![Hương Lý/Siu Đoan Pơblang](/themes/custom/vov_4/images/avatar.png)
Amăng sang “Gum pơgôp ling tơhan-mơnuih ƀôn sang” phrâo man pơdong, ơi Y Huê Êban dŏ amăng ƀuôn Niêng 1, să Ea Nuôl, tơring glông Buôn Đôn hok mơ-ak brơi thâo, mơng hrơi hơmâo sang dŏ prong rơhaih, sang anŏ ñu huăi bơngŏt dong tah. Drơi jăn pran jua ăt pơhlôm suaih pral, dưi ngă lu bruă, sang anŏ hơmâo dong prăk pơhrui. Ñu pơpŭ bơni biă mă ƀing ling tơhan hơmâo man pơdong sang brơi sang anŏ gơñu:
“Hlâo adih sang juăt tơdjoh ia lơm hơjan hlim, pơ-iă amăng bơyan phang, ră anai hơmâo gong gai đing nao djru man pơdong brơi sang dŏ kâo hok mơ-ak biă mă. Kâo amra gir run bơwih ƀong kiăng pơđĭ kyar, hrŏm hăng neh met wa amăng plơi pla pơhlôm hơđong tơlơi hơdip mơda”.
Tui ơi Y Kim Êban, Khua ƀuôn Niêng 1, ƀing ƀô̆ đô̆i mơ̆ ơi Y Huê lăi nao lĕ ƀing apăn bruă, ling tơhan mơng puih kơđông K864 (anom bruă pơkra phao kơtuang, anom yua boh thâo phrâo). Anai ăt lĕ anom bruă ngă giang mah hăng ƀuôn Niêng 1 amăng hơdôm thun anai laih. Bruă djru man pơdong sang brơi hơdôm boh sang anŏ ƀun rin hơmâo pơtrut pơsur kiăng hơdôm boh sang anŏ gir run hrưn đĭ.
“Pran khăp pap kơplah wah ling tơhan hăng mơnuih ƀôn sang ăt tong ten mơn, ling tơhan hơmâo nao tơña blan, črâo brơi neh met wa pơđĭ kyar bơwih ƀong huă. Plơi pla gơmơi hok mơ-ak hăng hur har pran jua. Sit biă ñu lĕ hơdôm boh sang anŏ ƀun rin kiăng ƀing gơñu pơđĭ kyar bơwih ƀong huă kiăng ƀơƀrư̆ mrô sang anŏ ƀun rin jai hrơi hrŏ trun”.
![Ơi Y Huê Êban dŏ amăng ƀuôn Niêng 1, să Ea Nuôl, tơring glông Buôn Đôn, tơring čar Dak Lak amăng hrơi mut dŏ sang phrâo](https://vov4-media.solidtech.vn/sites/default/files/styles/large/public/2024-06/22-6%20Y%20Hue%20Eban_0.jpg)
Anai lĕ anom bruă ngă giang mah hăng ƀuôn M’riu, să Čư̆ Huê, tơring glông Ea Kar, tơring čar Dak Lak, 20 thun rơgao, kông ti apui lơtrik Dak Lak hơmâo pơgôp prong prin kiăng pơplih ƀô̆ mơta plơi pla ƀơi anai. Mơng sa boh plơi rin rơpa, khŏm tŭ mă braih djru amăng bơyan giăm yuă hơpiă, ră anai, mrô sang anŏ ƀun rin dŏ kơdong 10%. Lu sang anŏ amăng plơi pla hơmâo man pơdong sang, blơi rơdêh kông nông, măi ƀô̆p ia pioh pruih brơi phun pla. Tui ơi Trần Văn Thuận, Khua kông ti apui lơtrik Dak Lak, hluai tui akŏ bruă ngă giang mah rĭm thun, Ping gah kông ti hơmâo jao bruă brơi hơdôm gơnong bruă, anom bruă, khul grup Ping gah gum hrŏm hăng hơdôm anih anom ngă giang mah kiăng pok pơhai ngă tŭ yua jơlan hơdră anai.
“Tui jơlan hơdră ngă giang mah, anom bruă hơmâo ba tơbiă hơdôm bruă mă rĭm thun kiăng djru brơi tơlơi hơdip mơnuih mơnam hăng đing nao hơdôm boh sang anŏ tui hơdră djru, sang anŏ tơnap tap kiăng djru hơdôm boh sang anŏ pơđĭ kyar bơwih ƀong huă. Hăng ƀuôn M’riu hơdôm tơlơi tơnap tap anom bruă ăt thâo laih hăng ba tơbiă hơdôm jơlan hơdră djru sit nik brơi mơnuih ƀôn sang kah hăng bruă pơjing plơi pla gru grua hiam klă”.
![Khul mơnuih mă bruă mut phung anom bruă apui lơtrik Dak Lak ƀơk gơnam brơi mơnuih ƀôn sang ƀuôn M’riu, să Čư̆ Huê, tơring glông Ea Kar ƀrô bơyan čơkă thun phrâo Giáp Thìn](https://vov4-media.solidtech.vn/sites/default/files/styles/large/public/2024-06/22-6_cd_dien_luc_dl.jpg)
Ngă tui tơlơi črâo trun mơng Ping gah tơring čar Dak Lak kơ bruă ngă giang mah hăng hơdôm boh plơi prong djuai ania ƀiă, truh ră anai, Dak Lak hơmâo giăm 200 sang bruă, anom bruă, anom bơwih ƀong sĭ mơdrô gưl tơring čar ngă giang mah hăng hơdôm boh plơi pla. Ơi Nguyễn Đình Trung, ding kơna Ping gah dêh čar, Khua git gai Ping gah tơring čar Dak Lak brơi thâo, hăng tơlơi gum djru sit nik mơng hơdôm anom bruă ngă giang mah, tơlơi hơdip mơda kơ mơnuih ƀôn sang djuai ania ƀiă ngă giang mah hơmâo pơplih tong ten. Pơ anăp anai, Ping gah tơring čar Dak Lak amra tŏ tui pơtrut kơtang ngă tui bruă ngă giang mah hăng plơi pla mơnuih djuai ania ƀiă kiăng pơgôp pơhrŏ trun ƀun rin, hơkrŭ pran gum pơgôp djop djuai ania, gir run pơjing tơring čar Dak Lak pơdrong asah hiam klă hăng djop gru grua.
“Hơdôm anom bruă ngă giang mah hăng plơi pla lêng kơ ngă tui djơ̆ tơlơi gơgrong, hơmâo boh than dưi ngă tong ten hăng djơ̆ tơlơi rơkâo, hơnong pơkă ba tơbiă. Tơlơi hơdip kơ mơnuih ƀôn sang ƀơi kual tơnap tap hơmâo lu pơplih phrâo hăng tơlơi gum hrŏm, pran gum pơgôp djop djuai ania hơmâo gum hrŏm pơjing tơring čar Dak Lak pơdrong asah hiam klă”.
Ƀing ta ăt ƀuh, hơdôm bruă mă yôm phăn, djơ̆ hăng tơlơi sit nik amăng plơi pla, bruă ngă giang mah hăng plơi pla ƀơi Dak Lak ba glăi boh tŭ yua tong ten, pơgôp yôm phăn amăng pơđĭ kyar bơwih ƀong huă-mơnuih mơnam, pơjing pran kjăp anih anom kơđi čar, pơhlôm rơnuk rơnua, hơđong mơnuih mơnam hăng kjăp tui pran gum pơgôp djop djuai ania./.
Viết bình luận