Blan 7 laih rơgao, tơring čar Bình Định, grup hyu mă bruă yua kơ-iăng khua dêh čar ơi Trần Lưu Quang ba jơlan hlâo mă bruă tơl anih hăng lăng nao rai mơng ataih hăng 19 boh tơring čar, ƀôn prong kual Kơdư tong krah, ter hang ia rơsĭ kual tong krah hăng Dap kơdư amăng ngă tui hơdôm jơlan hơdră tui hơnong pơkă dêh čar.

Rơwang thun 2021-2025, gơnong glông jao abih tih prăk tuh pơ alin pơđĭ kyar rơbêh 39 rơbâo klai prăk brơi hơdôm boh tơring čar kual Kơdư tong krah, ter hang ia rơsĭ kual tong krah hăng Dap kơdư kiăng ngă tui 3 jơlan hơdră tui hơnong pơkă dêh čar. Ră anai, 17/19 boh tơring čar amăng kual hơmâo ngă tui bruă jao ngăn drăp ƀon lan kiăng ngă tui hơdôm jơlan hơdră tui hơnong pơkă dêh čar. Amăng anun, ƀôn prong Đà Nẵng hơmâo pơphun jao rơbêh 93% ngăn drăp ƀôn prong. Hơdôm boh tơring čar Nghệ An, Quảng Nam, Bình Định, Khánh Hòa, Lâm Đồng lĕ hơdôm boh tơring čar ba jơlan hlâo amăng bruă jao prăk kak hăng rơbêh 30%.

Đĭ pơhiăp amăng mông jơnum, Kơ-iăng khua dêh čar ơi Trần Lưu Quang lăi rơđah, jơlan hơdră tui hơnong pơkă dêh čar anăp nao bruă bơwih brơi tơlơi hơdip kơ mơnuih ƀon sang ƀơi kual plơi pla, kual mơnuih djuai ania ƀiă hăng sang anŏ tơnap tap lĕ sa hơdră bruă klă hiam biă mă. Pơhmu hăng thun 2022, djop ding jum, gơnong bruă hăng ƀon lan hơmâo pơsir hĭ tui hơdôm hơdră bruă. Samơ̆ ƀơi sa, dua boh ƀon lan, bruă jao prăk brơi 3 jơlan hơdră tui hơnong pơkă dêh čar kơnong giăm 8%. Lơm bưp tơnap tap amăng hrơi mông ngă tui, kah hăng dŏ gun găn amăng sa, dua hơdră bruă, Kơ-iăng khua dêh čar ơi Trần Lưu Quang rơkâo djop tơring čar kiăng gơgrong, gir run hăng khut khăt ƀiă dong amăng pok pơhai hơdôm jơlan hơdră tui hơnong pơkă dêh čar:

“Gah gơnong glông ƀing gơmơi gơgrong hlâo hăng amra tŏ tui pơplih pơkra, črâo ba tañ hloh hơdôm tơlơi mơ̆ ƀing gih dŏ gun găn. Gah ƀing gih, kâo rơkâo gơgrong, gir run hăng khut khăt ƀiă dong amăng pok pơhai bruă mă, hơmâo tơlơi gun khŏm tơña đĭ gơnong glông hăng hơdôm ding jum, gơnong bruă. Kâo ăt rơkâo djop ding jum, gơnong bruă, tlâo anom bruă git gai pơlir hơbit kjăp hăng hơdôm tơring čar hăng hmao tlôn đing tơngia hmư̆ tơlơi pơgôp hiăp”.

Tui Ding jum kơčăo bruă hăng tuh pơ alin, ră anai hơdôm jơlan hơdră tui hơnong pơkă dêh čar dŏ tơnap tap, gun găn amăng bruă wai lăng, pơphun, ngă tui. Sit biă ñu hơdôm jơlan hơdră hơmâo tŭ yap, pơkă mrô čan prăk tơdơi kơ akŏ bruă jao prăk gap ƀrô mơng sang bruă prăk dêh čar rơwang thun 2021-2025 mơng hơdôm boh tơring čar, yua anun bruă kah pha prăk kak ngă tui hơdôm jơlan hơdră tui mrô pơkă lĕ tơnap pơhlôm brơi. Rơnoh prăk hơmâo jao rĭm thun hăng kah pha tui hơnong pơkă tong ten ngă hơdôm boh ƀon lan tơnap amăng bruă pơsit tong hơnong pơkă amăng rơwang mă bruă hăng pơplih prăk yua amăng hơdôm tơhnal pơkă amăng jơlan hơdră kiăng lăp djơ̆ hăng tơlơi sit nik. Khua ding jum, khua anom bruă kơnuk kơna Trần Văn Sơn brơi thâo:

“Tlâo jơlan hơdră tui hơnong pơkă dêh čar, ră anai Kơnuk kơna akŏ pơjing 26 grup hơmâo ding kơna Kơnuk kơna apăn akŏ nao mă bruă tơl rĭm boh tơring čar. Phrâo anai Kơnuk kơna hơmâo tơlơi pơtrun 1 blan nao tơl anih pơsir hĭ tơnap tap. Yua ră anai lơm nao tơl ƀon lan amra ƀuh lu tơlơi tơnap tap, gun găn kiăng đing nao pơsir, mơ̆ kiăng pơsir tui tơlơi sit nik amăng tơring čar”.

   Kiăng tŏ tui pơtrut tañ bruă jao prăk pơphun hơdôm jơlan hơdră tui hơnon pơkă dêh čar hăng ngă tui tŭ yua tơlơi pơtrun mrô 100 mơng Jơnum lok 5 Khua pơ ala mơnuih ƀon sang dêh čar tal 15, Khua dêh čar rơkâo, djop ding jum, gơnong bruă , gong gah hluai tui bruă jao ječ ameč gum hrŏm hăng Ding jum prăk kak hăng djop ding jum, anom bruă wai lăng akŏ bruă kiăng lăi pơthâo rơnoh prăk mă yua thun 2024 hăng 2025 brơi djop ding jum, anom bruă gơnong glông hăng ƀon lan tui tơlơi pơkă amăng tơlơi pơtrun mrô 38 thun 2023 mơng Kơnuk kơna.

Jơnum min djuai ania ječ ameč git gai, gum hrŏm hăng djop ding jum, anom bruă wai lăng akŏ bruă pel ĕp abih bang Jơlan hơdră tui hơnong pơkă dêh čar amăng pơđĭ kyar bơwih ƀong huă-mơnuih mơnam kual mơnuih djuai ania ƀiă hăng čư̆ siăng rơwang tal I; čih pơkra hră pơ-ar rơkâo pơplih tơhnal tơlơi pơtrun tŭ yap Jơlan hơdră tui tơlơi pơkă, lăp djơ̆, hră pơ-ar djơ̆ tơlơi phiăn amăng tuh pơ alin man pơdong; lăi pơthâo Khua dêh čar hăng mơ-it nao Ding jum kơčăo bruă hăng tuh pơ alin blan 8 thun 2023.

Ding jum prăk kak git gai, gum hrŏm hăng djop ding jum, anom bruă bơdjơ̆ nao pơgiong bruă čih pơkra, pơhrua hơdôm tơlơi pơkă kơ rơnoh prăk mă yua amăng hơdôm jơlan hơdră tui hơnong pơkă dêh čar./.