Hrŏm hăng hơdôm ară jơlan să Đơn Dương, tơring čar Lâm Đồng, mơtah hlip, mơda rơ-ơ̆ rơ-iŏm lăng nao pơ đang hmua añăm pơtam, hơdôm blah đang bơnga, boh čroh hlăk pĕ pơhrui laih anun anŏ pĕ tlao mơak pơrơhĕ mơ̆ng mơnuih ngă hmua mơak biă mă yơh. Hăng rơbêh 8.400 ha đang phun pla djop mơta, amăng anun hơmâo rơbêh 3000 ha đang añăm, đang bơnga pla tui boh thâo ia rơgơi, hrŏm hăng pŭ rơmô brung djet ia tơsâo giăm 19.000 drơi….hơmâo ba glăi tơlơi hơdip mơda trơi pơđao kơ mơnuih ngă hmua ơ̆m kual anai.

Ơi Nguyễn Tiến Khánh, plơi thôn 1, să Đơn Dương, brơi thâo, bruă să akŏ pơjing hơdră mă bruă ngă hmua lir hơbit pơhlôm rơnoh sĭ mơdrô yom- hơmâo anih blơi hơđong hăng djop mơta gơnam tam phun, kah hăng ia tơsâo rơmô phrâo djet, añăm pơtam, hơbơi pơtơi hơmâo pơtrut bruă ngă hmua hơđong hăng pơđĭ rơnoh pơhrui glăi kơ mơnuih ƀôn sang:

“Să Đơn Dương hơmâo anŏ gêh găl hrŏm abih bang mơ̆ng tơring glông Đơn Dương hơđăp, biă mă ñu tơring glông blung a amăng djop tơring čar ƀơi kual Dap Kơdư dưi ngă djơ̆ tơhnal pơkă plơi pla phrâo, ƀô̆ mơta plơi pla phrâo hiam hloh phara biă mă hăng đưm adih. Tơlơi hơdip mơda mơnuih ƀôn sang dưi đĭ tui, lu sang pơprong dlông tal, hơmâo rơdêh krua kah hăng ƀơi plơi gơmơi ƀu hơmâo sang anŏ ƀun rin dơ̆ng tah, rơbêh 7% mrô sang anŏ pơdrong”.

Mơ̆ng lơ 1/7, rơgao tơring čar Lâm Đồng yak nao amăng črăn pơđĭ kyar phrâo hăng anŏ gêh găl ƀuh rơđah laih anun anih mă bruă pok prong mơ̆ng  glai trun pơ ia rơsĭ. Tơring čar hơmâo đơ đam rơhaih truh kơ 24.000 km2, prong hloh amăng dêh čar hăng rơnoh bơwih ƀong huă đĭ dong tal 8.

Bruă pơmut glăi 3 boh tơring čar jing sa boh, jai pơtrut Lâm Đồng hơmâo lu anom bơwih ƀong huă pơprong ba akŏ hlâo ƀơi dêh čar, kah hăng anih mă eh pơsơi bosit-alumin-ñôm hăng rơnoh bosit him lăng hơmâo amăng gŭ lŏn truh 5,4 klai tơn; kông ngăn amăng gŭ lŏn hăng bruă čơkă tuai lu anih pơhưč či nao ngui gưl dêh čar kah hăng ƀơi Đà Lạt, đang bơnga gŭ lŏn, rơ-ưng pơtâo Dak Nông hơmâo lu amăng drong, rơ-ưng pơtâo gŭ lŏn prong biă kah hăng đang bơnga ia hnoh rô prong hloh gah rơgup čư̆ apui kơdir đưm đă ƀơi kual Đông Nam Á, dơnao Tà Dung kah hăng tong wing Hạ Long ƀơi Dap Kơdư anŏ hiam ñu, nao čuă ngui ƀơi Phan Thiết-Mũi Né, anih gong gai phara Phú Qúy; anih pla bơnga, pla añăm, pla phun kơbuă rông hlăt suai mrai, rông akan ia rơ-ơ̆….lêng ba akŏ hlâo amăng dêh čar. Ơi Nguyễn Hoài Bão, khua hơđăp git gai ping gah, Khua grup pơ ala mơnuih ƀôn sang dêh čar tal X ƀơi tơring čar Lâm Đồng, đăo kơnang biă mă ñu lăi:

“Ră anai Lâm Đồng hơmâo guai dêh čar, hơmâo ia rơsĭ, đơ đam lŏn ră anai ba akŏ klâo anŏ prong ƀơi dêh čar, anun yơh anŏ gêh găl prong biă mă. Lâm Đồng phrâo tŭ mă tơlơi thâo hluh phrâo, lăng nao pơ anăp adih hăng yom hloh lĕ abih bang khom sa pran jua. Mơnuih ƀôn sang đăo kơ ping gah hăng ia rơgơi tơlơi thâo mơ̆ng mơnuih ƀôn sang Việt Nam ta pioh ngă djơ̆ bruă glăm ba hăng tơlơi čang rơmang Việt Nam khom kiăo tui hmao hrŏm lu dêh čar pơdrong ƀơi rơma kual lŏn kah hăng Wa Hô tom pơtô lăi”.

Tơring čar Lâm Đồng ăt hlăk râo pơdưh kiăng pơsir hĭ anŏ dŏ kơđông glăi hăng lu kơčăo bruă phun čuk jơlan nao rai, mă yua kông ngăn amăng gŭ lŏn, apui yua, pơdong plơi pla phrâo….hăng rơnoh prăk tuh pơalin truh hơdôm rơbâo klai prăk, pioh pơtrut tuh pơ alin nao amăng bruă čar, kiăng pơjing pran kơtang kơ tơlơi bơwih ƀong huă pơđĭ kyar tañ hmar hloh.

Y Thanh Hà Niê Kdăm, ding kơna apăn bruă ping gah dêh čar, Khua git gai ping gah, tơring čar Lâm Đồng lăi rơđah:

“Pơtrut tơlơi bơwih ƀong huă ăt khom pơhlom ngă djơ̆ tơhnal pơkă pơđĭ kyar thun 2025 ƀơi Lâm Đồng lĕ 8%. Bruă kiăng ngă tui ră anai, khom pơhlom boh tŭ yua amăng bruă mă ƀơi gưl ta, laih dơ̆ng djru ba tong ten gưl yŭ. Kiăng ngă hơđong tơdruă amăng bruă mă laih anun pơphun bruă mă hruaih mơak, wai lăng tui hơbô̆ phrâo, laih anun pơtrut ngă gêh găl ba yua tơlơi kơtang mơ̆ng tơring čar hăng pơgang pioh pran jua gum hrŏm kiăng djru amăng bruă pơđĭ kyar tŏ tui tơdơi adih”.

Ping gah, gong gai kơnuk kơna hăng mơnuih ƀôn sang tơring čar Lâm Đồng hlăk pơđĭ tui bruă ngă gum pơgôp tong ten, thâo pơčeh phrâo, gir run khut khăt man pơdong tơring čar plơi pla kiăng jai hrơi pơđĭ kyar pơdrong sah, thâo rơgơi, lăp hăng tơlơi đăo kơnang laih anun tơlơi čang rơmang mơ̆ng Ping gah, Wa Hồ.