Hơdôm blan rơnuč thun 2022, tơlơi mă bruă ngă hmua pla pơjing ƀơi plơi Đak Sây, să guai dêh čar Đak Long, tơring glông Đak Glei, tơring čar Kon Tum lăng hăt ba mơtam yơh, dik dăk ječ ameč. Phrâo pĕ kơphê giong, 130 boh sang anŏ amăng plơi hăt nao buč hơbơi plum kiăng hmao ba sĭ kơ sang măi kơ-uă tơpung hơbơi ƀlang. Rơnoh prăk pơhrui glăi mơ̆ng dua mơta phun pla anai amăng rơnuč thun jing anŏ djru kơ mơnuih ƀôn sang hơmâo prăk či blơi prăp gơnam yua amăng rơnuč thun čơkă têt ngă yang thun phrâo, pioh blơi gơnam yua amăng sang anŏ.

Ơi A Xôn, Khua git gai ping gah plơi Đak Sây brơi thâo, bruă ngă hmua pla pơjing, tơlơi hơdip mơda mơnuih ƀôn sang amăng plơi thun anai đĭ đăi ƀiă laih tui hơdră man pơdong plơi pla phrâo mơ̆ng gong gai kơnuk kơna hăng khua mua ling tơhan pơgang guai dêh čar puih kơđông Đak Long djru:

“Gong gai kơnuk kơna, djop khul grup mơnuih mơnam amăng să pơtô lăi, pơčrâo ba mơnuih ƀôn sang hơdôm bruă mă rơđah rơđong pioh ngă tui man pơdong plơi pla phrâo. Puih kơđông Đak Long mơ-it nao khua mua, ling tơhan djru rĭm sang anŏ thâo hơdră pla pơjing, wai lăng phun pla kiăng tŭ yua hloh, bơwih ƀong huă đĭ. Thun anai, mơnuih ƀôn sang mơak biă mă lơ̆m kơphê pĕ pơhrui boh lu. Ƀơi kual giăm guai dêh čar tơnap tap phrâo găn rơgao sa thun tơlơi hơdip mơda pơblih phrâo tui anai ƀuh mơak biă mă yơh”.

Đak Long lĕ să guai dêh čar sô̆ hăng dêh čar Lao, jing să tơnap tap hloh tơring glông Đak Glei, tơring čar Kon Tum. Ngă tui hơdră dêh čar pơtrun man pơdong plơi pla phrâo, găn rơgao lu tơlơi tơnap tap, truh abih thun 2022, să hơmâo ngă giong 14/19 tơhnal pơkă. Ơi Huỳnh Ngọc Ly, Khua Jơnum min mơnuih ƀôn sang să Đak Long brơi thâo, dưi hơmâo boh tơhnal anai lĕ yua kơ gong gai kơnuk kơna să thâo pơtum lu pran jua ngă bruă, tơlơi glăm ba mơ̆ng mơnuih ƀôn sang man pơdong plơi pla phrâo:

“Rơngiao kơ bruă lăi pơthâo djru ping gah, gong gai kơnuk kơna să ngă tui tơhnal pơtrun bơwih ƀong huă pơđĭ kyar mơnuih mơnam, pơgang tơlơi rơnuk rơnua dêh čar, Puih kơđông tơhan dŏ pơpha mơnuih ping gah nao jơnum hrom khul ping gah amăng plơi, kiăng thâo tơlơi pơhing, anŏ kiăng mơ̆ng mơnuih ƀôn sang, hơmâo hơdră tơgŭ mă bruă pơ anăp, lăi pơthâo hăng khua ping gah, gong gai kơnuk kơna să pơtrut pơđĭ kyar bơwih ƀong huă.

Dua dơ̆ng lĕ, hơbô̆ bruă ƀing khua mua, ling tơhan mơnuih djuai ƀiă amăng puih kơđông ngă adơi ayong hăng hơdôm sang anŏ amăng plơi pioh pơtô ba pơđĭ kyar bơwih ƀong huă sang anŏ anun. Hơdôm ƀing tơdu dŏ kơƀah amăng mơnuih mơnam dưi hơmâo ƀing tơhan amăng puih kơđông đing nao djru ba, pơčrâo brơi hơdră bơwih ƀong huă, bruă mă kiăng pơđĭ kyar bơwih ƀong huă sang anŏ”.

Thun 2022, tơring čar Kon Tum hơmâo 7 boh să dưi ngă djơ̆ tơhnal pơkă plơi pla phrâo, amăng anun să guai dêh čar Sa Long, tơring glông Ngọc Hồi jĕ hăng dêh čar Kur. Amăng bruă mă man pơdong plơi pla phrâo, yua thâo pơtum pran jua gum pơgôp prong, gong gai kơnuk kơna, mơnuih ƀôn sang hăng khua mua tơhan pơgang guai dêh čar djru pran jua hrom pơsir lu bruă, tơlơi pơhing amăng anih dŏ. Ơi Nguyễn Hữu Bằng, Khua jơnum min mơnuih ƀôn sang să Sa Long lăi, kiăng dưi ngă djơ̆ tơhnal pơkă plơi pla phrâo, hơmâo pran prong djru mơ̆ng khua mua, tơhan puih kơđông Sa Long:

“Kiăng kơ să Sa Long rơnuč thun 2022 ngă djơ̆ tơhnal pơkă plơi pla phrâo, amăng hơdôm thun rơgao bruă ngă hrom hăng puih kơđông tơhan pơgang guai dêh čar ƀing gơmơi juâ̆t bơlăi Puih kơđông hăng să lĕ sa đôč ngă hrom mă bruă klă biă mă. Čang rơmang hơdôm thun tŏ tui amăng bruă mă anai hơmâo bang bơngač hloh pioh pơtrut pơđĭ kyar bơwih ƀong huă mơnuih mơnam, pơgang rơnuk rơnua dêh čar amăng să klă hloh”.

Gum hrom pran jua hăng gong gai kơnuk kơna, mơnuih ƀôn sang ƀơi 13 boh să amăng tơring čar Kon Tum man pơdong plơi pla phrâo, Anom bruă khua tơhan pơgang guai dêh čar tơring čar Kon Tum mơ-it nao ƀing khua mua, ling tơhan djru 11 boh să, pơpha mơnuih ping gah mơ̆ng djop puih kơđông nao jơnum hrom ping gah amăng 71 boh plơi, ngă adơi ayong, wai lăng ba 1000 boh sang anŏ amăng kual guai dêh čar; djru mơnuih ƀôn sang pơđĭ kyar ngă hmua, pơkra jơlan glông hăng hơdôm rơbâo hrơi bruă.

Hơdôm hơbô̆ bruă djru mơnuih ƀôn sang lui rơmŏn kŏn rin, man pơdong plơi pla phrâo ba glăi lu boh tơhnal tŭ yua sit nik dưi pơblih phrâo tơlơi hơdip mơda mơnuih ƀôn sang hăng ƀô̆ mơta amăng plơi pla. Thiếu tá Nguyễn Doãn Hải, khua apăn bruă kơđi čar Kơ-iăng khua puih kơđông Sa Long brơi thâo:

“Hlâo adih mơnuih ƀôn sang juâ̆t ngă hmua tơjŭ pơdai pla kơtor tui phiăn juâ̆t hơđăp sa thun sa bơyan hmua, anun boh čroh pơhrui glăi ƀu lu ôh. Puih tơhan pơgang guai dêh čar djru mơnuih ƀôn sang hơdră ngă hmua sa thun lu bơyan yuă pơdai hnun yơh pơdai jor hloh. Ping gah, khua mua tơhan pơgang guai dêh čar ngă hrom gong gai kơnuk kơna amăng tơring glông, să, brơi ƀing apăn bruă hăng khua mua ling tơhan nao djru pơkra, hrêp glăi pưk sang kơ mơnuih ƀôn sang kiăng tañ ngă giong tơhnal pơkă plơi pla phrâo. Sang anŏ pơpă ƀu hơmâo mơnuih mă bruă ngă hmua, hơmâo tơhan djru ba ngă hmua plai ƀiă tơlơi kơƀah”.

Truh abih thun 2022, tơring čar Kon Tum hơmâo 43 boh să dưi ngă djơ̆ tơhnal pơkă plơi pla phrâo. Amăng anun kơnong treng guai dêh čar glông ataih 292 km sô̆ hăng guai dêh čar Kur, Lao lĕ hơmâo 6/13 boh să ngă djơ̆ tơhnal pơkă plơi pla phrâo, amăng anun tơring glông Ngọc Hồi hơmâo 5 boh să hăng tơring glông Ia Hdrai hơmâo 1 boh să ngă djơ̆ tơhnal pơkă plơi pla phrâo. Bruă ngă tui tŭ yua Hơdră dêh čar pơtrun man pơdong plơi pla phrâo hlăk djru kơ 13 boh să giăm guai dêh čar, gah 4 boh tơring glông Đak Glei, Ngọc Hồi, Sa Thầy hăng Ia Hdrai tơring čar Kon Tum jai hrơi pơblih phrâo hiam klă tui.