Amăng sang anet đôč mơ̆ng sang anŏ pô či Ƀuôn Phơng, să Ea Tul, tơring glông Čư̆ Mgar, tơring čar Dak Lak rĭm hrơi amai H’Hương Niê djuai ania Êđê ăt greh gruñ, hur har dŏ kơteh, dŏ pơjing rai eng, ao abăn akhăn mơñam hăng mrai đưm djuai ania. Hăng amai H’Hương Niê lĕ, rĭm hrơi bruă djă prư̆, mơñam mrai ƀu kơnong bruă mă ĕp prăk đôč ôh, jing tơlơi bơwih ƀong huă hăng sa tơlơi hor kiăng djru hrom djă pioh bruă mă hiam gru ama grua amĭ djuai ania pô. Amai H’Hương Niê brơi thâo:

“Kâo ƀuh lu mơnuih amăng plơi pla Êđê kơnong ƀing đah kơmơi tha đôč mơñam mrai đưm bơ ƀing dra hlăk ai ƀu hor dơ̆ng tah. Yua kơ anun, bruă mơñam mrai đưm djuai ania Êđê jai hrơi hŭi rơngiă hĭ soh sel. Tơdơi kơ hrăm abih anih 12 kâo nao hrăm pơ sang hră hrăm bruă mă pơ ƀôn prong adih, kiăng hrăm bruă mơñam mrai laih hrăm giong kâo glăi hrăm pơhrua dơ̆ng mơ̆ng ƀing kơhnăk bruă mơñam mrai đưm tha rơma amăng plơi”.

Amai H’Hương Niê lĕ mơnuih pơtrut pran jua tơlơi khăp, anŏ hor kơ bruă mơñam mrai đưm djuai ania kơ lu adơi amai amăng plơi. Ƀing adơi amai grup ngă hrom tơhrơi ngă hmua pla pơjing, truh tlam mơmŏt pơkra ming eng ao mrai đưm laih anun rơnuč hrơi kom dŏ hrom ik ăk mơñam mrai hrăm nao rai, djru tơdruă ĕp prăk kăk. Eng ao, gơnam gơñu mơñam mrai đưm ba sĭ mơdrô arăng blơi yua amăng bruă mă, tơlơi hơdip mơda rĭm hrơi. Mơ̆ng anun, hơdră gơñu ming pơkra, ngă hơbô̆, gru pơhmutu tui gru hơđăp laih anun pơblih kiăo tui hơbô̆ phrâo kiăng hiam rô̆, djơ̆ pran jua arăng blơi, samơ̆ ƀu lui ôh tơhnal gru hiam đưm djuai ania Êđê, kah hăng mrai djă  ia iom phun juâ̆t ƀuh lĕ ia jŭ, mriah, kô̆.

Bơhmutu pơhrôp tui ngă hiam ƀơi tơhnal jih ao, jih eng hăng ngă rup bơnga  rup lă, rup hơñueng, hyôč, dô, rup klang črah, boh tơruai hơmâo soh, đơ đa ngă rup bơnga bit bing, bơnga aring čôr rup yang blan, yang hrơi....

Yua thâo pơčeh phrâo laih anun  hăng čơđeng rơgơi, tơngan kơhnăk, tơlơi thâo kơteh, thâo hrăk mơ̆ng gơñu, duñ mơñam rup rap bơnga hiam, abih bang ding kơna amăng grup thâo pơjing soh anun  yơh jai hrơi lu adơi amai pơkŏn rơkâo blơi ba sĭ mơdrô glăi ƀudah mă yua. Pơkă rĭm blan grup ngă ƀong hrom gơñu pơkra ming rai hơmâo rơbêh 200 mơta gơnam hăng rơnoh sĭ mơdrô tuai hluai anŏ gêh găl mơ̆ng 50.000 truh 1.200.000 prăk sa mơta gơnam pơkra rai, rĭm čô ding kơna pơhrui glăi sa blan mơ̆ng 3-4 klăk prăk.

Tơdơi kơ 5 thun ngă hrom pơlir hơbit, hơmâo 6 čô ding kơna amăng grup dưi pơklaih mơ̆ng ư̆ rơpa ƀun rin yua kơ bruă mơñam mrai đưm pioh sĭ mơdrô. Amai H’Hương Niê brơi thâo dơ̆ng:

“Thun 2018 kâo pô akŏ pơjing grup adơi amai mơñam mrai đưm, blung a hơmâo 11 čô mơnuih, ră anai hơmâo 15 čô. Ƀing adơi amai mă bruă ƀong prăk tui rơnoh gơnam hơmâo gơñu pơkra rai. Rơngiao kơ gơnam pơkra ming mơñam tui hơbô̆ hơđăp, kâo hơmâo mơ̆n eng ao pơblih phrâo kiăng djơ̆ hăng anŏ kiăng arăng blơi, rơnoh sĭ mơdrô hăng anŏ kiăng mă yua rĭm hrơi. Grup ngă hrom mơ̆ng ƀing gơmơi mơñam mrai đưm kah hăng eng, ao, abăn akhăn, kơdŭng djă, băk...Arăng blơi čih anăn rơkâo blơi hơdôm gơmơi mơñam hăng pơkra hơdôm anun”.

Hăng pô gơgrong ngă Kơ-iăng khua grup đah kơmơi mut phung să Ea Tul, tơring glông Čư̆ Mgar, amai H’Hương Niê pơtô lăi brơi thâo boh yôm gru grua hiam đưm mơñam mrai djuai ania kual Dap Kơdư, amăng anun hơmâo mrai đưm djuai ania Êđê. Ñu jak iâu adơi amai buh eng ao gru grua djuai ania pô amăng hrơi jơnum plơi, hrơi mơak ƀong huă, ngă yang thun phrâo, pơdŏ rơkơi bơnai, djai brŭ....

Ƀu kơnong mơñam ñu pô mơtam, pơtô brơi kơ mơnuih pơkŏn thâo bruă ngă gru grua đưm djuai ania, amai H’Hương Niê dŏ hơduah ĕp brơi anih blơi ba sĭ mơdrô gơnam gơñu pơkra ming, tơki kơ anih lăi pơthâo amăng plang internet, tơlơi pơhing mơnuih mơnam facebook. Ƀu kơnong djru ƀing adơi amai amăng grup hơmâo prăk pơhrui glăi hơđong đôč ôh, hăng pran jua thâo khăp pap, amai H’Hương Niê dŏ hơmâo lu tơlơi pơmin bruă mă djru ba ƀing adơi amai tơnap tap, sang anŏ ƀun rin, ƀing mơnuih ƀu klă drơi jăn hăng ngă hrom lu bruă mă pok anih pơtô mơñam mrai kơ ƀing čơđai rơnuk tơdơi amăng plơi pla.

“Amăng grup hơmâo ƀing adơi amai tơnap tap anun yơh grup gơñu hơmâo tơlơi pơmin duñ hơdôm blah bơnal rơbêh tơdơi kơ trơ̆i sit, tơčoh giong eng ai, abăn akhăn pioh mơñam ƀudah sit glăi ngă gơnam eng ao anet, kơdung yua kiăng pơgang anih dŏ jum dar huăi tuh lui soh sel laih anun mă gơnam anun sĭ rơnoh rơgêh mă prăk djru kơ tơlơi khăp pap, brơi ƀing adơi amai ƀun rin, ƀing mơnuih ƀu klă drơi jăn kiăng gơñu thâo mơnuih mơnam amăng plơi pla ăt ƀu lui raih gơñu ôh.

 Hơdôm mơta gơnam djơh hăng anun, kah hăng ngă hrĕ akă kôl ƀŭ, kơdung djă ngui anet. Kâo čang rơmang ƀing čơđai rơnuk tơdơi thâo pơpŭ khăp kơ dram gơnam gru grua djuai ania pô. Dua dơ̆ng lĕ, jai hrơi hơmâo lu anih blơi gơnam eng ao, kơdung hăng mrai đưm mơ̆ng adơi amai plơi pla ta pô pơjing”.

Hơdôm thun rơgao, Khul đah kơmơi mut phung tơring glông Čư̆ Mgar, tơring čar Dak Lak ăt hơmâo ngă hrom hăng sang bruă pơtô bruă mă jak ƀing adơi amai đah kơmơi djuai ƀiă amăng plơi pla pok anih pơtô bruă mă gru grua đưm mơñam mrai. Khul hơmâo jak iâu lu adơi amai mut ngă ding kơna mơñam mrai đưm ƀuôn Ƀrah să Ea Tul, tơring glông Čư̆ Mgar hăng hơdôm hơpluh čô mơnuih ngă ding kơna. Khul hơmâo djru kơ grup brơi čan prăk 35 klăk prăk mơ̆ng keh prăk đah kơmơi pơphun bruă mă, laih dơ̆ng ngă hrom Sang bruă prăk djru mơnuih mơnam tơnap tap tơring glông ngă gêh găl kơ adơi amai grup dưi hơmâo prăk čan blơi mrai, bơnal tral pơkra ming, pơjing eng ao pioh sĭ mơdrô....

Hăng gơnam juâ̆t ĕp blơi kah hăng mrai hrăk, mrai añĕ, ƀing adơi amai rơngai, mơñam, sit pơjing gơnam yua amăng mông wăn rơngiao kơ mông hyu ngă bruă pưk hmua, đah mơ̆ng ĕp prăk pơhrui glăi kơ sang anŏ. Hơdôm thun rơgao, grup ngă hrom mơñam mrai đưm dưi hơmâo lu adơi amai ngă bruă hrom na nao hăng pơđĭ kyar tui, djru hrom lui rơmŏn kŏn rin, laih anun pơgôp hrom ƀu anet bruă man pơdong plơi pla phrâo.