Črâo tơngan nao jơlan tuh ƀêtông, găn nao hơdôm boh plơi pla, tha plơi K’Keo, dŏ amăng plơi Hàng Làng, să Gung Ré, tơring glông Di Linh (Lâm Đồng) hok mơ-ak brơi thâo, ƀô̆ mơta plơi pla amăng să hơmâo lu anŏ pơplih phrâo pơhmu hăng hlâo adih. Yua jơlan nao rai gêh gal, gơnam đang hmua huăi arăng pơgô̆ trun nua, jơlan mơng plơi pla nao pơ tơring glông giăm tui…yua anun tơlơi hơdip mơda mơng neh met wa hơmâo hrưn đĭ tong ten pơhmu hăng hlâo adih. Ba truh tơlơi anai lĕ yua hơmâo tơlơi đing nao mơng Ping gah hăng Kơnuk kơna kơ djop mơta, amăng anun hơmâo jơlan hơdră tui hơnong pơkă dêh čar amăng man pơdong plơi pla phrâo.

“Thâo tong ten anai lĕ bruă mă hăng tơlơi dưi brơi kơ neh met wa yua anun abih bang lêng kơ ngă tui. Amăng hrơi blan laih rơgao, neh met wa hơmâo pơphun pla kyâo, pơyơr lŏn hăng gum tơngan hrŏm hăng gong gai man pơdong plơi pla phrâo. Kơnuk kơna djru brơi hăng neh met wa gum pơgôp kiăng pok jơlan nao pơ đang hmua, man pơkra jơlan amăng plơi pla. Ngă hiưm pă man pơdong plơi pla hơmâo jơlan hruaih, ngă gêh gal pơđĭ kyar bơwih ƀong huă, kiăng ƀô̆ mơta plơi pla jai hrơi hiam tui”.

Ƀu djơ̆ kơnong amăng plơi Hàng Làng, să Gung Ré đôč ôh, jơlan hơdră man pơdong plơi pla phrâo hơmâo ba glăi boh tŭ yua sit nik amăng djop plơi pla ƀơi tơring glông Di Linh, tơring čar Lâm Đồng. Ƀơi plơi Duệ, să Đinh Lạc, tơdơi kơ tŭ yap lĕ plơi pla tui gru phrâo, neh met wa ƀơi anai hơmâo gir run ƀiă amăng gum tơngan hrŏm gong gai man pơdong hăng ngă tui hơdôm hơnong pơkă pơplih phrâo.

Tui ơi M’Hiu Nguyên, khua git gai Ping gah plơi Duệ, yua mơnuih ƀon sang thâo rơđah tơlơi dưi sit nik mơng bruă man pơdong plơi pla phrâo hăng ƀing gơñu, brơi kơ plơi pla yua anun hlơi hlơi lêng kơ gir run gum hrŏm. Amăng anun, jơlan hơdră hrơi năm man pơdong plơi pla phrâo hơmâo ngă hăng glăk lar hyu kơtang, ngă ƀô̆ mơta plơi pla pơplih hiam klă: hơmâo apui kơđen pơčrang rơđah, hơmâo rơdêh hyu duñ asuk ruk, jơlan plơi pla pok prong hăng lăng mơtah, agaih rơnăk. Ơi M’Hiu Nguyên brơi thâo:

“Ră anai amăng plơi Duệ glăk gir run ngă tui hăng ba glăi tŭ yua. Ƀing apăn bruă hăng rĭm čô mơnuih lêng kơ gum tơngan hrŏm ngă tui hrơi năm man pơdong plơi pla phrâo. Sit biă ñu, jơlan glông lêng mơtah, agaih rơnăk, asuk ruk hơmâo duñ pơƀut, rôk jơlan hơmâo apui kơđen črang rơđah, djop ară jơlan amăng plơi pla lêng kơ tuh ƀêtông…ƀô̆ mơta plơi pla hơmâo pơplih. Sit biă ñu tơlơi hơdip kơ mơnuih ƀon sang jai hrơi pơđĭ kyar ƀiă”.

Di Linh lĕ tơring glông hơmâo lu mơnuih djuai ania ƀiă hăng rơbêh 40%, amăng anun lu hloh lĕ djuai ania K’ho. Truh ră anai, đơ đam tơring glông hơmâo 18/18 mrô să tui hơnong pơkă plơi pla phrâo, 2 să man pơdong plơi pla phrâo tui gru phrâo amăng rơwang thun 2021-2025, Khul apăn bruă Ping gah tơring glông Di Linh hơmâo pơjing akŏ bruă mrô 04 ngă tui jơlan hơdră hrơi năm man pơdong plơi pla phrâo amăng djop plơi pla. Găn rơgao giăm 1 thun pok pơhai ngă tui, jơlan hơdră hơmâo ngă lar hyu kơtang amăng abih bang mơnuih hăng ƀing apăn bruă Ping gah. Amăng anun, hơmâo tơlơi gơgrong mơng mơnuih ƀon sang amăng man pơdong plơi pla phrâo jai hrơi pơsit tong hăng ngă tui ba glăi tŭ yua. Anai arăng lăng lĕ akŏ phun kiăng tơring glông ngă tui hơdôm hơnong pơkă kiăng hăng djop anăp nao tŭ yap lĕ tơring glông plơi pla phrâo amăng thun 2024. Ơi Vũ Đức Nhuần brơi thâo:

“Akŏ bruă mrô 04 lơ 18/1/2023 mơng Khul apăn bruă Ping gah tơring glông lĕ sa akŏ bruă djop mơta amăng man pơdong plơi pla phrâo. Jao hơnong pơkă brơi rĭm boh să, rĭm boh plơi pla kiăng pơjing hơdôm hơnong pơkă amăng man pơdong plơi pla phrâo. Mah amăng tơring glông hơmâo 9 hơnong pơkă man pơdong plơi pla phrâo ăt khŏm ngă pơgiong. Amăng hrơi blan laih rơgao truh hrơi năm, tơjuh, khua apăn akŏ, khua git gai Ping gah, ƀing khua mua Jơnum min mơnuih ƀôn sang tơring glông pơčlah nao tơl rĭm boh să kiăng pơtrut pơsur, laih anun hrŏm hăng neh met wa ngă tui hơdôm boh tơhnal anun lĕ pơagaih hnoh ia, črâo brơi neh met wa pơphun yua boh thâo phrâo…Ngă lar hyu kơtang amăng abih bang kiăng gơgrong man pơdong plơi pla phrâo”.

Ƀu djơ̆ kơnong gir run man pơdong plơi phrâo amăng thun 2024, tơring glông Di Linh ăt ba tơbiă hơnong pơkă amăng thun 2025 amra ngă tui hơdôm hơnong pơkă plơi pla phrâo tui kru hle, hăng ƀiă biă mă ñu 8 boh să tŭ yap plơi pla phrâo hăng 5 boh să đĭ plơi pla phrâo tui kru hle. Hluai tui akŏ phun ngă tui pran gum pơgôp djop djuai ania, lăng mơnuih ƀon sang lĕ akŏ phun amăng ngă tui bruă man pơdong plơi pla phrâo, đăo gơnang tơring glông Di Linh amra tañ ngă pơgiong hơdôm hơnong pơkă ba tơbiă, pơgôp man pơjing kual kơdư Di Linh jai hrơi hiam klă./.