VOV4.Jarai - Ding jum ngă hmua hăng pơđĭ kyar ƀon lan phrâo hơmâo hră pơ-ar mơ-it Khua dêh čar kơ bruă tŭ yap Jơlan hơdră pơđĭ kyar bơwih brơi tuai čuă ngui ƀơi ƀon lan amăng man pơdong plơi pla phrâo rơwang thun 2021-2025.

Tui anun, abih tih rơnoh prăk mă yua ngă tui Jơlan hơdră him lăng giăm 2 rơbâo 500 klai prăk, ngă tui Jơlan hơdră tui hơnong pơkă dêh čar amăng man pơdong plơi pla phrâo rơwang thun 2021-2025. Amăng anun, rơnoh ngăn drăp Kơnuk kơna djru mơng Jơlan hơdră tui hơnong pơkă dêh čar amăng man pơdong plơi pla phrâo giăm 500 klai prăk; rơnoh prăk mơng ngăn drăp ƀon lan 550 klai prăk; rơnoh mă mơng hơdôm jơlan hơdră, akŏ bruă pơkŏn 560 klai prăk; prăk čan hăng jak iâu gum pơgôp mơnuih mơnam giăm 890 klai prăk.

Jơlan hơdră kiăng pơtrut pơđĭ kyar bơwih brơi tuai čuă ngui ƀơi ƀon lan pơlir hăng mă yua hơdôm tơlơi gal mơng ngă hmua, pơkra gơnam tal, gru grua hăng lŏn mơnai glai čư̆ ƀơi djop ƀon lan. Laih dong hrưn đĭ tơlơi hơdip mơda kơ mơnuih ƀon sang, pơgôp pơplih amăng bruă bơwih ƀong huă amăng plơi pla ala ƀon anăp nao pơmut lu tơlơi yôm hăng pơđĭ kyar hơđong kjăp.

Hơnong pơkă truh thun 2025 lĕ pơđĭ kyar, ngă pơgiong hơdôm anih čuă ngui hăng gơnam brơi kơ tuai čuă ngui ƀơi ƀon lan. Sit biă ñu rĭm boh tơring čar, ƀôn prong gir hơmâo ƀiă biă mă ñu 1 anih tuai čuă ngui amăng plơi pla hơmâo tŭ yap pơlir hăng tơlơi dưi mơng ngă hmua, gru grua, pơkra pơjing gơnam ƀudah lŏn mơnai glai čư̆ ƀơi ƀon lan; ƀiă biă mă ñu 500 anih bơwih brơi tuai čuă ngui ƀơi ƀon lan hơmâo tŭ yap klă hloh ƀudah tŭ yua tui hơnong pơkă bơwih brơi tuai čuă ngui.

Jơlan hơdră pơtrut pơđĭ kyar bơwih brơi tuai amăng plơi pla pơlir hăng bruă pơplih mă yua boh thâo phrâo hăng Jơlan hơdră rĭm boh să sa gơnam (OCOP) hăng ƀiă biă mă ñu hơmâo 80 gơnam bơwih brơi tuai čuă ngui amăng plơi pla hăng anih bơwih brơi tuai amăng ƀon lan hơmâo tŭ yap tui hơnong pơkă OCOP mơng 3 asar pơtŭ pơ glông hăng hơmâo ngă klă tui; amăng anun ƀiă biă mă ñu 50% anŏ bơwih brơi tuai čuă ngui amăng plơi pla hăng anih bơwih brơi tuai čuă ngui amăng ƀon lan hơmâo mă yua boh thâo phrâo hăng pơlir amăng plang internet kiăng kơ lăi pơthâo, pơsur bơwit brơi tuai čuă ngui hăng boh thâo phrâo.

Jơlan hơdră gir run 100% anih bơwih brơi tuai čuă ngui amăng plơi pla hơmâo lăi pơthâo; 50% anih bơwih brơi tuai amăng plơi pla hơmâo măi yua boh thâo măi mok amăng bruă tuai čuă ngui. Rĭm boh tơring glông plơi pla phrâo hơmâo tơlơi dưi amăng bơwih brơi tuai čuă ngui pơjing ƀiă biă mă ñu 1 hơbô̆ bruă pơlir bơwih brơi tuai čuă ngui ƀơi đang hmua plơi pla. Ƀiă mă mă ñu 70% pô anih bơwih brơi tuai čuă ngui amăng plơi pla hơmâo pơtô hrăm amăng bruă wai lăng bơwih brơi tuai…Sit biă ñu lĕ amra hơmâo anih djă pioh hăng hră lơkak črâo brơi anih čuă ngui amăng plơi pla đơ đam dêh čar ta.

Kiăng kơ ngă tui jơlan hơdră anai, djop gơnong bruă bơdjơ̆ nao amra pel ĕp, pơgiong hơdră bruă kiăng pơđĭ kyar bơwih brơi tuai amăng plơi pla. Pơjing anăp nao pơđĭ kyar bơwih brơi tuai čuă ngui amăng plơi pla hăng pơƀut hrŏm, pơhrua amăng akŏ bruă pơđĭ kyar bơwih ƀong huă - mơnuih mơnam, dưm dăp glăi anih anom bơwih brơi tuai amăng dêh čar hăng man pơdong plơi pla phrâo. Djop ƀon lan hơmâo tơlơi dưi amăng bơwih brơi tuai čuă ngui pơjing akŏ bruă, jơlan hơdră ƀudah hơmâo akŏ bruă pơđĭ kyar bơwih brơi tuai čuă ngui amăng plơi pla rơwang thun 2022-2025, pơlir hăng pel ĕp hơdôm anih bơwih brơi tuai lăp djơ̆ hăng hơdô dưm dăp bơdjơ̆ nao.

Laih dong, Jơlan hơdră pơjing hăng pơgiong anih anom djơ̆ tơlơi pơkă, boh thâo mă yua amăng bơwih brơi tuai čuă ngui amăng plơi pla; pel ĕp, pơhrua hơdôm hơdră kiăng pơsur tuh pơ alin, pơđĭ kyar bơwih brơi tuai čuă ngui amăng plơi pla; pơtrut tơlơi rô nao rai ngă hrŏm kơplah wah Kơnuk kơna - anom bruă hơjăn, ngă hrŏm gong gai- hơjăn-mơnuih mơnam, hơdôm hơbô̆ bruă wai lăng djop mơta hơdôm kual bơwih ƀong mơng gong gai hăng hơjăn, anom bơwih ƀong sĭ mơdrô hăng mơnuih mơnam amăng pơđĭ kyar bơwih brơi tuai čuă ngui amăng plơi pla.

Jơlan hơdră amra pơtrut, ngă pơmut hrŏm hăng mă yua klă hloh hơdôm rơnoh prăk djr amăng pơđĭ kyar bơwih brơi tuai čuă ngui amăng plơi pla tuh pơ alin, biă mă ñu lĕ anom bơwih ƀong sĭ mơdrô, mơnuih mơnam …kiăng pơđĭ kyar. Jơlan hơdră amra djru pơtô hrăm mơng anun mơnuih mă bruă amra thâo rơgơi amăng bruă bơwih brơi tuai čuă ngui ƀơi ƀon lan. Ba tơbiă hơdôm boh tơhnal pơtô răm kơ bruă bơwih brơi tuai amăng jơlan hơdră pơtô hrăm ƀơi hơdôm anom bruă pơtô bruă mă ƀơi ƀon lan hăng amăng kual …

Sit biă ñu, kiăng mă yua boh thâo phrâo, pơtrut pơplih mă yua boh thâo mă mok amăng pơđĭ kyar bơwih brơi tuai čuă ngui amăng plơi pla, Jơlan hơdră amra pơjing hră lơkak črâo brơi gơnam bơwih brơi tuai amăng plơi pla, djru pơlir gơnam bơwih brơi tuai amăng plơi pla hăng hơdôm gơnam pơkŏn kiăng pơsur bơwih brơi tuai. Ha bơnah dong pơjing anih djă pioh brơi kơ lăp djơ̆ mơng gơnong glông truh ƀon lan djru amăng bruă wai lăng, lăi pơthâo hăng pơsur bơwih brơi tuai čuă ngui amăng plơi pla; ƀudah hơmâo plang điện tử kơ bruă bơwih brơi tuai amăng plơi pla.

Siu Đoan: Pơblang