Bruă man gŏ lŏn tui phiăn juăt mơng djuai ania Bơnông ƀơi să Yang Tao, tơring glông Lak, tơring čar Daklak mơng sui hmâo laih lu mơnuih thâo truh. Khă hnun hai, tui hrơi blan, bruă mă tui phiăn juăt anai amra rơngiă tui laih. Lăng ƀuh tơlơi anun, lom jơlan hơdră rim să rim gơnam dưi pok phun ƀơi plơi pla, gong gai să hmâo pơsur laih neh wa rơkâo gum hrom jơlan hơdră hăng gơnam “Gŏ lŏn tui phiăn juăt mơng djuai ania Bơnông’ kiăng pơđĭ tui tơlơi hơdip mơda prăk pơhrui glăi kơ mơnuih ƀôn sang hăng pơgang, ngă tui bruă mă đưm mơng plơi pla. Ơi Y Wu Sruk, Kơ-iăng Khua Jơnum min mơnuih ƀôn sang să Yang Tao, tơring glông Lak brơi thâo:

 “Ƀing gơmơi glăk djă pioh hăng rơnăk pioh plơi mă bruă đưm ăt čang rơmang mơn pơđĭ kyar đĭ hăng ba mut amăng anih sĭ mơdrô. Ră anai ƀing gơmơi hmâo ngă hră rơkâo mut amăng OCOP. Ră anai hmâo lu tuai hyu čuă ngui nao pơ̆ tơring glông Lak hmâo weh nao plơi kiăng man lông lăng gŏ lŏn, pel ĕp ƀing thâo bruă đưm man gŏ lŏn. Ƀơi tơring glông ăt hmâo mơn sa dua čô mơnuih hlăk ai pơsit jơlan gah pơđĭ kyar tuai čuă lăng plơi pla. Tui tơlơi pơtrun pơsit mơng Grŭp mă bruă Ping gah tơring glông amra pơdŏng tơring glông Lak jing anih anom phun tuai čuă ngui mơng tơring čar Daklak truh rơwang 2030. Ƀing thâo bruă đưm gir run ngă hiưm hơpă ba gơnam plơi pla man pơkra truh hăng abih bang hơdôm anih anom pơkon thâo kơ gŏ lŏn mơng pô”.

Bôh nik brơi ƀuh, Jơlan hơdră rim să sa gơnam tam hmâo pran pơtrut kơtang kơ lu tơlơi pơmin phrâo, hơdôm gơnam phrâo pơphun hmâo ƀơi abih bang hơdôm bôh plơi pla. Ơi Hoàng Mạnh Cường, Khua Sang bruă bơwih ƀong mơnuih ƀôn sang sa ding kơna Kiên Cường, ƀơi phường Tân Tiến, plơi prong Buôn Ma Thuột hăng gơnam “Kơ phê mơja Kiên Cường” dưi tŭ yap laih gơnam djơ̆ hăng OCOP 4 bôh asar bôh pơtŭ lăi thâo: Gum hrom jơlan hơdră OCOP lĕ tơhnal pioh hơdôm bôh anom bơwih ƀong pơđĭ kyar gơnam klă hloh, ngă giong hĭ wot gru mrô, anô̆ klă hiam, pơđĭ tui pran bơkơtưn ƀơi anih sĭ mơdrô.

 “Biă mă ñu hăng rim pô, rim anom bruă ñu leng kơ hmâo tơlơi sôh laih. Sit yơh tơlơi mơng rim gơnam, rim pô gơnam lĕ ñu ƀu hơhrŭp ôh. Mơng tơlơi amăng gơnam anun kah hăng tơhnal pioh ñu pơblang kơ ƀirô wai lăng, pơblang kơ anih sĭ mơdrô, kơ mơnuih blơi yua thâo hluh rơđah hloh kơ anô̆ pha ra mơng gơnam anun. Yua kơ sa gơnam ră anai arăng ƀu djơ̆ kơnong kơ kiăng kơ klă hrom hăng anun gơnam anun sit nik hmâo nua lom ñu djă tom gru grua phiăn juăt wot bôh thâo đưm kual plơi pla anun. Yua anun lu tơlơi anai ñu ƀu djơ̆ kơnong kơ lăi pơthâo rơđah kơ gơnam ôh mơ̆, ñu dô̆ lăi đĭ wot bôh thâo kual mơng plơi pla anai dong”.

Rơgao kơ 4 thun pok pơhai jơlan hơdră rim să sa gơnam tam, truh ră anai, tơring čar Daklak hmâo 72 mơta gơnam djơ̆ hăng OCOP gưl tơring čar mơng 3-4 asar bôh pơtŭ. Pơhrui hmâo mơng gơnam OCOP ăt đĭ na nao mơn, pơsir bruă mă kơ sa mrô lu mơnuih mă bruă ƀơi plơi pla hăng rơnoh pơhrui glăi lu. Mơng yak pok phun anai, Jơnum min mơnuih ƀôn sang tơring čar Daklak hmâo pơsit “Akô̆ bruă gơnam OCOP mơng tơring čar truh kơ thun 2025 hăng pơsit jơlan gah anăp nao truh thun 2030”. Amăng anun ba tơbiă tơhnal pơkă, abih bang hơdôm bôh să amăng tơring čar leng kơ khom hmâo gơnam OCOP. Truh thun 2025 amra hmâo 200 mơta gơnam hmâo tŭ yap OCOP, truh thun 2030 đơ đam tơring čar amra hmâo 300 mơta gơnam OCOP. Hơdôm gơnam khom pơđĭ tui ƀơƀrư̆ anô̆ klă, pơđĭ asar bôh pơtŭ hăng dưi ba hyu sĭ lu amăng lŏn ia pô hăng pơ̆ dêh čar tač rơngiao kiăng ba glăi bôh tơhnal sit nik. Ơi Nguyễn Hoài Dương, Khua Gơnong bruă đang hmua hăng pơđĭ kyar ƀôn lan, Khua Anom bruă git gai Jơlan hơdră Plơi pla phrâo tơring čar Daklak brơi thâo:

 “Kiăng gơnam OCOP djơ̆ hăng hơdôm tơlơi pơkă kiăng ba hyu sĭ lĕ kơnuk kơna ăt hmâo mơn hơdră bruă djru gơnam mă yua kiăng djru bruă bơwih ƀong huă ngă đang hmua ƀudah djru anom mă yua mơng hơdôm anih anom ngă rai gơnam, djru pơhrăm brơi bruă mă. Anai lĕ hơdôm bôh yôm jing yôm pơphăn biă, laih anun djru pơtrut sĭ mơdrô, anih anom pioh sĭ mơdrô, prăk mă yua pơjing anăn gơnam tam, djru ĕp anih anom sĭ mơdrô amăng lŏn ia ta hăng sĭ kơ dêh čar tač rơngiao lăi pơhư̆č hơdôm gơnam anai. Anun lĕ hơdôm tơlơi amăng jơlan hơdră OCOP rơwang truh tơhnal pơsit laih hăng đing nao kiăng djru pô gơnam tam mă bruă ba glăi bôh tơhnal hloh”.

Jơlan hơdră rim să sa gơnam tam glăk jing pran pơtrut ngă tui mơng pô kiăng pơtrut đĭ, ngă phrâo bruă bơwih ƀong ƀơi plơi pla Daklak. Tơlơi anai ăt glăk pơjing mơn pran pơtrut đĭ prong kơ pơdŏng plơi pla phrâo tui jơlan gah kơjăp phik mơng bruă pơsit anih gơgrong kơ gơnam tam plơi pla./.

            Hương Lý VOVTN/Siu H’ Prăk pơblang