Tơdơi kơ pơmut hrŏm hăng Ninh Thuận, Khánh Hoà jing kual lŏn pơtum pơƀut lu tơlơi gal pơprong: hang ia rơsĭ glông hloh Việt Nam, kual bul pơtâo plao ia rơsĭ hơmâo djop mơta, lu tong wing hăng hang mơnơi hmư̆ hing anun lĕ Nha Trang, Vân Phong, Cam Ranh, Ninh Chữ, Vĩnh Hy, hrŏm hăng kual glai rưng hiam, tơdron har hăng gru grua yôm phara. Anai lĕ atur kiăng tơring čar pơđĭ kyar amăng djop mơta bruă anun lĕ tuai čuă ngui mơtah, apui lơtrik hơdjă, jơlan glông mơtah hăng tơlơi hơdip mơtah hơdjă brơi mơnuih mơnam.  

Samơ̆, Khánh Hòa ăt gơnang nao sa, dua anih nao čuă ngui tui hluai hăng amuñ bơdjơ̆ nao tơdah hơmâo tơlơi rung răng amăng rŏng lŏn tơnah.

Amăng mông jơnum, lu mơnuih rơgơi kơhnâo rơkâo Khánh Hoà kiăng tañ ba tơbiă hơnong pơkă tuai čuă ngui mơtah, hơnong pơkă truh thun 2030 hơmâo 80% anih jưh tuai hơmâo hră pơsit mơtah. Tui anŏ juăt ƀuh mơng sa, dua kual bơwih brơi tuai čuă ngui hmư̆ hing amăng ƀon lan brơi ƀuh, pơđĭ kyar mơtah kiăng hrưn đĭ pơhưč tuai rah, kiăng pơgôp pơhlôm brơi tơlơi bơwih ƀong huă mơnuih mơnam rah. Tui ơi Phạm Minh Nhựt, Khua khul pơlir bơwih brơi tuai čuă ngui Nha Trang-Khánh Hòa, anai lĕ jơlan kiăng kiăo tui kah dưi hrưn đĭ pran bơkơtưn, ba glăi rơnoh yôm hơđong kjăp hăng pơhlôm brơi tơlơi bơwih ƀong huă sui pơ anăp:

“Tuai čuă ngui mơta, čuă ngui hơđong kjăp ƀu djơ̆ lĕ bruă ngă tui arăng pơsur ôh mơ̆ anai lĕ tơlơi kiăng ngă mơng anom bruă bơwih brơi tuai čuă ngui. Sit biă ñu lĕ anom bruă bơwih gah sang jưh tuai, anom bruă čơkă tuai kiăng pơlir wai pơgang jum sar hăng bruă bơwih brơi mơng ƀing gơñu. Ngă hiưm pă wai pơgang jum dar hiam hơdjă, tơlơi anai amra djă pioh tơlơi hơđong kjăp, pơhmutu ƀơi anăp kơ bruă mă yua gơnam jê̆ giăm hăng ayuh hyiăng lŏn mơnai. Ƀudah hơdôm bruă duñ pơƀut, pơrai hĭ djah djâo”.

Ơi Nguyễn Long Biên, Kơ-iăng Khua Jơnum min mơnuih ƀôn sang tơring čar Khánh Hòa brơi thâo, tơring čar amra ngă tui hơdôm tơlơi pơgôp amăng hơdră bruă, pơtrut ngăn rơnoh amăng mơnuih mơnam, pơsur anom bruă tuh pơ alin; laih dong pơmut hrŏm hơdôm jơlan gah mơng gơnong glông kiăng tañ dưi ngă hơdôm hơnong pơkă jing anih čuă ngui mơtah djop mơta:

“Khánh Hoà čang rơmang tŏ tui hơmâo tơlơi đing nao, gum hrŏm mơng gơnong glông, anom bơwih ƀong sĭ mơdrô, ƀing rơgơi kơhnâo hăng mơnuih mơnam kiăng ngă tui tơlơi čang rơmang jing anih phun bơwih brơi tuai čuă ngui kual ia rơsĭ jar kmar, plơi prong mơtah-rơgơi, jơlan mơta-hơđong kjăp, pơgôp amăng hơnong pơkă pơđĭ kyar dua mrô rơwang thun 2025-2030”./.