- Kơkuh kơ ih ayong Y Phen Niê, ih dưi lăi pơthâo mơn tơlơi găn rơgao mơng ih pô amăng bruă khul mơnuih ngă hmua kah hăng tơlơi bơwih ƀong huă ?

Y Phen: Lơm glăk ngă Khua khul mơnuih ngă hmua să Dray Sap, kah hăng mơnuih apăn bruă Ping gah, kâo pô lêng kơ pơgiong djop mơta bruă jao, kah hăng lêng kơ ba jơlan hlâo amăng djop bruă kiăng neh met wa ngă tui. Laih dong kiăng neh met wa thâo hơdôm bruă kâo ngă ba glăi tŭ yua, neh met wa đăo gơnang hăng amra ngă tui. Kâo ăt črâo ba neh met wa amăng bơwih ƀong huă kiăng pơđĭ kyar ƀiă dong, kiăng tơlơi hơdip jai hrơi hơđong tui. Amăng sang anŏ kâo ăt ba gru mơn, blung hlâo pơtrut pơsur ană bơnai, kơnung djuai hơdip, bruă mă djơ̆ tơlơi phiăn, gir kơtir bơwih ƀong, ba jơlan hlâo kiăng neh met wa hla tui. Jing sa čô mơnuih apăn bruă Ping gah Cộng sản Việt Nam kâo lêng kơ ba gru amăng djop mơta bruă, lăi pơthâo hơdôm tơlơi črâo trun mơng Ping gah, tơlơi phiăn mơng Kơnuk kơna kiăng neh met wa thâo hăng ngă tui. Mơng anun neh met wa amra gum pơgôp amăng djop mơta bruă ƀơi ƀon lan.

- Hnun hă, ră anai ih lĕ sa amăng ƀiă ding kơna khul mơnuh ngă hmua să Dray Sap dưi pơhrui glăi rơbêh ha mơkrah klai prăk rĭm thun mơng bruă rông hlô hăng ngă hmua, ih dưi lăi pơthâo mơn tơlơi găn rơgao kiăng kơ ba glăi tŭ yua tui anai ?

Y Phen Niê: Sang anŏ gơmơi hơmâo rơbêh 5 ektar lŏn ngă hmua kiăng pơđĭ kyar bơwih ƀong huă. Sang anŏ gơmơi ngă hmua pơdai ia, pla tiu, kơsu, kơphê…Rĭm thun pơhrui glăi ăt giăm 500 klăk prăk, duh hĭ prăk tuh pơ alin dŏ glăi rơbêh 300 klăk prăk…Laih dong, sang anŏ hơmâo man pơkra 2 bơnah drông rông un prong rơbêh 200 met karê, rông mơng 5-6 drơi un ania, lơm tuh hrôh ăt pioh glăi rông truh pơprong kah sĭ. Ră anai giăm 50-60 drơi, rĭm wŏt sĭ giăm 4 tơ̆n mơnong čuh hơtă.

- Rơngiao kơ bruă bơwih ƀong huă, ih ăt ba jơlan hlâo amăng hơdôm bruă gum pơgôp prăk kak man pơdong plơi pla phrâo. Ih dưi lăi pơthâo mơn kơ bruă anai ?

Y Phen Niê: Amăng bruă man pơdong plơi pla phrâo, kâo ăt ba jơlan hlâo pơtrut pơsur neh met wa pơđĭ kyar bơwih ƀong huă, wai pơgang hơđong amăng plơi pla, pơjing tơlơi hơdip trơi pơđao. Hăng tơlơi gơgrong mơng mơnuih apăn bruă Ping gah kâo lĕ mơnuih hyu pơtrut pơsur amăng djop bruă, kiăng gong gai hăng mơnuih ƀon sang gum hrŏm, man pơdong plơi pla tŭ yua hloh. Kâo lêng kơ pơtă pơtăn neh met wa gum pơgôp, mut hrŏm pơjing plơi pla jai hrơi pơđĭ kyar hăng tơlơi hơdip jai trơi pơđao.

- Lơm ngă khua khul mơnuih ngă hmua să Dray Sap, hơdôm thun laih rơgao bruă djru brơi neh met wa kơ boh thâo, prăk tuh pơ alin, hlô rông, phun pla….kiăng mơnuih ƀôn sang pơđĭ kyar bơwih ƀong huă pơhrŏ trun ƀun rin hơmâo ngă tui hiưm pă ñu ?

Y Phen Niê: Lơm ngă Khua khul mơnuih ngă hmua, kâo juăt pơlir hăng hơdôm boh kông ti, anom bơwih ƀong sĭ mơdrô, ƀing rơgơi kơhnâo gah ngă hmua kiăng kơ črân brơi boh thâo kơ neh met wa amăng ngă hmua anun lĕ pla tiu, kơphê, kơsu, hơdôm phun kyâo boh troh, rông un, rơmô, mơnŭ, bê…kiăng neh met wa ngă tui boh thâo phrâo ră anai, mă yua amăng bruă bơwih ƀong kiăng bơwih ƀong klă hloh hăng pơhrui glăi lu mơn. Laih dong, kâo pơlir hơbit hăng hơdôm anih anom brơi čan prăk, ĕp anih čan prăk mă kmlai ƀiă kiăng djru brơi neh met wa hơmâo prăk tuh pơ alin,  gum hrŏm pơđĭ kyar, hơmâo lu dong prăk pơhrui brơi rĭm boh sang anŏ.

- Ơ, bơni kơ ih hŏ!