Anai lĕ tal blung a amai Nguyễn Thị Ngọc Lan hrŏm hăng sa, dua čô tuai čuă ngui mơng ƀon prong Hồ Chí Minh nao đĭ hăng kơčong čư̆ lăng gơnăm kơthul ƀơi tơring glông Lak, tơring čar Dak Lak. Jơlan nao rai bor, đĭ hăng kơčong čư̆, samơ̆ lơ̆m ƀing glai rưng mơtah mơda, čim brim ur mơ-ak, ia krông čroh hnoh hăng pran hor hyu pel ĕp ngă kơ ñu hăng ƀing gŏp dưi đĭ truh hăng kơčong Chư Yang Lak, sa amăng hơdôm kơčong čư̆ glông kơtuai tui kơčong čư̆ Yang Sin. Amai Nguyễn Thị Ngọc Lan brơi thâo, tal đĭ hăng kơčong čư̆ anai ngă kơ ñu mơ-ak biă mă.

“Kâo pơmĭn kâo pô dưi đĭ hăng kơčong čư̆ glông tui anai ôh, samơ̆ hăng pran gir run ăt dưi mơn. Lơ̆m glăk đĭ čư̆ ăt glêh biă mă, samơ̆ pơ alum pran jua pô dŏ kơnong 1 mông dong amra truh hăng akŏ čư̆. Lơ̆m truh hăng glông hloh kâo mưn rơ-ơ̆, dŏ pơ yŭ adih ƀu dưi ƀuh hơdôm anŏ hiam tui anai. Ƀing gơmơi hơdip pơ ƀôn prong ăt ƀuh glai rưng kyâo pơtâo hiam tui anai”.

Đĭ hăng kơčong čư̆ lăng gơnăm kơthul lĕ sa amăng dua tơlơi yôm mơ-ak mơng Y Xim Ndu, tơdăm djuai ania M’nông dŏ ƀơi ƀuôn Yuk La 1, să Dak Liêng, tơring glông Lak, tơring čar Dak Lak, dong mơng hrơi ñu pơphun bruă mă amăng bruă bơwih brơi tuai čuă ngui. Gơnam yôm pơkŏn mơng Y Xim lĕ bruă mă tui tơlơi găn rơgao amăng tơlơi hơdip mơda, gru grua amăng djop plơi pla jum dar dơnao ia Lak. Y Xim Ndu brơi thâo, ñu pioh lu hrơi mông brơi kơ 2 tour hyu čuă ngui amăng glai rưng hăng plơi pla. Mah bưp tơnap tap amăng thun blan klin Covid-19 hođuh đĭ samơ̆ truh ră anai, kông ti TNHH tuai čuă ngui Chư Yang Sin yua ñu akŏ pơjing pơhưč lu tuai.

“Kâo pơđĭ kyar tui hơdră bơwih brơi tuai čuă ngui amăng glai čư̆ pơlir hăng bruă wai pơgang ayuh hyiăng rơhuông adai hăng djă pioh gru grua amăng plơi pla djuai ania ƀiă. Pơgi kơdih tơdah pơđĭ kyar klă kâo amra anăp nao bơwih brơi tuai čuă ngui mơng tač rơngiao ƀơi Việt Nam. kâo čang rơmang akŏ bruă anai amra ba glăi tơlơi đăo gơnang, pơtrut pơsur ƀing hlăk ai pơphun bruă mă, sit biă ñu lĕ ƀing hlăk ai mơnuih djuai ania ƀiă kar hăng kâo anai, amra thâo hluh dong hơdôm tơlơi yôm phăn mơng bruă bơwih ƀong huă pơlir hăng djă pioh gru grua djuai ania pô”.

Ăt amăng bruă pơphun bruă mă ƀơi tơring čar Dak Lak, samơ̆ amai Chu Thị Lan, dŏ ƀơi să Ea Kly, tơring glông Krông Pač, hơmâo tơlơi truh kih amăng bruă lu mơnuih lăng ƀu yôm ôh, anai lĕ bruă bơwih brơi tơlơi suaih pral. Gơnam mơng hla kyâo hăng ia pok ia ƀô̆ Lanchans yua ñu pơđĭ kyar hơmâo sĭ lông lăng hăng ba nao pơplông laih anun mă pri I amăng tal pơplông pơphun bruă mă thâo pơčeh phrâo ƀơi tơring čar Dak Lak. Tui amai Chu Thị Lan, tal pơphun bruă mă yua tơring čar pơphun lĕ hrơi mông yôm phăn kiăng ñu pơkra klă dong gơnam tam tui ñu pơmĭn hlâo kơ ba sĭ mơdrô. Mơng anun ngă tañ ƀiă hrơi blan ba gơnam sĭ mơdrô:

“Jơlan hơdră pơphun hơdôm hrơi pơtop hrăm lĕ yôm biă mă kiăng kơ kâo pơplih pơkra, mă yua amăng hơdôm hơbô̆ bruă bơwih ƀong sĭ mơdrô mơng ƀing gơmơi. Mơng tal pơplông anai kâo amra bưp lu anom bruă tuh pơ alin. Sit biă ñu bruă bơdjơ̆ nao tơlơi suaih pral anai ăt hơmâo lu anom bruă tuh pơ alin đing nao hăng bưng băi lĕ amăng tal pơplông anai ăt hơmâo lu anom bruă tuh pơ alin đing nao hăng kiăng ngă hrŏm pơ anăp anai”.

Hrŏm hăng bruă ngă truh kih mơng hơdôm bruă mă pơplih phrâo mơng ayong Y Xim Ndu hăng amai Chu Thị Lan, mơnuih pơphun bruă mă ƀơi Dak Lak ăt pơlir hăng hơdôm khul grup kiăng prong kơtang, dưi mut hrŏm amăng hơdôm hơnong pơkă prong ƀiă dong. Tui ơi Phạm Hoài Nguyên Anh, Khua grup tuh pơ alin hăng pơphun bruă (Khul mơnuih bơwih ƀong sĭ mơdrô hlăk ai tơring čar Dak lak), lơ̆m pơlir hơbit, ƀing mơnuih pơphun bruă mă hơmâo ĕp ƀuh lu tơlơi dưi amăng hơdôm akŏ bruă pơphun bruă mă mơng ƀing gơñu:

“Kiăng kơ sit nik hăng tŭ yua dong, grup tuh pơ alin hăng pơphun bruă mă hlăk ai amra črâo ba sa čung ba sa čô. Ră anai ăt glăk pơlir hơbit hăng sa, dua gơnam mơng ƀing gơñu anun lĕ akan lăng, sầu riêng, ia djet mơng boh kyâo. Ƀing pô anai glăk lĕ ding kơna amăng grup tuh pơ alin hăng ƀing hlăk ai pơphun bruă mă, gah jơlan gah grup tuh pơ alin hăng pơphun bruă mă gơnong glông mơng Khul mơnuih bơwih ƀong sĭ mơdrô hlăk ai Việt Nam. Grup hơmâo lu bruă mă anun lĕ pơlir hơbit, pơhrăm nao rai hăng sĭ mơdrô. Laih dong, hơmâo anom bruă, hơmâo anih mă bruă, hơmâo gơnam măi mok kiăng ƀing gơñu pơphun bruă mă dưi nao pơphun hơdôm bruă bơwih ƀong mơng ƀing gơñu rĭm hrơi”.

Găn rơgao hơdôm tơlơi lông mơng klin kheng, bruă pơphun bruă mă ƀơi Dak Lak ăt hơmâo hơdôm tơlơi tŭ yua mơng ƀing pơphun bruă mă ƀơi ƀon lan. Ƀu kiăo tui glông jơlan sô hơđăp, lu mơnuih, lu hlăk ai hơmâo ruah jơlan phara hăng kiăo hơdôm bruă amra ba glăi lu tơlơi dưi prong. Djop gưl gong gai, khul bơwih ƀong sĭ mơdrô tơring čar ăt tŏ tui hơmâo hơdôm bruă mă kiăng pơsur pơđĭ kyar brơi mơnuih pơphun bruă mă, djru brơi ƀing pơphun bruă mă amăng tơring čar jai lu tui dong.