Amăng sang pơdong hăng hnăl, tơr kyâo đôč, lăng hơbôt, rơgoh biă mă, sang ơi Kơsă Ha El dăp ƀơi čơgăn tong krah ngă anih hiam hloh pioh yôl rup wa Hồ hăng hră apah bơni kơ ñu, amăng anun hơmâo hră miđai 30 thun ping gah. Ñu tom ngă lu bruă apăn kual ƀơi plơi pla, kah hăng Khua git gai ping gah să Dă Chaih, laih anun Khua khul mơnuih ngă hmua tơring glông Lạc Dương. Ñu tom ngă kơ-iăng khua anom pơtô bruă ping gah tơring glông Lạc Dương, tơring čar Lâm Đồng hơđăp, glăi pơdơi abih thun bruă amăng thun 2022.

Hăng tơlơi thâo thăi laih anun kơnuih hiam mơ̆ng ñu, glăi pơ pơdơi abih thun bruă laih, ơi Kơsă Ha El ăt arăng ruah ngă khua git gai ping gah plơi Dă Blah, să Lạc Dương. Ñu hơ̆k mơak ră ruai glăi ƀuh anŏ pơblih phrâo amăng plơi pla.

“Hlâo adih mơnuih ƀôn sang pơ anai tơnap tap biă mă, jơlan glông nao rai, bruă ngă hmua pla pơjing kah hăng ƀu hơmâo hơgĕt ôh….Truh thun 1992, dưi hơmâo tơlơi djru ba mơ̆ng kơnuk kơna ƀơk brơi pơjeh, anah kơphê či pla, anun hơmâo tơlơi pơblih kơtang biă mă mơ̆ng tơlơi pơmin ngă bruă hmua, pla kơphê amăng mơnuih ƀôn sang. Ƀing gơmơi jak iâu mơnuih ƀôn sang ƀu dưi hyu jah drôm glai klô dơ̆ng tah, hơdôm hmua hơmâolaih, khom ngă tong ten, pla phun boh čroh hơmâo rơnoh ƀiă, kah hăng pla kơphê, pla boh hồng, pơtrut bruă rông kơbao, rơmô sĭ hơmâo prăk lu hloh….”

Dơ̆ng mơ̆ng ngă tui jơlan hơdră dêh čar pơkă man pơdong plơi pla phrâo, sang anŏ mơnuih ping gah Kơsă Ha El ba akŏ na nao. Ñu hrŏm hăng grup mơnuih tha rơma, ƀing thâo ngă bruă jak iâu mơnuih ƀôn sang jao glăi lŏn sang đang hmua anih djơ̆ jơlan arăng čuk nao, pok jơlan kơ plơi pla rô nao rai rơhaih hloh, pioh man pơdong ring bruă čar. Tum teč biă mă ñu, sang anŏ ñu hơmâo pơyơr truh 20 met lŏn sang đang hmua gơñu pô djơ̆ jơlan arăng čuk, yap hăng prăk hơdôm klai ƀơ̆I, kiăng ngă tui bruă pok prong jơlan 27C. Ră anai, kơnuk kơna hlăk čuk pơkra, pok prong jơlan hăng bư̆ glă dơnao prong Rơhoa, sang anŏ ăt jao glăi, rơngiă lŏn hmua truh 2,5 hlăk pla kơphê.

Hăng pran jua nao hlâo amăng bruă mă djru pơyơr kông ngăn lŏn sang đang hmua pioh pơdong ring bruă čar, sang anŏ ơi Kơsă Ha El, dưi bang hyu tơlơi hiam klă, bruă mă djơ̆ amăng plơi pla, djru pran jua ai hơtai, kông ngăn amăng bruă man pơdong plơi pla phrâo laih anun pơđĭ tui tơlơi hơdip mơda kơ mơnuih ƀôn sang. Thun hlâo, rơnoh pơhrui glăi mơ̆ng rim čô mơnuih mă bruă sa thun amăng plơi Dă Blah lĕ 45 klăk prăk. Plơi anai, ƀu hơmâo sang anŏ ƀun rin ư̆ rơpa dơ̆ng tah, kơnong hơdôm sang anŏ giăm ƀun rin. Yă Čil Pam K’Quyên, khua hơđăp git gai ping gah plơi Dă Blah, să Lạc Dương brơi thâo.

“Hăng ƀing gơmơi, ơi Kơsă Ha El jing mơnuih ba gru hlâo, kah hăng tơlơi bơngač pơčrang jơlan nao hlâo. Ñu jing tơlơi đăo kơnang kơjăp pơtruh nao rai ping gah hăng ană plơi pla, tơlơi ñu pơhiăp nao hrŏm hăng bruă mă, mơnuih ƀôn sang hmư̆ hăng ngă tui soh”.

Să Lạc Dương ră anai, dưi pơmut hrŏm mơ̆ng klâo boh să Dă Sar, Dă Nhim hăng dă Chaih tơring glông Lạc Dương hơđăp. Hăng đơ đam lŏn glai hơmâo 830 Km2, Lạc Dương jing să prong hloh ƀơi tơring čar Lâm Đồng, mrô mơnuih ƀôn sang djuai ƀiă lĕ 82%. Ơi Ya Tiong Khua git gai ping gah să Lạc Dương brơi thâo, amăng rơwang bruă thun 2025-2030, să ăt pơtrut bruă ngă hmua yơh phun,  ngă anŏ gơgrong phun laih anun lir hơbit bruă čơkă tuai hyu ngui kiăng pơblih kơtang. Kiăng dưi ngă truh kih djop pok hră pơtrun mơ̆ng ping gah khom pơđĭ na nao tơlơi hơdip mơda kơ mơnuih ƀôn sang, să đing nao tơlơi gơgrong kơtang mơ̆ng ping gah, mơnuih ping gah amăng kual djuai ƀiă dŏ.

“Să anai hơmâo lu mơnuih ping gah sui thun laih, rơđah biă mă ñu kah hăng ơi Kơsă Ha El, mah pơdơi abih thun bruă laih, tui hơdră kơnuk kơna djru, samơ̆ ră anai yua tơlơi hur har adơi ayong, ƀing gơ̆p ngă bruă hrŏm, jĕ giăm hăng ană plơi, ñu ăt gir run mă bruă pơyơr pran jua djru ană plơi pla, kiăng hrŏm hăng să, gong gai kơnuk kơna pơtrut tơlơi bơwih ƀong huă pơđĭ kyar mơnuih mơnam ƀơi Lạc Dương anai”.

Pran jua tơlơi gơgrong ba mơ̆ng mơnuih ping gah ơi Kơsă Ha El hơmâo pơtrut kơtang tơlơi đăo kơnang mơ̆ng mơnuih ƀôn sang hăng ping gah, ba tơlơi bơngač amăng tơlơi pơmin, pran jua hrưn đĭ, gum tơngan man pơdong plơi pla Lạc Dương, tơring čar Lâm Đồng jai hrơi pơblih hiam klă, pơđĭ kyar tui.