Sang anô̆ Sầm Văn Khiàng lĕ sa amăng 2 bôh sang anô̆ tơnap tap mơng plơi Nặm Đông, să Cần Nông tơring glông Hà Quảng dưi hmâo Puih kơđông pơgang guai dêh čar Cần Yên djru 4 drơi un pioh rông. Mơnuih apăn bruă tơhan ăt nao pơtô brơi na nao mơn hơdră bơwih brơi, pơgăn war rông, pơhlôm hlâo tơlơi ruă kơ pŭ un... Tal tết tui phiăn juăt phrâo rơgao, sang anô̆ ñu hmâo laih mrô prăk blung a mơng pŭ un anai pioh pok prong dong war rông un hăng hmâo Tết jơnap hloh. Ơi Khiàng ol kơdol pran jua lăi:

 “Sang kâo hlâo adih pơ̆ plơi gah kơdih, phrâo rai dô̆ pơ̆ anai 2 thun anun tơlơi hơdip mơda dô̆ tơnap tap biă. Dưi hmâo ling tơhan pơgang guai dêh čar gum djru un rông, djru kâo hmâo dong prăk pơhrui glăi bơwih brơi kơ ană nao hrăm, blơi gơnam hrăm hră, blơi dong ia tơsâu rơmô hăng blơi braih huă. Kâo bơni kơ ling tơhan pơgang guai dêh čar lu biă”.

Puih kơđông pơgang guai dêh čar Cần Yên dưi jao wai lăng ƀơi 2 bôh să Cần Nông hăng Cần Yên, hơdôm bôh să tơnap tap mơng tơring glông Hà Quảng (Cao Bằng) hăng mrô sang anô̆ ƀun rin leng kơ 50%. Kiăng pok pơhai ba glăi bôh tơhnal jơlan hơdră pơdŏng Plơi pla phrâo, puih kơđông hmâo gum hrom laih hăng gong gai hơdôm bôh să pel ĕp rim tơhnal pơkă, rim ƀôn ƀut pioh pơdŏng jơlan hơdră, kơčăo bruă djru hiưm hơpă lăp djơ̆. Rơngiao kơ phun pla, hlô rông, mơnuih apăn bruă tơhan Puih kơđông pơgang guai dêh čar ƀơi Cần Yên dô̆ djru neh wa hơdôm rơtuh wot hrơi bruă rim thun pioh pơkra jơlan, pơkra sang dô̆, rơmet agaih anih anom dô̆, pơdŏng pơkra war un hăng pơsur mơnuih ƀôn sang rit đuăi anih krư̆ hlô ƀơi grôm sang. Tơlơi pơtrun pơsit Ping gah Puih kơđông ăt hmâo ba tơbiă mơn tơhnal rim thun djru 2 bôh sang anô̆ tơtlaih mơng ƀun rin kơjăp phik.

Trung tá Nông Văn Ích, mă bruă kơđi čar Puih kơđông pơgang guai dêh čar ƀơi Cần Yên brơi thâo: Yua kơ 2 bôh să hmâo truh kơ 21 bôh plơi, hmâo hơdôm bôh plơi ăt khom rơbat tơkai sa mông kiăng kơ truh pơ̆ kual krah să anun bruă tuh pơplai ngăn rơnoh amra tơnap tap biă. Anom hmâo pơphô brơi laih pioh gong gai hmâo hơdră ngă phrâo, ba glăi bôh tơhnal hloh:

 “Thun 2022, Puih kơđông pơphô brơi laih gưl ping gah, gong gai să Cần Yên pok pơhai ngă pơphô hlâo hơdră plơi pla phrâo ƀơi 3 bôh plơi, bơ̆ ƀing ta ƀu djop pran ngă hyu đơr hơr ôh, tơdơi kơ anun mơng klah čun, mă tŭ tơlơi găn rơgao jơlan pơsir, jơlan gah pơphun hăng pioh hơdôm bôh plơi pơkon mơng 2 bôh să hrăm tui, ngă tui”.

Cao Bằng hmâo jơlan guai dêh čar ataih rơbêh kơ 330km găn 40 bôh să, tơring kual. Kah hăng abih bang hơdôm bôh să leng kơ tơnap tap, mơnuih ƀôn sang dô̆ hui, mrô sang anô̆ ƀun rin lu, jơlan nao rai tơnap tap. Ƀơi hơdôm plơi pla anai, ling tơhan Puih kơđông pơgang guai lĕ khul tơhan phun pơphô ngă tui hơdôm tơhnal pơkă Plơi pla phrâo gah pơdŏng Glông bruă kơđi čar, tŭ mă bôh thâo tơlơi phiăn hăng Bruă pơgang lŏn ia hăng rơnuk rơnua plơi pla. Đại úy Trần Tuấn Ngọc, Mơnuih apăn bruă Puih kơđông pơgang guai dêh čar ƀơi Quang Long, tơring glông Hạ Lang brơi thâo:

 “Ƀơi kual guai dêh čar dô̆ lu sang anô̆ tơnap tap yua kơ dô̆ ataih, jơlan nao rai tơnap, tơlơi pơmin mơng neh wa akă dưm kơnar anun bruă lăi pơhing pơđĭ kyar bơwih ƀong mơnuih mơnam ăt dô̆ bưp ƀu ƀiă mơn tơlơi tơnap. Mơng tơlơi pơtô ba mơng Ƀirô pơtrun bruă ling tơhan Puih kơđông pơgang guai dêh čar kơ pơpha bruă mă mơnuih ping gah gơgrong djru sang anô̆, Puih kơđông pơkiăo nao mơnuih mă bruă nao pơ̆ hơdôm bôh plơi djru mơnuih ƀôn sang. Rơgao kơ gum djru mơng ƀing gơmơi, tơlơi pơmin mơng mơnuih ƀôn sang hmâo pơđĭ tui lu rơđah biă, mơnuih ƀôn sang thâo dưm dăp bruă mă klă hloh, tơlơi pơmin gơgrong ba hlô rông tơbiă mơng krôm sang, pơtrut kơtang hơdôm bruă mă ngă đang hmua sĭ mơdrô”.

Hăng hơdôm anih anom kual čư̆ siăng, kual kơdư tơlơi hơdip mơnuih ƀôn sang dô̆ tơnap tap lĕ ngăn rơnoh iâu pơhrui pioh pơdŏng Plơi pla phrâo ƀu djơ̆ amuñ ôh. Yua anun, rim anom bruă leng kơ hmâo hơdră ngă pha ra ha jăn, pơčeh phrâo, mă yua hăng rim plơi pla hiưm pơhă kiăng lăp djơ̆. Thượng tá Sái Văn Hùng, mă bruă kơđi čar Puih kơđông pơgang guai dêh čar ƀơi Lũng Nặm, Ƀirô git gai Ling tơhan pơgang guai dêh čar Cao Bằng ăt brơi thâo mơn, bruă gum hrom pơdŏng Plơi pla phrâo lĕ bruă mă yôm phăn djru djă kơjăp pô lŏn ia hăng rơnuk rơnua plơi pla kual guai dêh čar:

 “Anai lĕ hơdôm bôh yôm dưi hmâo Ping gah Ƀirô git gai Ling tơhan pơgang guai dêh čar tơring čar hăng hơdôm bôh anom pơsit lĕ bruă mă phun. Djru mơnuih ƀôn sang ăt djru khul Ling tơhan pơgang guai dêh čar mơng plơi pla kiăng mơnuih ƀôn sang hmâo tơlơi hơdip mơda klă hloh, nao hrom hăng kual guai dêh čar hăng gum hrom Ling tơhan pơgang guai dêh čar pơgang lŏn ia pô”.

Amăng mrô 17 bôh să djơ̆ hăng Plơi pla phrâo ƀơi Cao Bằng hmâo lu să guai dêh čar kah hăng Đức Long (Thạch An), Sóc Hà, Trường Hà (Hà Quảng) Đàm Thủy, Ngọc Côn (Trùng Khánh) Thị Hoa (Hạ Lang)... Anai lĕ bôh tơhnal lăp djă pioh brơi ƀuh tơlơi gir run mơng gong gai, mơnuih ƀôn sang hăng amăng anun hmâo tơlơi gum tơngan hrom djru khul tơhan Pơgang guai dêh čar; ăt jing pran pơtrut pioh hơdôm bôh plơi pla, să guai dêh čar hrưn đĭ ngă giong tơhnal pơdŏng Plơi pla phrâo, djru ba glăi tơlơi hơdip trơi pơđao kơ mơnuih ƀôn sang guai dêh čar ƀơi Ngŏ Kơdư dêh čar./.