Thun 2023, đơ đam dêh čar pơkă tơhnal mă bruă năng ai kiăng hơmâo 78% mrô să ngă djơ̆ tơhnal pơtrun plơi pla phrâo; boh ƀiă ñu 270 boh anih gưl tơring glông dưi tŭ yap plơi pla phrâo, hơmâo 7-8 boh tơring čar, ƀôn prong tŭ yap ngă giong tơhnal pơkă plơi pla phrâo.

Tui hăng anom bruă pơpha bruă ngă hrom man pơdong plơi pla phrâo, djop tơring čar kiăng pơtrut tañ hloh bruă pơtô pơblang, pơblih hơdră man pơdong plơi pla phrâo lir hơbit hăng bruă ngă hmua rơgoh hơdjă, plơi pla phrâo, mơnuih ngă hmua thâo rơgơi. Git gai mông jơnum, Khua ding jum Bruă hmua hăng pơđĭ kyar plơi pla ơi Lê Minh Hoan lăi lĕ: Man pơdong plơi pla phrâo ƀu kơnong lăng yôm kơnang kơ hnong pơhrui mơ̆ng mơnuih ƀôn sang đôč ôh, ƀu ngă hrup kar kăi sa hnong, man pơdong plơi pla phrâo kơnang kơ atur rơnoh yôm gru grua yôm phara, anŏ hiam mơ̆ng rĭm plơi pla tơring čar, anih mơnuih ƀôn sang dŏ.