Mông jơnum pơphun dik dak hăng lu tơlơi tơña mơng khua mua kiăng lăi nao tơpă hơdôm anŏ aka ƀu klă lơ̆m ngă tui 3 jơlan hơdră tui hơnong pơkă dêh čar amăng man pơdong plơi pla phrâo; pơđĭ kyar bơwih ƀong huă-mơnuih mơnam kual mơnuih djuai ania ƀiă hăng čư̆ siăng; pơhrŏ trun ƀun rin hơdodng kjăp. Ơi Mai Văn Hải, khua pơ ala mơnuih ƀon sang tơring čar Thanh Hóa tơña:

“Tơdơi kơ rơbêh 2 thun pok pơhai ngă tui jơlan hơdră tui hơnong pơkă dêh čar amăng pơđĭ kyar bơwih ƀong huă, mơnuih mơnam kual mơnuih djuai ania ƀiă hăng čư̆ siăng rơwang thun 2021-2025 ba glăi sa, dua boh tŭ yua prong. Samơ̆ hrŏm hăng anun bruă dŏ kaih hăng hơmâo lu tơlơi gun găn amăng hơdră wai lăng. Rơkâo Khua ding jum brơi thâo, tơlơi tơnap tap, gun găn hơpă prong hloh hăng hơdră pơsir hĭ. Bơni kơ khua ding jum”.

Khua ding jum, Khua jơnum min djuai ania brơi thâo, jơlan hơdră tui hơnong pơkă dêh čar amăng pơđĭ kyar bơwih ƀong huă-mơnuih mơnam kual mơnuih djuai ania ƀiă hăng čư̆ siăng lĕ tơnap tap hloh. Yua jơlan hơdră prong hăng pok pơhai ƀơi kual tơnap tap hloh. Hơdôm akŏ bruă, hơdră bruă pơmut hrŏm jơlan hơdră hơmâo wŏt hơdră bruă mơng rơwang hlâo anun dong:

“Tơlơi gun găn prong hloh ră anai lĕ bruă pok pơhai ngă tui amăng ƀon lan, yua hơdôm akŏ bruă pok pơhai tong ten tơl rĭm boh plơi pla, rĭm sang anŏ. Kơ hơdră bruă ăt hơmâo hơdôm pok hră pơ-ar črâo ba djop laih, samơ̆ ăt ƀu bĕ hĭ tơlơi glêh tơnap sit nik phrâo ƀuh. Gơnong glông amra kơtưn amăng bruă pel ĕp, pơtrut pơsur hăng črâo ba pơsir hĭ hmao tlôn hơdôm tơlơi tơnap tap, gun găn brơi gong gai ƀon lan. Hăng hơdôm boh plơi pla, amăng hơdôm hră pơ-ar črâo ba tal anai amra kơtưn kah pha lu hloh rơnoh prăk kiăng ƀon lan gir run, đing nao pok pơhai ngă tui”.

Tŏ tui mông tơña kơ boh tơhnal anai, yă Ma Thị Thuý, khua pơ ala mơnuih ƀon sang tơring čar Tuyên Quang tơña tui anai: “Lơ 23/2/2023, Khua dêh čar hơmâo kông điêng mrô 71 mơ-it djop ding jum, gơnong bruă pơsir hĭ tơnap tap, gun găn kơ bruă ngă tui 3 jơlan hơdră tui hơnong pơkă dêh čar, amăng anun hơmâo jơlan hơdră tui hơnong pơkă dêh čar amăng pơđĭ kyar bơwih ƀong huă-mơnuih mơnam kual mơnuih djuai ania ƀiă ƀơi kual čư̆ siăng. Hăng tơlơi gơgrong lĕ anom bruă git gai jơlan hơdră anai, Khua ding jum brơi thâo lơm Ding jing ngă tui giong tui tơlơi rơkâo mơng kông điêng mrô 71 kiăng hơdôm boh ƀon lan pok pơhai ngă tui”.

Khua ding jum, Khua jơnum min djuai ania Hầu A Lềnh brơi thâo kông điêng hơmâo djop ding jum, gơnong bruă, gong gai ƀon lan pok pơhai ngă tui khut khăt hăng pơtrun lu hră pơ-ar kiăng pok pơhai ngă tui. Samơ̆ lu tơlơi črâo trun, hơdră bruă phara bơdjơ̆ nao kual mơnuih djuai ania ƀiă kiăng lăng glăi dong hăng pơplih pơkra brơi lăp djơ̆ hăng tơlơi sit nik:

“Truh lơ 30/3 hơmâo 15/15 boh ding jum, gơnong bruă hơmâo jao bruă pơsir hĭ laih anun hơmâo hră pơ-ar lăi glăi, črâo ba hơdôm boh ƀon lan pơsir hĭ 121 tơnap tơnap tap, gun găn. Yua anun, grup tal sa pơgiong hlâo hrơi 30/3. grup tal dua lĕ hơdôm hră pơ-ar pơsit aka ƀu pơtrun dŏ kơnong 2 pok hră. Sa lĕ črâo ba ngă tui akŏ bruă mrô 1, 9 yua Jơnum min djuai ania git gai hăng črâo ba ngă tui akŏ bruă 2 mơng Ding jum pôr pơhing, anai lĕ grup bruă aka ƀu pơtrun. Grup tal tlâo lĕ hơdôm hră pơ-ar pơsit, črâo ba djop ding jum, gơnong bruă samơ̆ aka ƀu klă, găn găn mơ̆ kiăng čih pơkra glăi, amăng anun hơmâo tơlơi pơtrun mrô 27. Ta amra ƀuh truh ră anai, djop boh tơhnal tui kông điêng mrô 71 mơng Khua dêh čar, hơmâo git gai ngă pơgiong yơh”.

Ăt amăng mông tơña hăng lăi glăi, Khua ding jum, khua jơnum min djuai ania Hầu A Lềnh lăi glăi hơdôm tơlơi tơnap tap, gun găn amăng hơdră djuai ania bơdjơ̆ nao bruă kah pha să, ƀon lan kual mơnuih djuai ania ƀiă, kual čư̆ siăng:

“Hơdôm boh să, ƀon lan hơmâo 15% mrô mơnuih djuai ania ƀiă pơ glông, arăng pơsit tong lĕ să ƀudah ƀon lan, kual mơnuih djuai ania ƀiă dŏ hơdip. Dua dong lĕ să rin rơpa lĕ să hơmâo 15% mrô mơnuih djuai ania ƀiă dŏ hơdip, ƀơi anun dŏ lu sang anŏ rin rơpa arăng amra iâu să rin. Bruă kah pha anai amra ba truh hơdôm bruă, lơ̆m pơsit anun lĕ să rin, plơi pla rin, bơ hơdôm boh să, plơi pla hơmâo mrô sang anŏ ƀun rin pơ yŭ 15% arăng ƀu lăng să rin, să tơnap tap dong tah-hăng anai lĕ bruă ngă tơnap tap”.