Hơdôm hrơi rơnuč thun, kual wai lăng glai rưng Kon Ka Kinh čơkă khua mua mơng tơring čar Gia Lai nao ĕp lăng tơl anih, hyu lăng kual glai rưng hăng ĕp jơlan gah pơđĭ kyar bơwih brơi tuai čuă ngui amăng glai rưng. Tơdơi kơ ha mông rơbat hyu amăng glai, ĕp lăng djop mơta ria mơnong hăng anŏ hiam phara ƀơi anai, Khua Jơnum min mơnuih ƀôn sang tơring čar Gia Lai ơi Phạm Anh Tuấn ăt glưh pran jua lơm ƀuh ƀơi anăp lu anŏ hiam amăng glai rưng:

“Ƀing ta ăt dưi lăi, kual glai rưng dêh čar Kon Ka Kinh lĕ kual glai yôm phăn ƀu djơ̆ kơnong hăng kơ Gia Lai đôč ôh ăt wŏt dêh čar Việt Nam hăng rŏng lŏn tơnah. Hrơi anai, grup hyu mă bruă hrŏm hăng djop gơnong bruă, sang bruă hăng hơdôm anom bruă bơwih brơi tuai čuă ngui hyu lăng kiăng ĕp jơlan gah wai pơgang rah, tŏ tui anŏ yôm bơwih brơi tuai čuă ngui, laih dong jak iâu gơyut gơyâo jar kmar nao ĕp lăng kual glai rưng yôm anai”.

Ơi Ngô Văn Thắng-Khua anom bruă wai lăng đang glai dêh čar Kon Ka Kinh brơi thâo, kual glai rưng anai lĕ sa amăng hơdôm kual glai kyâo hiam hloh rôk tui kơčong čư̆ Trường Sơn. Hăng hơdôm rơtuh phun kyâo pơprong, lu hlô mơnong yơyôm hăng lu glông trek sô hơđăp lăng hiam biă mă, Kon Ka Kinh hơmâo djop tơlơi gal kiăng jing anih čuă ngui amăng glai rưng ƀơi Gia Lai. Pơ anăp anai, tui jơlan gah mơng anom bruă lĕ pơđĭ kyar tuai čuă ngui amăng glai rưng, djru bruă bơwih brơi tuai čuă ngui hơđong kjăp mơng mơnuih ƀôn sang ƀơi anai hăng pơgôp wai lăng glai rưng hơđong kjăp.

“Pơ anăp anai, ƀing gơmơi amra pơtrut kơtang bruă wai lăng kiăng kơ dưi djă pioh anŏ hiam, anŏ yôm mơng glai rưng pơhlôm dưi djă bong na nao; laih dong kơtưn gum hrŏm hăng hơdôm bruă bruă tuai čuă ngui pơjing sa, dua gơnam tam, tơlơi bơwih bơwang hăng pơkra anih anom bơwih brơi tuai; pok lông lăng sa, dua tour-jơlan hyu čuă ngui kiăng pơtô glăi, kơsem min; lăi pơthâo rup rap đang glai brơi hơdôm anih anom, sang hră. Ƀing gơmơi ăt amra čih pơkra hră pơ-ar, akŏ bruă kiăng rơkâo tuh pơ alin pơgiong anih anom, djru brơi klă kơ tuai čuă ngui”.

Hrŏm hăng đang glai čuă ngui, hăng Kon Ka Kinh ăt lĕ anih hơmâo hmua pơdai rôk đĭ kơčong čư̆ Đăk Tơ Te (săn Kdang), ƀu ataih đơi ôh mơng plơi prong Pleiku. Amăng pơ-iă yang hrơi tlam, lăng hyu jum dar hiam biă mă, hơmâo kơñĭ-mơtah-kô̆ jŭ mut hrŏm, pơdah rup rap kual čư̆ siăng pling plung đĭ trun hiam biă mă. Anŏ hiam anun ngă kơ anih anai jing nao ĕp lăng, check in, phin rup mơng tuai čuă ngui. Ƀuh tơlơi dưi anun, Ping gah, gong gai să Kdang, tơring čar Gia Lai glăk ƀơƀrư̆ hơmâo jơlan gah pơđĭ kyar hơdôm tour čuă ngui amăng plơi pla, čuă ngui amăng đang glai hiam phara. Yă Lê Thị Huệ, Khua git gai Ping gah, Khua Jơnum min pơ ala mơnuih ƀôn sang să Kdang brơi thâo:

“Să glăk ĕp lăng hăng amra iâu pơthưr tuh pơ alin pơ anăp anai. Să čang rơmang thun 2035, kual tuai čuă ngui anai amra pok yua, anai lĕ anih nao čuă ngui mơng ƀing tuai ataih, giăm”.

Ră anai, ƀơi kual čư̆ siăng gah Yŭ tơring čar Gia Lai hơmâo lu tơlơi gal pơprong kiăng pơđĭ kyar čuă ngui amăng đang glai hăng hơdôm anih glai kyâo hiam, pơdah anŏ phara mơng kual čư̆ siăng. Biển Hồ-lăk mơta Pleiku, lêng jing anih yôm phara amăng pran jua mơnuih ƀôn sang hăng tuai čuă ngui. Jơlah ia hơđong kret črang pơƀuh gơnăm rơngĭt adai, hơdôm phun kyâo hngo prong sui hơdôm rơtuh thun ngă kơ kual glai lăng prong rơhaih rah hăng jê̆ giăm rah. Mơng anun ăt ƀu ataih ôh, čư̆ apui kơdir Chư Đang Ya lĕ anih ƀing hlăk ai hor čuă ngui hrŏm hăng ƀing hor phin rup laih dong mơnuih ƀôn sang nao ngui amăng bơyan bơnga ang bluh. Ayong Nguyễn Việt Cường, pô phin rup mơng Hà Nội, lăi pơthâo tơlơi ñu ƀuh phara lơm nao pơ kual lŏn anai:

“Lơm nao phin rup kâo ƀuh hiam biă mă. Kâo čang rơmang ƀon lan amra pơđĭ kyar ƀơi anai, kiăng pơhưč lu mơnuih dưi nao ĕp lăng”.

Kiăng pơtrut pơđĭ kyar, hơdôm thun giăm anai, Gia Lai hơmâo tuh pơ alin man pơkra jơlan glông mut nao kual wai lăng hăng hơdôm anih hiam phun; dưm dăp glăi hơdôm bruă bơwih bơwang raih daih ƀơi hơdôm anih check in; laoh dong hrưn đĭ klă dong bruă ba hyu tuai amăng plơi pla hăng ngă klă tui bruă čơkă tuai ƀơi hơdôm anih bơwih brơi tuai čuă ngui amăng đang glai. Yua pok prong bruă pơtrut pơsur, Gia Lai pơƀuh tong ten ƀiă dong hơdôm glông ba hyu tuai čuă ngui pơlir kual Dap kơdư-Dơnung tong krah, pơjing glông pơlir gơnam tuai čuă ngui djop mơta mơng trekking, ĕp lăng amăng glai, nao lăng arăng ngă hmua truh kơ čuă ngui jum dar dơnao ia-kơčong čư̆-gru grua. Thun 2025, tơring čar čơkă hơdôm hơpluh klăk čô tuai, lu hloh amăng anun lĕ mơng bruă tuai čuă ngui amăng đang glai gah yŭ. Yă Đỗ Thị Diệu Hạnh - Khua gơnong bruă gru grua, bơrơguăt drơi jăn hăng tuai čuă ngui Gia Lai brơi thâo, amăng rơwang thun 2026-2030, tuai čuă ngui hơmâo pơsit lĕ sa amăng hơdôm bruă akŏ phun bơwih ƀong huă amăng tơring čar:

“Đing nao wai lăng, tŏ tui hơdôm rơnoh yôm gru grua, đang glai hiam, tơlơi hing ang đưm hlâo. Đing nao lăi pơthâo anăn apăn anih tuai čuă ngui, pơlir kual Ngŏ-Yŭ, pơđĭ kyar tuai čuă ngui kual ia rơsĭ, amăng plơi pla, hyu ĕp lăng. Rơnuč lĕ pơjing ngăn rơnoh pơđĭ kyar tuai čuă ngui, ba glăi lu gơnam čuă ngui yôm phara kơñ pơgi”.

Pơđĭ kyar tuai čuă ngui amăng glai rưng pok brơi Gia Lai sa jơlan yak nao hơđong kjăp, kiăng glai kyâo dưi wai lăng, anŏ yôm mơng ƀon lan hơmâo ngă mơdưh, laih dong ba glăi tơlơi bơwih ƀong sui pơ anăp kơ mơnuih ƀôn sang. Anai ăt lĕ atur kiăng Gia Lai pơđĭ kyar bơwih ƀong huă ƀon lan tui jơlan mơtah hăng hơđong kjăp kơñ pơgi./.