Pơphun amăng 3 hrơi, mơ̆ng lơ 29/11 truh lơ 1/12/2023 ƀơi plơi prong Kon Tum, tơring čar Kon Tum Hrơi ngui gru grua, bơkơjăp drơi jăn hăng tuai čuă ngui djŏp djuai ania kual Dap Kơdư tal 1, thun 2023 pơpŭ gru grua hiam yôm mơ̆ng djŏp djuai ania kual Dap kơdư, laih dong pơƀuh pơhưč tuai čuă ngui. Hrơi ngui ngor yua Ding jum gru grua bơkơjăp drơi jăn hăng tuai čuă ngui ngă hrŏm hăng hơdôm ding jum, anom bruă gơnong dlông hăng 5 boh tơring čar Dap kơdư kah hăng: Kon Tjm, Gia Lai, Dak Lăk, Dak Nông, Lâm Đồng pơphun. Nao jơnum ngui hơmâo năng ai 1.000 čô kơhnâo, mơnuih ngă sen, mơnuih bơkơjăp drơi jăn hăng khua mua pơ ala brơi djŏp djuai ania glăk dŏ hơdip ƀơi 5 boh tơringc car Dap Kơdư.

Pơhiăp ƀơi mông pơphun ngui ngor hăng git gai, pơ ala kơ Ping gah, Kơnuk kơna, Đại tướng Tô Lâm, Ding kơna ding jum kơđi čar, Khua ding jum Kông an lăi: Ping gah, Kơnuk kơna ta lêng kơ lăng ba pơđĭ kyar abih bang hăng hơđong kual Dap Kơdư. Mơ̆ng hrơi pơplih phrâo truh ră anai hơmâo ngă lu tơlơi pơtrun, tơlơi pơčrâo bruă, tum pơƀut glăi kơ tơlơi anai. Lơ 6/10/2022 Ding jum kơđi čar tal 13 hơmâo ngă Tơlơi pơtrun mrô 23 kơ pơđĭ kyar bơwih ƀong huă - mơnuih mơnam hăng pơgang lŏn ia, rơnuk rơnua kual Dap Kơdư truh pơ thun 2023, lăng nap pơ thun 2045, amăng anun pơsit “Akŏ pơjing gru grua Dap Kơdư pơplih phrâo, djă gru grua djuai ania, djơ̆ hrŏm amăng lu tơlơi phara, pơpŭ kơ gru yôm phara mơ̆ng djŏp djuai ania, lăng anai jing tơlơi pơtrut đĭ kyar hăng mut hrŏm jar kmar mơ̆ng kual”:“Ăt pơsit rơđah Tơlơi pơtrun jơnum ping gah dêh čar tal 13 hăng hơdră pơđĭ kyar boh thâo gru grua truh thun 2030, Hrơi jơnum ngui gru grua, bơkơjăp drơi jăn hăng tuai čuă ngui djŏp djuai ania kual Dap Kơdư tal 1 thun 2023 amra jing hrơi tum pơƀut, bang hyu, jing hrơi mông kiăng abih bang mơnuih ƀôn sang kual Dap Kơdư pơbưp, pơhiăp nao rai, pơƀuh rup, ană mơnuih, anŏ hiam kơdrưh kơ-ang hăng gru grua djŏp djuai ania kual Dap Kơdư hing ang mơ̆ng đưm hlâo truh kơ gơyut gơyâo amăng dêh čar wơ̆t hăng jar rơngiao, pok prong tơlơi gêh gal čơkă tuh pơ alin pơđĭ kyar bruă tuai čuă ngui kual Dap Kơdư lăi hrŏm, tơring čar Kon Tum lăi hơjăn”.

Tơdơi kơ Jơnum pơphun, mông ngui hơmâo Jơlan hơdră adoh suang hăng anăn “Đại ngàn Tây Nguyên - Tinh hoa hội tụ” pioh glăi lu tơlơi lăp hơdor amăng pran jua mơnuih ƀôn sang hăng ƀing tuai nao lăng. Hrŏm hăng năng ai 600 čô kơhnâo, mơnuih ngă sen, mơnuih bơkơjăp drơi jăn mơ̆ng 5 boh tơring čar pơƀuh gru grua hiam mơ̆ng kual Dap Kơdư, amăng mông Ngă lơphet, blung a mơnuih ƀôn sang hơmâo lăng arăng atông hơgor ngui ngor “Âm vang núi rừng Tây Nguyên” yua 500 čô tơhan gah Sang hră Tơhan Cảnh sát Nhân dân atông hăng tơlơi Ayup kek mơ̆ng 100 čô tơhan Grup ngă lơphet Kông an mơnuih ƀôn sang, Anom bruă tơhan rŭi hyu hơdeč Cảnh sát Cơ động. Mơ̆ng să Tà Nùng, plơi prong Đà Lạt, tơring čar Lâm Đồng nao pơ Kon Tum jơnum ngui, kơhnâo Ka The, djuai ania K’ho hok kơdok:“Bơni kơ ƀing pơphun tơlơ jơnum ngui anai. Anai jing hrơi pơƀut abih gru grua boh thâo hiam mơ̆ng djŏp djuai ania adơi ayong ƀơi kual Dap Kơdư. Anai jing hrơi pơbưp, ngui ngor, thâo hluh gru grua phara mơ̆ng rim djuai ania. Ƀing gơmơi ba rai pơ anai eng ao, tơlơi adoh djuai ania K’ho, añăm ƀong mơ̆ng ƀing gơmơi či ngui hrŏm ƀing gơyut”.

Hrơi jơnum ngui gru grua, bơkơjăp drơi jăn hăng tuai čuă ngui djŏp djuai ania kual Dap kơdư tal 1 thun 2023 hơmâo pơphun ƀơi tơring čar Kon Tum hăng lu bruă ngui phara. Amăng anun, bruă gru grua djuai ania hơmâo 6 tơlơi: Ngă yang hơdip mơda mơ̆ng djŏp djuai ania, pơƀuh gơnam pơkra mơ̆ng hơdôm boh tơring; pơdă, lăi pơthâo mơnŏng ƀong huă; ngui ngor adoh suang buh eng ao djuai ania ƀiă kual Dap Kơdư; pơdă prưng gru grua phara mơ̆ng djuai aniao kual Dap Kơdư amăng gru grua djŏp djuai ania ƀơi Việt Nam; pơdă prưng rup hiam kơ gru grua djŏp djuai ania Dap Kơdư hrŏm hăng tơlơi đĭ kyar mơ̆ng lŏn ia. bruă bơkơjăp drơi jăn hơmâo 5 tơlơi pơplông anun lĕ: Pơtrut gai trul, dui hrĕ, pơnah hrăo, đĭ gai bơbor hăng kơdăt kơsăk. Bruă tuai cuă ngui pơƀuh kơ mơnuih ƀôn sang hăng ƀing tuai lu anih anom hiam mơ̆ng tơring čar Kon Tum.

Rơngiao kơ akŏ pơdong anih ngui ngor gru grua, pơƀuh kơ abih bang thâo gru grua hiam mơ̆ng djŏp djuai ania kual Dap Kơdư, hrơi ngui ngor bơkơjăp drơi jăn hăng tuai čuă ngui djŏp djuai ania kual Dap Kơdư tal 1 jing tơlơi gêh gal kơ kual Dap Kơdư lăi hrŏm hăng tơring čar Kon Tum lăi hơjăn “yong ačăng”. Sit biă ñu, ră anai, hơdôm boh tơring čar kual Dap Kơdư lêng kơ hơmâo anih anom, gơnam bơwih brơi tuai; pơtruh nao rai hơdôm anih čuă ngui pơhưč tuai. Mơ̆ng hrơi ngui ngor anai, ha wơ̆t dong gru grua ia iŏm hiam kual Dap Kơdư hơmâo gơyut gơyâo jê̆ ataih thâo, jing tơlơi gêh gal phrâo kơ tuai čuă ngui ƀơi kual Dap Kơdư đĭ kyar.