thun 2021-2025 ƀing gơmơi tŏ tui mă yua boh thâo phrâo hăng hơdôm boh thâo măi mok amăng gum hrŏm man pơdong plơi pla phrâo. Hrŏm hăng anun, bruă pơlir hăng djop gưl, gơnong bruă kiăng hơmâo hơdră bruă, rơnoh prăk djru brơi ƀing hlăk ai lĕ tơlơi mơ̆ anom bruă đing nao biă mă. Laih dong ngă tui tơlơi črâo trun mơng Khul hlăk ai gơnong glông, ƀing gơmơi anăp nao man pơdong plơi phrâo hiam klă. Anăp nao pơjing 3 hơbô̆ bruă hăng amăng thun 2024, ƀing gơmơi pơjing ƀơi să An Trung, tơring glông Kông Chro hluai tui tơlơi git gai mơng gưl Ping gah, ƀing gơmơi tŏ tui djru brơi djop ƀon lan, đing ñao rơnoh djru brơi hơdôm boh ƀon lan pơgiong man pơdong plơi pla phrâo./.