Kông ti gir run gum hrŏm hăng gong gai ƀon sang pơtrut pơsur mơnuih ƀon sang pơyơr lŏn, hrơi mă bruă, gơnam tam pơkŏn kiăng djru man pơdong, pơkra ming glông hrĕ apui lơtrik hạ áp tui tơlơi pơsit “Kơnuk kơna hăng mơnuih ƀon sang gum hrŏm”; pơtô pơblang mơnuih ƀon sang thâo wai lăng ring bruă apui lơtrik, glông hrĕ apui lơtrik, yua apui pơkrem, tŭ yua.

Kơnong amăng 3 thun giăm anai, PC Dak Lak hơmâo pơphun ngă 263 akŏ bruă, hăng abih tih rơbêh 668 klai prăk. Laih dong, kông ti apui lơtrik kual Tong krah ăt tuh pơ alin man pơkra 12 ring bruă apui lơtrik akŏ phun amăng tơring čar Dak Lak, nua abih tih 1.322 klai  prăk.

Truh ră anai, djop boh să, phường, tơring kual amăng tơring čar hơmâo apui lơtrik, hơmâo 99,54% mrô sang anŏ mă yua glông hrĕ apui lơtrik dêh čar hăng 148/152 boh să dưi ngă giong hơnong pơkă yua apui lơtrik amăng man pơdong plơi pla phrâo./.